الدليل في التعامل مع مراكز الخدمه خلال الضمان
صباح الخير و كل عام وانتم بخير
حبيت انقل خبرتي في التعامل مع مراكز الخدمه بحكم اني مغير 8 عربيات زيرو عشان عادة بابيع في خلال 3 سنين
اول نصيحه ابعد نهائي عن يوم السبت
طبعا عارفين ان الشعب المصري كله اجازه السبت و بيستخصر يروح وسط الاسبوع و يخصم من رصيد اجازاته يوم فالتوكيل بيكون زحمه وصباح الكروته اللي في الدنيا و كل اللي هيتعمل لعربيتك زيت و فلتر فقط يعني اللي يمشيك الا لو هيركب قطعة غيار و هيكسب فيها و الموضوع ده عن تجربه لما ربطت العفشه بره التوكيل بعد الصيانه و اكتشفت ان عمر ما حد جة جنبها اساسا من الزيرو
ثانيا صمم على حل المشكله
انت الوحيد اللي فاهم عربيتك اكتر من الصنايعيه يعني لو حاسس بعيب و طلبت تصليحه و طبعا بما ان العربيه ضمان فالتصليح هيكون مجاني و ضياع وقت بالنسبه للتوكيل فسوري في اللفظ هيلبسوك السلطانيه و العربيه زي الفل و حل الموضوع ده انك تكون محدد سبب المشكله مسبقا لو لك خبره او توريها لميكانيكي ثقه يكشف فقط عشان يأكد العيب من غير ما يصلحها
مثال
كنت بحس برجرجه في الفرامل بعد ال 120 وطلبت الاصلاح اتقال لي في التوكيل ان ده عادي و للاسف بعض ملاك العربيه اكدوا ده عشان التيل بيسخن على السرعات العاليه فطلعت في دماغي اغير طنابير في الضمان رحت في التوكيل و شديت في الكلام و فهمتهم اني مش هسكت تاني قالوا لي طب نجرب نخرطها الاول و نشوف اللي هيحصل و الفرامل اتصلحت اخيرا طب ما كان من زمان
ثالثا ادخل الورشه وبص على عربيتك و اكشف بنفسك
طبعا البشوات ياخدوا العربيه الورشه و ممنوع دخولك و مش فاهم ايه النظريه في كده لو بيعملوا شغلهم مظبوط المهم حل الموضوع ده انك تتلكك انك عايز تبص على العربيه من تحت عشان تتطمن عليها من البلاعات فمش هيمانعوا اول حاجه هتاخد نظره سريعه عن اللي بيحصل تاني حاجه تبص بعينك على العفشه و المساعدين و ده لسه عامله امبارح و كنت بشتكي ان العفشه ورا بايظه قالوا سليمه دخلت بصيت طلع ان المساعدين ورا غرقانين زيت و ما اترفوش برضه غير لما كحته بأيدي قدامهم راحوا مغيرنهم ضمان بدون كلام مع العلم ان العربيه كانت لسه عندهم من شهر بتعمل صيانة ال 30 الف و طبعا صباح الطناش
ارجو اني اكون افدتكم