الموضوع: ماتيجي نتناقش في موضوع البنزين

السلام عليكم ورحمة الله وبركاتة
انا فاتح الموضوع ده علشان نتكلم في مشكلة ارتفاع سعر البنزين ونحسب الموضوع من جميع الجهات
اول حاجة هما عيزين يشيلو الدعم عنة طيب ده صح ولا غلط انا شايف انة صح وعين العقل بس بشروط
طيب لية صح هقولك لية
لأن الحكومة بتدعم الوقود للمواطن المصري - طيب كلام جميل
دلوقتي اية بقي اللي بيحصل
لما واحد راكب عربية سياحة معفية من الجمارك ويحط بنزين مدعم يبقي ده بيسرق فلوس المواطن العادي
لما واحد راكب عربية جمرك يعني هو مش مواطن مصري اصلا وبيحط مدعم يبقي كده بيسرق كل مواطن مصري
لما واحد راكب عربية هيئه دبلوماسية او سياسية ومش دافع عليها لا جمرك ولا يحزنون ويدخل يمون يبقي باردو بيسرق كل مواطن مصري

يبقي لازم نشوف حل بالعقل كده
دلوقتي يقولك هلغي الدعم عن بنزين 95 علشان ده بتاع الأغنية
طبعا تفكير سيء ومتخلف جدا - لية بقي؟ هقولك لية!
دلوقتي في عربيات مواطنيين مصريين بتحتاج بنزين 95 صح ؟ طبعا صح !
هتقولي بقي دي عربيات غالية والكلام ده !!!
هقولك طيب ما هو مصري زية زيك يبقي زي ما انت بتاخد هو كمان ياخد
بالعكس ده علشان راكب عربية غالية بيدفع ضلاايب وجمارك بالألافات يمكن بيدفع اكتر من فرق دعم البنزين لية !!
يبقي هو حط فلوس في خزنة الدولة يساعدك بيها وانت عايز تحرمة من حقة !!
بالعكس كمان لو اتكلمنا عن التكلفة الفعلية في ارض الواقع هتلاقي المواتير اللي بتحتاج 95 استهلاكها للبنزين اقل وكمان نسبة التلوث فيها اقل (مش ده موضوعنا بس حبيت الفت النظر)
يبقي الراجل ده زي ما بيدفع جمارك وضرايب يبقي من حقة بنزين مدعم سواء بقي 80 ولا 92 ولا 95 حتي
هتقولي طيب والميكروباص والعربيات النقل للسولار دي عربيات للشغل يعني بيكسب من وراها هقولك عندك حق دي لازم باردوا نتكلم فيها بس نبص من اهم جانب ان السولار لما يغلي هيأثر علي اية
تعالي اقولك هيأثتر علي ايه (المواصلات هتزيد - الأكل هيزيد - الدواء هيزيد - كل ما يحتاجة الأنسان في حياتة هيزيد)
لية ؟!! علشان الحاجات دي بتتنقل يبقي سعر النقل هيزيد (يبقي انت دفعت المواطن المصري فرق الدعم من جيبة)

طيب والحل!!!

هقولكم انا بقي الحل اللي بقترحة وتمني انة يتنفذ ويارب يكون حتي مساهمة من فكرة ليه في حل مشاكل الدعم

بص يا سيدي الواحد لما كان بيركب غاز في عربيتة بالقسط كان لما بيدخل يمون بيبقي معاه كارت
لما يمون مثلا ب 6 جنية يدفع قدامة قسط 6 جنية
طيب يا عم احنا مالنا ومال الغاز
يا عم استني بقي ماتستعجلش

دلوقتي اية المانع ان مع كل رخصة عربية (أو رخصة العربية نفسها) تكون ممغنطة
طيب وبعدين
لما حضرتك تدخل تمون تحط الكارت او الرخصة في الماكينة وقتها بقي يتحسبلك البنزين بالسعر المدعم
لأن رخصتك او الكارت بتاعك يثبت انك مصري وليك حق الدعم
لكن لو عربية سياحة ولا جمرك ولا هيئة مش هيبقي معاه الكارت ده او رخصتة مش ممغنطة علي الدعم
ودا كمان هيساعد في موضوع مهم جدا جدا جدا
وهو سرقة البنزين وبيعة في السوق السودا !!
طيب ازاي يا عم !!
هقولك ازاي
دلوقتي البنزينة بتاخد حصتها من البنزين واول ما تفضية او قبل ما تفضية بتبيعة كلة بالسعر اللي عايزاه
طيب وبعدين
هقولك بقي دلوقتي البنزينة اللي تاخد حصتها مثلا لو 10.000 لتر
نيجي بقي نحاسبة ونشوف كام عربية دخلت ومونت قد اية ويبقي كده ضمنا انها باعت البنزين ده للناس يارب تكون الفكرة وضحت وتكون فكرة جيدة لحل مشكلة الدعم علي البنزين
انا عارف انها ممكن تبقي مكلفة شوية بس مهما كان هتوفر كتير لقدام وكده الدعم يوصل للي محتاجة بجد