خلي بالك من خدعة ازازة المية بصابون في الكشف على الكاوتش
انا عارف ان الموضوع مش جديد , وفي ناس كتير سمعت عنه , بس لسه فيه ناس اكتر بتقع فيه
الجديد انه كان بيحصل في محطات البنزين بس , دلوقتي بقى محلات بيع واصلاح الكاوتش كمان بيلعبوا نفس اللعبة القذرة
الخدعة باختصار للي لسه مايعرفهاش انك تكون بتكشف على الكاوتش في بنزينه او في محل يقوم الفني اللي واقف يلهيك بشكل ما و يعمل كام خرم صغير كده في وش الكاوتش , و احيانا من غير مايخرم بنفسه ممكن الكاوتش نفسه يكون فيه حفر صغيره مش باينه من المشي على اي حاجه حاده
المهم بعد كده يقوم ممشي الميه بالصابون على الكاوتش و يوريلك الصابون وهو بيبقلل من اخرام صغيره قوي , وطبعا مش خرم واحد لأ ده كذا خرم ممكن يوصلوا 10 اخرام , وفي الحقيقة الاخرام دي مابتكونش منفده للاخر , لأ دي اخرام سطحية يا اما بفعله هو او بفعل حاجه على الطريق
بعد كده يقنعك ان الكاوتش فيه اخرام كتير ولازم تعملها , وعلشان يعلم مكان الاخرام دي يقوم ماسك شاكوش و مسمار و يدق مكان الخرم الخفي ده فيخرم الكاوتش فعلا للاخر و يبوظه , و بعد كده يلحمه تاني باي طريقة بقى على البارد او خابور او غيره
في الحقيقة الكاوتش ميبقاش فيه كل الاخرام دي , لانه ببساطه لو مخروم هايبقى هو خرم واحد ونادرا جدا انهم يكونوا خرمين لكن مستحيل يكونوا 5 و 6 في نفس الوقت ولازم يكون سببهم معروف يعني يخرجلك مسمار مثلا من الفرده مغروز فيها , لكن الاخرام مش هاتيجي من الهوا زي ماهم بيحاولوا يضحكوا علينا
انا بقول الكلام ده لان فيه واحد في محل كاوتش ( مكانه بعد بنزينة شل في شارع مصر و السودان) حاول انه يعمل معايا الحركة دي و طلعلي 4 اخرام في الكاوتش , ولما قلتله يسيب الكاوتش زي ماهو و ينفخه و يركبه عمل كده فعلا و دلوقتي الكاوتش بقاله 3 ايام وهو زي ماهو منقصش ملي , وابن الذين كان خلاص هايخرمهولي بالشاكوش والمسمار عشان يعلم مكان الاخرام الوهميه اللي مطلعها ويبوظلي الفرده و هي لسه جديده
ياريت يا جماعه ناخد بالنا من النصابين دول , وفعلا بلاش نصلح الكاوتش عند اي حد . لازم واحد نكون عارفين انه عنده بواقي ضمير مش زي العالم اللي ضميرها مات من زمان دي وماشيه تنصب على الناس و تبوظ كاوتشاتهم الجديده