تزبيط الفيرنا للاستعداد للشتاء

**aymn6666** · 30-10-2012 09:04 PM

طبعا لازم نهتم بحجات معينه استعداد لفصل الشتاء
اول حاجه المساحات
كلنا بنشتري مساحات جديده بس المقاس اهم حاجه طبعا الفيرنا فيها مساحه كبيره مقاس 20 والتانيه مقاس 18
لما نجي نجيب نغير المقاس لاكبر
حنشتري واحده مقاس 22 والتانيه 20 من النوع الكوتش سعر المساحه 10 جنيه
حتقولولي المقاس ده كبير لئه مش كبير ده افضل مقاس لازاحه اكبر كميه مياه من علي الزجاج
وانا مركبه وادي الصور

ودي صوره والمساحات شغاله وباين طبعا واخده اكبر مساحه ممكنه من الزجاج

كده تمام خليصنا من المساحات
--------------------------------------------
نخش علي موضوع المياه
طبعا في ناس بتحط ميه بس في قربه المساحات وناس بتحط ميه وصابون
بس الميه لوحدها مبتعملش حاجه والصابون بيجير علي الزجاج
انا بحط المنتج ده

بشتريه من- كارفور- الزجاجه ب2:50 جنيه القربه حتاخد 4 زجاجات اول مره يعني 10 جنيه
ميزته بينضف الزجاج كويس ومبيسبش اثر عليه ورخيص
طبعا حنفضي القربه الاول عن طريق تشغيل دراع الرشاش لحد القربه متفضي
وبعدين نفضي المنتج
كده تمام خليصنا من المياه
--------------------------------------------
نخش علي الهويات الي بتركب علي البيبان ودي شكلهامن الخارج

ومن الداخل

ودي انا بعتبرها من اهم التجهيزات للشتاء
ليه
اولا حتقدر تبقي مهوي الزجاج من غير متخش ميه
ثانيا حتستريح من تشبير الزجاج الامامي
انا عارف ان الفيرنا ليها سخان علشان التشبير للزجاج الخلفي
ومخرج هواء سخن علي الزجاج الامامي
طيب ليه وجع الدماغ تشغيل السخان حمل علي البطاريه
والهواء السخن لازم تشغل وضع التكيف علي السخن وتغير وضع فتحات التكيف علشان الهواء يطلع علي الزجاج الامامي
وبعدين العربيه تبقي سخنه من جوه وتضطر كل شويه تطفيه وتشغله(وجع دماغ)
انما مع الهوايات حتهوي الزجاج فقط
سعرهم انا شاري المصري ب45 جنيه
وفي الكوري ب65 جنيه وشكلها حلو
وممكن ترشها لون العربيه او تعملها كاربون فايبر حتبقي تحفه
----------------------------------------
نجي لموضوع ظبط فتحات رشاش المياه بتاع الزجاج الامامي
وده سعات مبيبقاش مظبوط وتلاقي الميه بتروح علي سقف العربيه وسعات بتغرق الزجاج الخلفي
انا مره ماشي لقيت ميه علي الزجاج الامامي فكرت الدنيا بتشتي مع اننا في الصيف
طلعت العربيه الي قدامي
حنحتاج علشان نزبط الفتحات دبوس ابره رفيع واي حد جو العربيه يشغل دراع الرشاش
وحنخليه يشغل الرشاش وانت دخل الدبوس داخل الفتحه وحرك الرشاش لحد متزبط خط المياه علي الزجاج ولازم تراعي ان ال6 رشاشات متوزعه علي الزجاج
===============================================
يارب الموضوع يعجبكم

**drmagieed** · 30-10-2012 09:30 PM

تسلم أيه الجمال ده!!!

**M.Ayman** · 30-10-2012 10:12 PM

موضوع رائع فعلا و مش للفرنا بس ده عموما لكل العربيات بس سؤال بسيط بالنسبه للمياه بتاعت الرشاشات انت بتملاها كلها من المنتج ده عشان انا كنت فاهم انها مياه عاديه عليها نسبه من الجلانس مثلا او المنظف ده ثانيا موضوع هوايات الزجاج انا معاك انه عملي فعلا بس شكله وحش قووووي يعني اظن ان اهون علي الواحد يوارب سنه بسيطه من الزجاج تدخل هوا مثلا عن ان الواحد يعملها ،،،، طبعا عارف ان الموضوع اذواق انا بقولك رأيي مش اكتر :)

**aymn6666** · 30-10-2012 10:25 PM

المشاركة الأصلية كتبت بواسطة mshmshm3

تسلم علي الموضوع الجميل بس انا مختلف معاك في حاجة المساحة ال 22 طالعة برة الازاز بس حلوة انا غيرت المساحات اللي جاية مع العربية لما الجلد بتاعها اتقطع و جبت الشكل التاني غير اللي عندك بس لما اجي اشغلها بتعمل صوت علي الازاز . اللي انت جايبها بتنشف زي اللي بقولك عليها ؟

تاني حاجة بالنسبة للهوايات لو عايز اجيبها و اعملها كاربون بتتجاب جاهزة ولا بجيبها و بعملها عن اي حد بتاع اكسسوارات

غير كدة قوايم الباب عندك لونها سيلفر بلون العربية انا اول مرة اشوفها بلون العربية عندي لونها اسود

بس بجد مجهود فوق الممتاز و الرائع اتعلمت منك حاجات كتييييييييييييير

هي طلعه بالظبط نص سم مش كتير يعني بس في مقابل الاداء مش مشكله
موضوع نشفان المسحات راجع لانك اكيد بتركن في الشمس كتير والشمس هي الي بتعمل كده
انا عندي جراج فالعربيه بعيد عن الشمس وبعدين كل فتره بدهن كوتش المساحات فزلين علشان يفضل طري ولما بحطها في الجراج برفع المساحات
الهوايات لونها عسلي وانت ممكن توديها لبتاع مستلكات ويجلدها كاربون فايبر بس قبل متركبها علشان يظبطها كويس

القوايم عندي فضي علشان تقريبا هاف اوبشن انما الكامله بيحطو استيكر اسود (كوسه)

محنا هنا في المنتدي علشان نفيد بعض

**aymn6666** · 30-10-2012 10:31 PM

المشاركة الأصلية كتبت بواسطة bor3ey

موضوع رائع فعلا و مش للفرنا بس ده عموما لكل العربيات بس سؤال بسيط بالنسبه للمياه بتاعت الرشاشات انت بتملاها كلها من المنتج ده عشان انا كنت فاهم انها مياه عاديه عليها نسبه من الجلانس مثلا او المنظف ده ثانيا موضوع هوايات الزجاج انا معاك انه عملي فعلا بس شكله وحش قووووي يعني اظن ان اهون علي الواحد يوارب سنه بسيطه من الزجاج تدخل هوا مثلا عن ان الواحد يعملها ،،،، طبعا عارف ان الموضوع اذواق انا بقولك رأيي مش اكتر :)

انا بملا القربه كلها من المنتج ده وانا القربه عندي بتاخد تقريبا 3ونص لتر وبيفضل معايا نص لتر بزود بيه بعد كده
فعلا ذي مبتقول الموضوع ازواق بس هي فوائدها كتير
ورئيك علي راسي من فوق