استفسار بالنسة لجواز السفر الكمبيوتر

**yalahwy2010** · 27-10-2012 08:03 PM

انا عايز أعمل جواز سفر كبيوتر .....ايه الأوراق المطلوبة ؟
انا معايا واحد قديم....وفيه تأشيرة أمريكا .....:( ولسة التأشيرة صالحة لغاية سبتمبر 2014
هل التأشيرة تروح على لو عملت جواز سفر جديد؟؟؟؟

**ahmedmali** · 27-10-2012 10:41 PM

السلام عليكم
أخي العزيز إذا كنت ها تعمل الجواز الجديد بنفس البيانات اللي في القديم يبقي تصور القديم و البطاقة و تروح المجمع او اقرب مكان لسكنك لإستخراج الجواز و تسحب الاوراق و تقدمها مع الاحتفاظ بالقديم.
أما اذا كنت ها تغير بيانات في الجواز الجديد (لازم تكون زي البطاقة) يبقى تسحب الورق و تختمه من النقابة التابع لها او التامينات او اي جهه حكومية ختم نسر و ترجع تقدم مع الاحتفاظ بالقديم.
بالنسبة الى التأشيرة ممكن تروح السفارة بالجوازين و تنقل التأشيرة للجديد

**omaroof** · 27-10-2012 10:57 PM

بتعمل الباسبور الجديد عادى وبتخلى الجواز القديم معاه بتمشى بالاتنين عادى
او تروح السفاره بيعملو تاشيره بنفس البيانات اللى فى التاشيره التانيه ويحطوها على الباسبور الجديد
بيحتاجو 4 صور خلفيه بيضاء وصورة البطاقه وصورة الباسبور القديم والاصل كمان

**yalahwy2010** · 28-10-2012 01:06 PM

المشاركة الأصلية كتبت بواسطة omaroof

بتعمل الباسبور الجديد عادى وبتخلى الجواز القديم معاه بتمشى بالاتنين عادى
او تروح السفاره بيعملو تاشيره بنفس البيانات اللى فى التاشيره التانيه ويحطوها على الباسبور الجديد
بيحتاجو 4 صور خلفيه بيضاء وصورة البطاقه وصورة الباسبور القديم والاصل كمان

ألف شكر يا جماعة على الردود القيمة
بالنسبة لموضوع 4 صور خلفية بيضاء.....دى قصد حضرتك ان لو انا عايز أنقل التأشيرة من الباسبور القديم للجديد؟؟؟؟؟صح كدة؟
لكن لو انا مش عايز أنقلها ممكن أمشى بالجوازين الجديد والقديم مع بعض عادى ؟....صح؟
وبالنسة لعمل الجديد....هل باخد صور شخصية لى خلفية بيضاء ولا هم بيصورونى هناك؟؟؟؟
وبياخد وقت أد ايه عشان يطلع؟؟؟هل باخدوا فى نفس اليوم...؟...ولا بيطولوا؟
وآسف على الإطالة
وكل سنة وانتوا طيبين

**Khaled_Nowaihy** · 28-10-2012 01:28 PM

المطلوب لجواز السفر الجديد :
صورة بطاقة الرقم القومى
صورة الجواز القديم (ص 2 إلى ص 9)
3 صور حديثة بخلفية بيضاء

حضرتك بتروح تسحب الاستمارة من مكتب الجوازات وتملأها وانت واقف وتقدمها فى الشباك
اذا كانت جميع البيانات الموجودة فى بطاقة الرقم القومى هى نفس البيانات اللى هاتكتبها فى استمارة جواز السفر يبقى كده تمام وهياخدوا الورق على طول
إنما لو بيانات مختلفة (العنوان - الوظيفة مثلاً) يمكن يطلبوا منك إثباتات لها والله أعلم

عمل الجواز مفروض 3 أيام، أنما لو قدمت الورق الصبح بدرى قبل 12 ظهراً ممكن تستلمه بعد يومين
الرسوم 135 جنيه
سمعت إن فيه بعض مكاتب الجوازات عندها مستعجل تاخدها فى اليوم التالى زى مجمع التحرير