الموضوع: صيانة 5ألآف لاكسنت ار بى هيونداى العبور

السلام عليكم,,,,
تقرير صيانة ال 5 الاف لاكسنت ار بى فى فرع هيونداى ك22 طريق مصر الاسماعيلية الصحراوى:
بداية انا كنت حاجز عن طريق الخط الساخن (16661) يوم 24-10-2012 عشان اروح يوم الثلاثاء 30-10-2012 على الساعة 10 صباحا
طلعت من بيتى بدرى شوية وصلت هناك 9.20 قابلنى الامن على البوابة
الامن:اتفضل يا فندم
انا:الصيانة لو سمحت
الامن:اتفضل من هنا (ودخلت من البوابة لقيت الفنى واقف على الباب بيقولى اركن العربية بضهرها ووشها لقدام بين الخطوط الصفراء اللى مرسومة على الارض وانا عملت زى ما قال)
نزلت ودخلت الريسبشن
انا:لو سمحتى (لموظفة الاستقبال) عاوز اعمل صيانة ال 5 الاف لعربيتى
الموظفة:فى حجز يا فندم ؟
انا:اه ب اسم كذا
الموظفة:قطعت لى بون برقم (32) وقالتلى استنى جنب عربيتك برة
الساعة كانت وصلت 9.40
وقفت حنب عربيتى 10 دقايق لحد ما المهندسة (ميادة رشاد) ندهت على رقمى وانا رفعت ايدى فى اشارة ان انا اهو
المهندسة بلهجة استنكارية غريبة: مالها العربية
انا بلهجة استعباطية اكتر:تعبانة وفيها مشاكل كتير
المهندسة:الاول هات رخصة العربية ( وسجلت بيانات العربية) خير اتقضل
انا: اولا دى صيانة ال 5 الاف
المهندسة (من غير مقدمات): مفيش زيت شل الترا 5 الاف هنحط ال 10 الاف وده الافضل بالنسبة للعربيات الجديدة
انا: انا عارف كدة حضرتك على الرغم من انهم حطولى فى صيانة الالف (فى فرع قليوب) زيت 5 الاف
المهندسة:اكيد انت اللى طلبت كده
انا: لا يا فندم ماحصلش هما اللى عملو كدة من دماغهم
المهندسة وهى بتبص لى بصة فيها استنكار واضح:الزيت ب 295 جنيه المصنعيات ب 160 جنيه والضريبه حوالى 40 جنيه يعنى هتدفع 500 جنيه ماشى؟ (ده كلو وهى معها شيت بتكتب فيه كلى اللى قالتو بالاسعار)
انا: ماشى يا فندم
المهندسة:هات المفاتيح (وبعدين ركبت العربية ودورتها وفتحت الزجاج الامامى للسائق والراكب الامامى)
المهندسة:ايه المشاكل التانية؟
انا:
1-المساعدين الخلفيين فيهم مشكلة جامدة وبيرزعو جامد فى المطبات والنقر ده غير ان العربية بقت بتحك فى اى مطب يقابلها
المهندسة وهى بتكتب المشكلة وكانها عارفة ان دى مشكلة عامة فى الاكسنت موديلات 2011 (اه انا نسيت ان اقول ان عربيتى موديل 2011): اه المساعدين ايه كمان ؟
انا:
2-الكلاكس صوته اتنبح من كتر استهبال الناس فى السواقة (الكلاكس صوته شبه اختفى)
المهندسة وهى بتجرب الكلاكس: اه فعلا (وكتبت تغيير الكلاكس فى الشيت اللى معاها) ايه كمان؟
انا:
3-سماع صوت خبط وطقطقة من ورا من عند الاكصدام والعجل الخلفى
المهندسه: ده تبع المساعدين ايه تانى ولا كفاية كدة ؟
انا: لا لسه بدرى حضرتك
انا:
4-رائحة كريهة عند بداية تشغيل التكييف
المهندسة: هنشوف لو الفلتر باظ هنغيره لو لسه فيه امل هنضفه
انا: ماشى حضرتك
انا: فيه مشكلة تانية متعلقة بالتكييف
المهندسة: ايه ؟
انا: حدوث رجرجة فى العربية عند تشغيل التكييف
المهندسة وهى بتبص لى باستنكار: يعنى ايه الكلام ده ؟؟!!
