يا جماعة انا اول مرة اسوق اوتوماتيك, ممكن حد يقولي امتى استخدم زرار الأوفر درايف و النقلات 1 و 2 في الصني؟؟
عرض للطباعة
يا جماعة انا اول مرة اسوق اوتوماتيك, ممكن حد يقولي امتى استخدم زرار الأوفر درايف و النقلات 1 و 2 في الصني؟؟
طالما اول مرة تسوق اوتوماتيك يبقى اهم حاجة انك تنسى ان فيه حاجة اسمها زرار اوفردرايف ونقلة 2 ونقلة 1 فى العربية فى المرحلة الحالية لحد ما تتعود تماما على العربية، مانتاش محتاجهم نهائيا فى الوقت الحالى ، كل اللى انت محتاجه D علشان العربية تمشى لقدام،nعلشان تقف وr علشان ترجع لورا
اهم حاجة انك تتأكد ان لمبة الo/dفى التابلوه مطفية ، يعنى لما تدور العربية اللمبة بتنور وتفضل ثوانى وبعدين تطفى، لو مطفتش دوس زرار الo/d علشان تطفيها ، متمشيش بالعربين ولمبة ال O/d منورة فى المرحله الحالية، وكدة هو الجير بوكس هينقل بين الأربعة غيارات المتاحة حسب السرعة وحالة الطريق
بعد ما تاخد على العربية ، واؤكد بعد ما تاخد عليها علشان متشغلش حاجة وتنساها شغالة او تشغل حاجة فى وقت غلط ممكن تبتدى تعرف وفايد زرار الأوفر ونقلة 2 ونقلة 1
استخدام هذة الزراير وفوايدها كالتالى:
1-زرار الأوفر درايف يقوم بمنع الفتيس انه ينقل للرابع، يعنى لو انت دايس الزار بحيث ان اللمبة فى التابلوه منورة فمعنى كدة ان العربية هتنقل بين اول وتانى وتالت بس، وفايدته لو انت محتاج قيادة رياضية على سرعات متوسطة(أقل من 100) الفتيس مش هيروح للرابع وبالتالى هيفضل عزم العربية معاك واول ما تدوس على البنزين تلاقى استجابة العربية نشطة معاك ، اهم حاجة انك متنساش اللمبة منورة وتجرى كدة اكتر من 100 لأن كدة انت بتحرق على الموتور وبتاكل بنزين بدون داعى
2- النقلة 2 بتخلى العربية تمشى اول وتانى بس، وماتروحش تالت ولا رابع، وفايدتها الوحيدة انك لو عايز تكلبش العربية فى منزل ، او عايز عزم من العربية فى مطلع قاسى هتطلعة بالراحة، فقط انتبه تماما انك متنزلش من D الى 2 والعربية سرعتاه اكثر من 50 لأنك كدة ممكنت تخاطر بالفتيس كله
3-النقلة 1 بتخلى الفتيس يمشى على الأول فقط وماينقلش، ومعرفلهاش استخدام بصراحة ، بس ممكن لو طالع بالعربية على الحيطة مثلا وعاير عزم عالى جدا، بس مهم جدا جدا جدا انك اوعى تنزل من D او من 2 الى 1 والعربية ماشية، لو عايز تحطها على 1 حطها والعربية واقفة ،وزيه بالظبط ال R
انا ماشى بالعربية 15 ألف كيلومتر وطلعت بيها المقطم مرات عديدة وبرضه نزلت منه، ومع ذلك نادرا ما استعملت زرار O/d وتقريبا مستعملتش 2 غير مرة واحدة كنت نازل من جراج الأوبرا، اما 1 فعمرى ما استعملتها،
اخى سبعاوى معلش ليا استفسار
هل فعلا لازم كل ما اقف فى اشارة اجيب N ولا مش مهم اصل الفتيس عندى حارات و حاسس انى حبوظ السوستة من كتر ما بجيب N هل الكلام دة صحيح ولا انا خايف عليها زيادة :) و هل فعلا لازم اجيب N فى الأشارات ؟
لو العملية انت حاسس انها هتطول هات N، لو نص دقيقة وللا اقل خليك على ال D
شكرا لردك اخى سبعاوى
الف شكر يا سبعاوى باشا
أنا بستخدم الـ 1 لما أكون بشد مع حد بالعربيه و بجيب بعد كده الـ D بالطريقه دى بخلى طلعت العربية أفضل من انى أطلع على الـ D لأنى لما بضغط على دواسة البنزين جامد لما أجى اطلع و العربيه ماشيه على سرعة 20 مثلا أحيانا العربيه بتفضل مكمله على التانى و مبتجبش الأول فكده بضمن أنها تجيب الأول ديم
أهم حاجة تكون حذر لأن العربيه و هى على الـ1 ممكن لفات المحرك تدخل فى الـ red zoneا
استاذ سبعاوى
الاوفر دريف عندى لما بيكون مطفى اللمبة بتكون منورة مش العكس
طيب ماهو احنا مختلفناش، اللمبة لما تكون منورة بيكون الأوفرداريف off بالفعل، يعنى العربية مش بتجيب رابع
الأوفر درايف هو النقلة الرابعة (او الخامسة فى السيارات المانيوال) ومعنى ان اللمبة منورة ان الأوفر داريف مقفول ، يعنى العربية مش هتجيب رابع، وهو ده اللى انا قلته
لذلك انت لازم تمشى فى الظروف العادية واللمبة مطفية علشان تسمح للعربية تروح للرابع ومايفضلش الموتور يجعر على التالت لما تكون سايق 100 ألو اكتر
لو مش مصدقنى جرب تمشى واللمبة منورة وتعدى 100، هتلاقى الموتور جايب اكتر من 4000 RPM، دوس زرار الأوفر داريف فى اللحظة دى واطفى اللمبة هتحس كأن العربية خدت غيار أعلى وصوت الموتور هدى والRPM نزلت تحت ال 3000 ، ودة لأن العربية فى اللحظة دى نقلت من التالت للرابع
طيب أيه فايده ال N لما العربيه تكون واقفه وايه الفرق بينه وبين ال P