الموضوع: ٢ موبايل. @@@ ايه الفرق بينهم @@ samsung galaxy s 3

بص حضرتك بالنسبه للتكنولوجيا كل لما بتطلع تكنولوجيا جديده بتغلى اللى قبلها و ده معناه ان اى تليفون حضرتك بتشتريه بعد كام شهر هيطلع منه موديل أحدث و بالتالى هتلاقى الموبايل اللى بقى معاك بقى سعره قليل قوى. الموضوع ده يشمل الالكترونيات بصفه عامه زى الكمبيوتر و الموبايلات و الكاميرات و التلفيزيونات و ده نتيجه تطور التكنولوجيا السريع قوى فى الحاجات دى بعكس حاجات إلكترونيه تانيه تطورها التكنولوجى مش سريع زى مثلا التلاجات و التكييفات و كتير من الاجهزه المنزليه و لهذا السبب حضرتك تقدر تقعد تستخدم ثلاجه او غساله مثلا عشر سنوات بدون مشاكل و مش هيفوتك كتير لان تطورها بطىء و كمان هتلاقى سعرها فى رينج معين دائماً يكاد يكون ثابت أما الالكترونيات ذات التطور السريع فالسعر غالى و متغير لأنك بتشترى تكنولوجيا جديده اتصرف عليها ملايين فى البحث و التطوير و لذلك فان سعرها مرتفع . بالمناسبه سامسونج أعلنت أنها هتنزل ال s4 فى الأسواق فى فبراير 2013 و هو ده التطور السريع اللى باقول عليه مع ان ال s3 لسه نازل من كام شهر. بالنسبه لحل المشكله دى هو بسيط و هو ان حضرتك تحدد ايه احتياجاتك بالضبط و تشوف ايه أرخص موديل الحاجات دى موجوده فيه و تشتريه و بذلك تكون الخساره عند البيع اقل ما يمكن و فى نفس الوقت يؤدى كل الوظائف اللى حضرتك محتاجها و الموضوع ده سهل لان هناك عشرات الموديلات من سامسونج كلها كويسه و فيها اغلب الوظائف و أسعارها معقوله تقدر تختار منها اللى يناسبك و بعد كده حتى تقدر تغيرها بسهوله لأنك مش دافع فيها كتير و مش هيفرق معاك سعر اعاده البيع قوى او لو حضرتك كنت محتاج كل وظائف ال s3 ممكن تفكر تشتريه بس من الخليج مثلا و هيفرق معاك ٨٠٠ جنيه على الأقل و جيتكس فى الإمارات شغال دلوقتى و منزلين الاسعار جامد. المهم حضرتك أيا كان اختيارك سواء ال s3 او حاجه اقل أنها تبقى أصلى من الصانع الاصلى و ليست تقليد و بالذات فى الالكترونيات لان التقليد ده لو باظ ملوش تصليح و لا بيع و الخساره هتبقى تمنه بالكامل أما لو كان التليفون أصلى فحتى لو كان اقل فانه معاه ضمان و فى امكانيه لتصليحه

المشاركة الأصلية كتبت بواسطة AirForces

يا باشا الإعلانات عن الموبايلات دى بتجى فى قنوات اى كلام بتكون لسه فاتحة وعايشة على الإعلانات من النوع دا حتى تلاقى مدة الإعلانات اللى بيجيبوها فى فيلم بيذيعوه اكبر من مدة الفيلم نفسه ... وتلت تربع الإعلانات دى نصب فى نصب وطبعا سامسونج لو عرفت هترفع قضية اكيد


انا قريت تقرير من موقع gsmarena بيقول مفيش فروق تذكر بين ال s3 والنوت 2 غير فى حجم الشاشة والبروسيسور اسرع شوية والرامات فى الs3 واحد جيجا انما فى ال نوت 2 اتنين جيجا

+1111
وزن ال s3 أخف كتير من ال note2 . هو اللى معندوش ايباد هينا سبه ال note2 اكتر لانه هيغنيه عن اللابتوب أما اللى عنده و محتاج تلفون و حاجه خفيفه ممكن يختار ال s3

المشاركة الأصلية كتبت بواسطة Y a r i s

تسلم ايديكم ياشباب على جميع ردودكم الجميلة وتفاعلكم مع الموضوع
ولاند كروزر بجد اوجزت فانجزت كلامك ١٠٠٪ معقول. بس بجد اتقهرت من حتت ان السامسونج اس ٤ هينزل بعد كام شهر .... أأأأللللله. ده الواحد لسه بيفكر يجيب ده ولا يجيب ده
بجد تسارع في التكنولوجيا بقه شيء غير معقول كان زمان الموبايل يقعد معاك سنتين قبل مايطلع الشكل الجديد منوا
وواللهي عندي موبايل زي نوكيا كيتكات. ٨٢١٠ كان افضل موبايل عندي في حياتي

كان قد الصباع كده وشبكة وبطارية رووووعه ومفكرتش ابيعوا غير علشان اجيب



وكان عشقي وغرامي ال ٨٨٥٠ لغايت ما ابني منوا لله كان اتعلم المشي ومسكوا حطوا في بوقوا لقى ملهوش طعم قام حدفوااا من الشباك ههههههههه. بس تصور وقع من تالت دور وجاب شاشة وبتاع واتجرح رحت صلحتوا ونزلت بايعوا وجابلي سعر ... النهردة تيجي تبيع موبايل زي الفففففل. ومفهوش خربوش حتى ومابيجبلكش حاجة ومابتلحقش حتى تفرح بيه

العفو يا باشا. سامسونج اتسعرت و بتنافس بشراسه اى حد يقف فى طريقها. فى منافسين كانوا هما بس اللى محتكرين السوق ده من زمان و دلوقتى بينقرضوا زى نوكيا و الكاتيل و موتورولا و سونى و اريكسون و اللى بقى فاضل سامسونج رغم أنها كانت لحد قريب مغموره و معاها apple و لو أنها مش هتصمد قدام الغزو الكورى بمجموعه موبايلات متفوقه فى كل حاجه و بنصف التمن و الظريف فى الموضوع ان سامسونج لما ما بتلاقيش حد تنافسه بتنافس نفسها و بتطلع موديلات مختلفه بأسعار متقاربة جدا زى ال s3 و ال note2 كده و بالطريقه دى هاتحتكر الصناعه دى و مفيش حد هيقدر ينافسها . على فكره فى حكايه ظريفه قوى بخصوص موضوع اختيار اللى يناسب الاحتياجات من التكنولوجيا حصل لى من حوالى3 او 4 سنين او يمكن اكتر و هى أنى قابلت السفير اليابانى و فوجئت انه تلفونه نوكيا 3310 القديم ده و ده سفير اكبر دوله تكنولوجيا فى العالم بينما السائق بتاعه المصرى كان معاه تلفون بشاشه الوان و يمكن بكامريتين و استغربت قوى من المشهد ده و الراجل لاحظ انى مستغرب من الموبايل فضحك و قالى انت مندهش ان الموبايل قديم مش كده ؟ فقلت له يعنى فرد على انا احتياجاتى اليوميه هى امكانياته بالضبط و بالتالى ليس هناك داعى ادفع فلوس فى حاجات عمرى ما هاستخدمها فانا سمعت الكلام ده و عجبنى و قعدت ازغر للسواق بتاعه كانى باقوله أتعلم منه راح السواق باصصلى و قالى شايف الشح اللى عايشين فيه و على قلبهم فلوس قد كده .. ما هى ما بتهونش غير على الغلبان