انا: زى ما قلت لحضرتك يا فندم وممكن حضرتك تجربى التكييف بنفسك دلوقتى
المهندسة وهى فاتحة باب السائق والزجاج الامامى للسائق والراكب الامامى وجالسة مكان السائق وفيه دوشة كتير حوالينا: اهو التكييف اشتغل مش حاسة ولا سامعة حاجة
انا: لا حضرتك مش هتحسى بيه غير لما تقفلى الباب والشبايبك وفى مكان هادئ نسبيا
المهندسة وهى بتحاول تقصر الكلام: انا مش مقتنعة بالكلام ده بس هكتبه ونشوف ايه الموضوع
انا: ممكن بس حضرتك حد يبص على قواعد الموتور
المهندسة: لا تعليق
انا:
5-العربية غير ثابتة على السرعات العالية
المهندسة: العربية بتغربل منك على السرعات العالية؟
انا: اه
المهندسة وهى بتكتب بعصبية بعد ما زهقت منى خالص: ترصيص ودى كمان 50 جنيه ترصيص
انا: حضرتك حد يتاكد بس قبل ما تعملو الترصيص
المهندسة: اوك
انا:
6-تزييق فى الباب الخلفى يمين وفى الشنطة
المهندسة: مش عندى ده حضرتك تروح الهايكل بعد ما نخلص
انا: اوك
انا تانى: مياه المساحات فارغة والفرامل ضعيفة لحد ما
المهندسة كتبت ده والشيت خلص خلاص
المهندسة: كفاية كدة بقى ونزلت من العربية
انا: على فين حضرتك؟
المهندسة وهى مش طايقانى خالص مش عارف ليه: هبص على العربية من برة
نزلت المهندسة ولفت حوالين العربية وفتحت الشنطة(انا كنت شايل كل حاجة من العربية)
المهندسة: هى العربية دى مفيهاش طفاية حريق؟؟!!
انا بينى وبين نفسى هتعملو بيها ايه مش عارف: لا سيبتها فى الجراش
المهندسة شافت خبطة بسيطة فى الباب الخلفى يمين وقالت: خبطة اهى( زى ما يكون انا مش عارف مثلا) وسجلت عندها فى الشيت ان العربية مخبوطة فى المكان الفلانى
الساعة كانت وصلت 10.10
المهندسة: الاستلام الساعة 2 ظهرا
انا: ايييييييييييييييييييييييه
المهندسة:العربية فيها شغل كتير
انا: ممكن بدرى شوية بس عندى مواعيد تانية حضرتك
المهندسة: لما تخلص هنقولك,,,, اتفضل فى الاستراحة
انا :اوك
اه بالمناسبة العربية كانت داخلة الصيانة وهى مش نضيفة خالص بقالها فترة مش بتتنضف بسبب ظروف عندى يعنى العربية كانت متبهدلة من برة و من جوة
انا بعد كدة دخلت الريسبشن وطلعت فوق فى الاستراحة وقعدت قدام الشباك استنى العربية
بالمناسبة الاستراحة مكان نضيف جدا وطلبت فى الاول شاى وبعدين من كتر الزهق نسكافيه وكمان شوية قهوة سادة!!
المهم العربية دخلت على الساعة 10.20 والفنى سابها ومشى ده بعد ما كان ركب على كرسى السائق كيس بلاستيكى حماية من الاوساخ
الفنى رجع يشتغل فى العربية على الساعة 10.40
العربية اترفعت والكبوت اتفتح وفك الاربع فرد وحطهم على نقالة ودخلهم غرفة العمليات شكله كده عشان ما رجعش بيهم غير الساعة 11.30
ركبهم تانى وربط العفشة ونزل العربية على الساعة 12 ظهرا
انا قى الوقت ده روحت اصلى الضهر فى مصلى الرجال فى اول الاستراحة
رجعت ليقت العربية فى مكان عمل تانى
لقيت الفنى بيغير الزيت والفلتر
نادو على رقمى الساعة 12.50 ظهرا
نزلت تحت الاستقبال روحت على رقم الشباك اللى نادو عليا فيه لقيت موظف ماسك امر الشغل والفواتير والكلام ده وبيشرحلى ايه اللى حصل فى الصيانة
قالى تم تغيير الزيت ب زيت شل هيلكس الترا 10 الاف كيلو وكمان غيرو الفلتر
تم تربيط العفشة
تم تنضيف قلتر التكييف
تم تغيير الكلاكس
وقالى: مشكلة الرجرجة لما بشغل التكييف ان كلو تمام ومفيش اى مشكلة
وقالى كمان ان المساعدين الخلفيين عاوزين يتغيرو بس هما مش موجودين دلوقتى فى التوكيل
انا: طب وبعدين؟؟
الموظف: روح حضرتك ادفع ولما المهندسة ميادة رشاد تيجى هتشرحلك !!
