الموضوع: خبطلي العربية فا عزمته عالغدا !

انهاردة حصلي موقف غريب جدا

العربية مركونة تحت البيت عادي جدا .. دخلت اخد دش .. اول ما طلعت من باب الحمام سمعت صوت " تك تك تك تك تيييييييييييييييييييت " .. خبطات متتالية يليها صوت إنذار العربية .. طبعا انا قلت من الصوت ده العربية ضاعت .. ببص من الشباك لقيت تاكسي شاهين .. رحت لابس اي كلام .. و واخد معايا اليكتريك شوك بتاعة واحد صاحبي كان سايبها بالصدفة .. و طبعا متوقع اللي هيحصل مقدماَ ( سواق تاكسي ! ) .و اللي يغيظ ان العربية قدامها مساحة تعدي خمس عربيات بالعرض !! يعني لا يمكن يخبطها الا لو متخلف عقليا او اعمي او قاصد !

أول حاجة اللي استغربتله انه وقف .. بصيت عالعربية .. الإكصدام كله اتكحت تكحيت بشع و المرايا اتكشط منها حتة و الرفرف .. قلت و الله لو بجح لا احطله الاليكتريك شوك في عينه !! ببص جوة التاكسي .. لقيت السواق مغم عليه !! انا اتخضيت .. فتحت الباب و حاولت افوق فيه .. الراجل فتح عينه .. و نزل من التاكسي بالعافية .. و قام واقع عالأرض تاني .. دخلته مدخل العمارة و حاولت افوق فيه .. بقوله انت بتشتكي من حاجة ؟ قاللي انا عندي السكر .. خليت البواب جابله شوية مية بسكر و خد نفسه شوية .. الراجل كان بقاله يومين مكالش و هو عنده السكر أصلا .. و اما لقي نفسه هيموت من الجوع راح لواحد عنده عربيات تاكسي يشتغل علي واحدة فيهم و أول يوم يطلع انهاردة .. بعت جبت سندوتشات من محل فلافل كدة جنبينا .. و كلمنا صاحب التاكسي .. جالنا راجل كبير كدة محترم .. انا كنت متوقع يبهدل السواق .. بس هو قعد يسأله انت كويس ؟ طب محتاج تروح مستشفي ؟ و قاللي اللي حصل في العربية ده عندي انا و اللي تؤمر بيه .. انا استحرمت اخد فلوس بصراحة لأن الموقف كان غريب و صعب .. يعني مقدرش اقول ان الراجل غلطان ولا قادر اقول انه خلي من الغلط بس الحمد لله انها جت علي قد كدة احسن ما كان خبط بني ادم ولا حاجة ..

حسيت بعد الموقف ده بمشاعر متضاربة كتير .. يعني الناس خلاص فعلا فيها ناس بتموت من الجوع بكل ما تحويه الكلمة من معاني .. و اما بتحاول تاكل عيش بأي طريقة ممكن تسبب خسائر كتير لناس تانية قد تصل لأنها تكون خسائر في الأرواح لو الراجل ده كان جتله نوبة السكر و خبط بني ادم لا قدر الله .. حسيت برده اني زعلان عالعربية لأن انا مليش ذنب في كل ده .. و حسيت ان الدنيا لسة فيها خير من صاحب التاكسي اللي مكانش كل اللي هامه ان التاكسي اتخبط او انه ممكن يتدبس في تصليح عربية تانية .. و حسيت ان الواحد لازم يطول باله و يعذر الناس و ميتسرعش في رد فعله لأن فعلا الظروف بقت صعبة .

أسف عالإطالة

ربنا ياجرك في مصيبتك ويخلف لك خيراً منها يا محمود
وربنا يجزيك خير ان شاء الله على اللي عملته