تجربه شراء اي باد 2 مستعمل
الحقيقه انا حبيت اني انقل التجربه كامله علشان كميه المهاترات والسرقه والنصب اللي شفتهم في الايام اللي فات واللي بجد اتمني ما حدش يتعرض ليهم من زمايلي هنا في المنتدي
نبدا بسم الله ونجيب القصه من البدايه
انا للاسف الشديد شغلي بيدفعني للتنقل كتير بعيد عن البيت ولفترات مش صغيره وكنتاج طبيعي فاتوره التليفون اصبحت بتتضخم بشكل كبير
وكان الحل المثالي بالنسبه ليه هو اني اشتري تابلت تكون فيه كاميرا ويكون سهل الحمل ويكون فيه كاميرا كويسه
مش شرط يكون 3 جي لاني كده كده بكون موجود في اماكن فيها نت وحتي لو ما فيش بشغل الموبيل هوت سبوت
نبص علي الاختيارات الموجوده من البدايه الاقل سعر فالاكثر
1-التابلت الصيني ميد سعره قليل من 600 الي 1000 ومعقول حجما وشكلا ولكن المضمون بقي سرعه زي الزفت تاتش سيء للغايه كتير اوي من الاجهزه شاشته اتحرقت البطاريه سريعه الانتهاء بطريقه مستفزه
2-التابلت بتاع اتصالات شاشته النقاء بتعها مش حلو والبطاريه نفس عيب كل الاندرويد ويوم ما كنت رايح اتفرج عليه كان في واحد بيتخانق باظ بعد ما اشتراه ب نص ساعه (ههههههههههه) صدفه منيله يعني
3-سامسونج ودا بقي بحر كبير ومليان بس نفس عيوب الاندرويد بطاريه تنتهي بسرعه اسطوريه الكاميرا حلوه بس مش طبعا بحلاوه الاي باد التاتش تحفه بس الاي باد مش تاتش دا بالسحر
4- وطبعا كنتاج للسعر هو كان اختياري الاخير البطاريه 5 ايام وبدون هزار السوفت وير كلمه سريع علي النت ما تدهوش حقه جرافيك و سرعه بورسيسور كلام من الخيال بصراحه الحقيقه تتقال اسطوري
نيجي بقي للشراء
مبدئيا الحمد لله ربنا رزقني بصديق كان عنده خبره نادره في الاجهزه وعارف الصح بتاع كل جهاز وطبعا اسمعو المفاجاءات
اي باد 1 واي فاي بس سعره لا يزيد عن 1300
اي باد 1 3 جي سعره بيوصل لي 1750
اي باد 2 واي فاي 1750 الي 1950 علي حسب الحاله يعني 1950 كسسر زيرو
م اهتمتش اعرف بقي الاسعار لاني كنت عايز 2 واي فاي
وهنا خدت بعضي وطلعت علي سراج مول علي اساس انه المفروض انه مكان اسعاره كويسه (كنت باحلم علي ما يبدو)
مبدئيا كل الاجهزه يقولك كسر زيرو ويطلعها وخده خبطه هنا وخربوش هنا وهلم جر ولا كارتونه ولا غيره
السعر بقي 2300 الي 2400 علما بان الجهاز في اخر ايامه كان ب 2700 يعني تشتريه مستعمل وكمان مخبوط ومتخربش واغلي من الطبيعي مش اقل من 400 جنيه
والله واحد كان عايز يبعلي جهاز متغير ليه تاتش ب 1800 عارفين متغيره ليه تاتش يعني ايه مفتوح وملعوب فيه بره التوكيل كمان تهريج وقله ادب والله وطبعا الكلام التاتش اصلي علشان اكتشف ان التاتش الاصلي ب800 جنيه يعني مستحيل يكون مركب اصلي
جهاز مستعمل ومحطوط في كارتونه ويقولي دا جديد وب 2500 نفتح الجهاز الاقيه متسجل عليه اسم حد ومتعرف علي ابل باسمه يعني مستعمل وكمان اشتغل اتسجل علي ابل استور
اخر قشه قسمت ظهر البعير اي باد وان واي فاي اخره كان 1300 وقلت ماشي يله بينا شاحن مش اصلي ويطلعه ليه الاقي جهاز متدمر مخبوط من كل حته التاتش من كتر ما هو مخبوط في الجنب خارج من الاتجاه المعاكس بره الفريم والله العظيم قله ادب :angry26:
طبعا اتعقدت ورجعت اعلنت الاستسلام لصحبي وقلتله يله خلنا بعد العيد
لاقيته بالليل بيكلمني وبقولي تعالي نزلين العمرانيه نزلنا جهاز اكتر من رائع جاي من دبي عند واحد مستورد اجهزه كمبيوتر جايب اربع اجهزه هديه كده مع الشحنه (الحمد لله جهازي كان الاخير وحجزنه بخناق)
1800 جنيه والجهاز زي الفل وكمان جراب اسود اصلي تمنه لوحده 300 جنيه في التوكيل
نصيحه لكل واحد هيشتري موبيل او اي تابلت اسال كويس اوي قبل ما تشتري لانك بيضحك عليك في كتير و ربنا يرحمنا من جشع التجار