روحت على الشباك اللى هدفع فيه
الموظف ( من غير ولا سلام ولا كلام): فيزا ولا كاش
انا: كاش
الموظف:طب اتفضل استنى 5 دقايق
انا روحت قعدت يجى بتاع 10 دقايق والموظف عامل انه من الصين ولا سأل فيا
لمحت المهندسة ميادة عند الاستقبال
روحتلها شرحتلى نفس كلام الموظف وقالتلى للاسف المساعدين مش موجودين
انا: حضرتك هى دى مشكلة عامة فى الاكسنت ار بى ولا ايه ؟؟
المهندسة: لا الموديلات ال 2011 بس كانت نازلة ب مساعدين سوفت ولما منفعتش فى طرق مصر الموديلات الجديدة نزلت ب مساعدين هارد
انا: طب ايه الحل؟
المهندسة: حضرتك تستنى لما المساعدين يتوفرا ورقمى اهو (كتبتلى رقمها) ابقى تابع معايا بس هتستنى شوية عشان بقالهم 3 اشهر مفيش مساعدين بتيجى بس لو هتتصل بلاش الصبح بدرى يعنى بعد الساعة 12 عشان الزحمة وكمان بلاش الخميس والجمعة
انا: اوك (مضطر استنى هعمل ايه)
روحت تانى للشباك اللى هدفع فيه لقيت الموظف بيبصلى كانه اول مرة يشوفنى وعامل نفسه من الصين بردو وبيقولى:
نعم خير حضرتك !!
انا: عاوز ادفع عشان امشى (والمفاجاة لقيته ماسك البلاك بيرى وهاتك يا تشات معرفش مع مين وورقى زى ما هو معملش فيه حاجة)
الموظف: استنى 5 دقايق وهنادى عليك
انا: فات اكتر من ربع ساعة من اول 5 دقايق !!
الموظف: اجراءات يا فندم !!
انا بينى وبين نفسى: اجراءات البلاك بيرى
استنيت كمان 10 دقايق لحد ما البيه خلص وروحت دفعت وكمان مش معاه فكة وقعد يدور على فكة يجى بتاع 10 دقايق وختم كتيب الضمان بالصيانة
التكلفة الاجماليه للصيانة:
فلتر: 26 جنيه
زيت: 240.91 جنيه
مصنعيات: 90 جنيه
ضريبة المبيعات: 35.70
الاجمالى: 392.61
الساعة كانت 1.40 ظهرا
خرجت من البوابة عشان استلم العربية لاقيت واحد قاعد اديته الفواتير المختومة قالى ثوانى هروح اجيب لحضرتك العربية
العربية وصلت الى ما قبل بوابة الخروج اللى مقفولة بسلسلة حديدية ضخمة
طبعا العربية لقيتها طالعة وسخة زى ما دخلت بقول للراجل اللى جابها هى مش المفروض العربية بتتغسل
قالى: المغسلة بايظة
لقيت جركن الزيت الفاضى مرمى على الدواسة فى الارض
ولقيت اجزاء من التابلوه متسخة قليلا بمادة سوداء اللون قلت مش مشكلة تنضف بعدين المهم انا عاوز اخلص عشان اطلع من هنا
موظف الامن على البوابة: رخصة العربية لو سمحت (محسسنى ان انا سارقها مثلا)
انا: خد
الموظف: اتفضل وفتحلى السلسلة وخرجت من البوابة كانت الساعة 2.00 ظهرا,,,, يعنى داخل من الساعة 9.20 طالع 2.00 على ايه مش فاهم
طبعا ماروحتش على الهاياكل عشان تزييق الباب والشنطة عشان كنت اتخنقت وعاوز امشى

الملاحظات على الصيانة:
التكييف: الرائحة اختفت تماما مع تحسن فى الاداء مع شبه اختفاء ل الرجرجة اللى كانت بتحصل قبل الصيانة
العفشة: تم تربييط العفشة جيدا وحسيت ان العربية مسكت نفسها شوية بعد ما كانت بتتمرجح بيا لو طوبة صغيرة جت تحت اى فردة كاوتش
الكلاكس: تم تغييره بالفعل لكن صوته مش لذيذ عالى اه بس مش عاجبنى
صوت العربية يمكن قل شوية عن قبل الصيانة
مخنوق من المساعدين بردو بس مضطر استنى عشان ان شاء الله اغيرهم
ده كل اللى حصل بالتفصيل
اسف على الاطالة
السلام عليكم.