الموضوع: ماذا تفعل اذا صدمتك سيارة اخرى اثناء قيادة سيارتك ( تجربة واقعية )

المشاركة الأصلية كتبت بواسطة birdybirdy

انا هاحكيلكم موقف حصل معايا بس انا اللي خبط مش اتخبطت. بس محدش يتريق لإني كنت بسوق جديد

انا كنت لسة متعلمة السواقة جديد والمارشدير عندي سخيف جدا وتقيل المهم كنت ماشية في شارع وركنت صف تاني وقفت كده شوية وبعدين حبيت اطلع كان في عربية قدامي فحبيت ارجع شوية عشان اعرف اطلع منها المهم حودت الدركسيون غلط وكنت قريبة اوي من العربية اللي جنبي فخبطلها الباب خبطة بسيطة دخلت الباب سنة لجوة وشوية دهان من عندي نزلوا علي عربيتها وارتبكت ومعرفتش اعمل ايه المهم نزلت من العربية وفي واحد ورايا جه يساعدني وطلعت العربية وركنتها في حتة تانية ورجعت لصاحبة العربية لاقيتها عمالة تزعق ومتنرفزة جدا المهم روحت واتأسفتلها وهي كل اللي عليها خديها صلحيها مش انتي اللي خبطتي خديها صلحيها قلتلها يامدام حضرتك شوفي هاتتكلف كام وانا هاتحمل الخبطة دي انا بعترف اني اخطأت وخبطها غصب عني والله بس هي فضلت تزعق وتلومني وقلتلها شوفي حضرتك عايزة ايه وانا اعمله المهم الرجل اللي ساعدني قالها ياستي دي بسيطة مش هاتتكلف 50 جنيه علي بعص وهاتترد علي البارد والدهان ده هايتشال مفيهاش حاجة قالته انا مش فاضية اروح اصلح واعمل (كانت دكتورة)وقالت خليها تاخدها تصلحها (غريبة جدا اخدلها عربيتها اصلحها واجيبهالها تاني ازاي؟ مخافتش عليها لاتروح ومترجعش تاني) المهم قالتلي انا عايزة 200 جنيه تحت النقص والزيادة قتلها كتير اوي والموضوع كله زي مالناس قالت 50 جنيه ويمكن اقل من هنا لهنا قلتلها نشوف السمكري هايقول ايه قالتلي انا مش فاضية هاتصل بالسواق ييجي ياخدها وتروحي معاه قلت طيب قعدت تتناقش معايا وان السواق مش هاينفع ييجي دلوقتي ده غير ان السواق بتاعها لما اتصلت بيه قالها 500 جنيه مش فاهمة امال لو كنت طبقتلها كانت تتكلف كام؟ قلتلها من الاخر انا كل اللي جيبي 100 جنيه هاديكي منهم 50 ولو اتكلفت اكتر كلميني قالتلي هاتي ال 100 جنيه ولو طلعلك انتي باقي هاردهولك ولو طلع اكتر يبقي ليا عندك حق اعمل ايه رحت اديتلها ال 100 جنيه فعلا واخدت تليفونها وكلمتها بعد يومين قالتلي معلش اصل السواق مفضيش يوديها، بعدها بكام يوم كلمتها تاني قالتلي السواق وداها بس هاتتكلف اكتر من 100 جنيه عشان الخبطة جت في عضم الباب من تحت مع اني معتقدش اني خبطتي وصلت لكده ابدا بس قلتلها شوفي كام وانا هاديكي الباقي (انا عاملت ربنا ساعتها وقلت عشان ميبقالهاش حاجة عندي قدام ربنا يعني وعشان كده كنت بتابعها بالتليفون) وقلتلها عموما رقمي معاكي وانا مش عايزة ابقي مديونة لحد لو طلع اكتر ياتسامحيلي فيهم يإما تتصلي بيا وانا اوصلك المبلغ الباقي لحد عندك ده غير اني قعدت اعتذرلها في كل مكالمة كلمتهالها وتعاطفت معاها جدا وكنت حاسة بذنب كبير اوي ناحيتها.
انا اتصرفت صح ودفعت تمن غلطتي وهي وضميرها لو اتكلفت اقل من 100 جنيه يبقي ليا عندها حق وعند ربنا ميضيعش ولو اتكلفت اكتر هيا مسعتش ورا حقها ولا اتصلت بيا عشان تطلبه بالعكش انا اللي كلمتها كذا مرة عشان اخلص ضميري يبقي عداني العيب ولا لأ.
معلش طولت عليكوا بس حبيت اوضح ان الانسان بيعامل ربنا يعني لو خطبت عربية حد وطنشت ومشيت زي مالناس بتعمل القضية ممكن تكون انتهت في الدنيا بس لكن عند ربنا الراجل ده له عندك حق سواء فلوس أو اعتذار وهايدفع يوم القيامة اضعاف فعشان كده الواحد يدفع اللي عليه في الدنيا احسن مايرده في الاخرة ولا إيه؟

طبعا تصرف كويس و محترم انك رجعتى لصاحبة العربية و اعتذرتي لها بس انتى اخطائتى فى انك وافقتى تدفعى كل الفلوس دى

اولا اذا كانت هى مش فاضية تصلح العربية يبقى منين حتقدر تستغنى عنها اساسا؟؟

ثانيا على اى اساس السواق قال 500 جنية قبل ما يشوف اى حاجة اصلا... و بعدين 500 جنية ليه يعنى؟؟ دا الباب الاستيراد ب 500 جنية

انا معرفش الغيب بس انا متاكد ان الباب متكلفش اكتر من 10 جنية و السواق ضرب فى جيبة 40 جنية و الست نامت على ال50 جنية الباقيين و قالتلك هى اتكلفت اكتر من 100 عشان تشترى دماغها

عموما البكاء على اللبن المسكوب مش حيقدم ولا ياخر.. المره الجاية (و اتمنى ميبقاش فيه مرة جاية اصلا) لازم العرض المحترم يتقدم مرة واحدة... لما تلاقى اللى قدامك طماع و بيتلابط يبقى "نعمل محضر" و ساعتها اللى عامل فهلوى حيعرف انه داخل حارة سد و مش حياخد غير اللى انتى حتديهولة لان المحضر حتى لو اتعمل مش حيقدم ولا ياخر فى اى شىء

MMamdouh