لو سمحت متمشيش عكس

**eng.m7md.ali** · 02-11-2012 03:39 AM

يوم الاربعاء الساعة 11 مساءاً
كنت قدام الميريلاند خارج من شارع السبق
لقيت في اول فاتحة فيسبا ماشي على الشمال عكس والظاهر كدة عايز يرجع للبنزينة بس مكسل يمشي شوية لقدام ويلف
فاقال استسهل وكدة كدة الشارع فاضي !!
عملت ايه انا بقى ؟؟
ماشي في اليمين خالص على سرعة 50 كدة ولمحت الباشا روحت فجأة قاطع الطريق من اقصى اليمين للشمال كأني هدخل فيه وعدلت العربية في اخر لحظة
رد فعل بتاع الفيسبا انه طار على الرصيف وساب الفيسبا توقع وانا كملت عادي
رد فعلي اني ضحكت بهستريا على منظره
نصيحة : بلاش تمشي عكس والا هتلاقي واحد رخم زيي يعمل فيك نفس الحركة دي

**prisoner** · 02-11-2012 03:51 AM

انت صح مليون فى المية ولكن افرض هوة حصله حاجة انا راى انك كنت توقفه وترجعه حتى لو بالعنف وانا معاك جدا انه يستاهل اكتر من كده بس لو وراه حد محتاج لشغله لما يتعور هايبقى ايه الموضوع يارب تكون فهمت قصدى صح واسف لتدخللى تحياتى.

**youssef_u** · 02-11-2012 03:54 AM

عليا النعمه انتا برنس ،،، بس هتلاقي الراجل عملها على روحه :d

**NineVision** · 02-11-2012 07:00 AM

والله انا مش مع الموقف ولا مع من يؤيدك
حرام عليك يااخى هى روح الناس بقت سهلة عندك
والله لو هو كان غلطان عشان ماشى عاكسى فانت هتكون غلطتك ايه تفتكر ؟؟؟؟؟؟؟ ومين فيكوا اللى هيكون غلطه اكبر والراجل لو كان وقع على دماغه ؟ ولو حد كان شافك وجرى وراك وقلبلك العربية
ومدام حضرتك جدع يبقا تقف بعد اما وقعته وتواجه مش تاخد العربية وتجرى
انا زمان كنت بسوق بايك وعارف يعنى ايه الوقعة حتى لو لابس السيفتى وحتى لو بكون غلطان بكون نازل مغلول وعاوز اكل اللى ودامى
والله انا خايف عليك وماتزعلش منى خايف ليجى اليوم الناس تضحك عليك زى اما انت ضحكت عليه وانت تكون فى اشد العون او المساعدة لحد وماتلقيش حد جمبك
اظن ديه مش اول مرة تعمل فصل بايخ مع بتوع الفزب
تقبل وجهه نظرى ارجوك

**m_adeleid** · 02-11-2012 07:16 AM

المشاركة الأصلية كتبت بواسطة prisoner

انت صح مليون فى المية ولكن افرض هوة حصله حاجة انا راى انك كنت توقفه وترجعه حتى لو بالعنف وانا معاك جدا انه يستاهل اكتر من كده بس لو وراه حد محتاج لشغله لما يتعور هايبقى ايه الموضوع يارب تكون فهمت قصدى صح واسف لتدخللى تحياتى.

طبعا انت صح يا مصطفي
بس كلنا ساعه الموقف المستفذ مش بنفكر بالهدوء و المنطق وممكن جدا نضر بعض
واللي بدأ بالضرر اللي ماشي عكسي من الاول و مش خايف علي نفسه او علي غيره
حخاف عليه اكتر من نفسه
اذن لا يصح الا الصحيح و نمشي مظبوط علشان منخشش في الحسبه الاخلاقيه دي
تصدقو يا جماعه اصعب جهاد مع النفس هوا كظم الغيظ بالذات لو كنت تقدر علي اللي قدامك
ده حتي اصعب من تبطيل السجاير(بمناسبه اني مبطل جديد)
ربنا يسترها علينا جميعا
امين

**dr.hazem** · 02-11-2012 07:24 AM

انت مفتري
هههههههههههههههههههه
خف عالناس شويه..
تحياتي

**m_adeleid** · 02-11-2012 07:27 AM

المشاركة الأصلية كتبت بواسطة ninevision

والله انا مش مع الموقف ولا مع من يؤيدك
حرام عليك يااخى هى روح الناس بقت سهلة عندك
والله لو هو كان غلطان عشان ماشى عاكسى فانت هتكون غلطتك ايه تفتكر ؟؟؟؟؟؟؟ ومين فيكوا اللى هيكون غلطه اكبر والراجل لو كان وقع على دماغه ؟ ولو حد كان شافك وجرى وراك وقلبلك العربية
ومدام حضرتك جدع يبقا تقف بعد اما وقعته وتواجه مش تاخد العربية وتجرى
انا زمان كنت بسوق بايك وعارف يعنى ايه الوقعة حتى لو لابس السيفتى وحتى لو بكون غلطان بكون نازل مغلول وعاوز اكل اللى ودامى
والله انا خايف عليك وماتزعلش منى خايف ليجى اليوم الناس تضحك عليك زى اما انت ضحكت عليه وانت تكون فى اشد العون او المساعدة لحد وماتلقيش حد جمبك
اظن ديه مش اول مرة تعمل فصل بايخ مع بتوع الفزب
تقبل وجهه نظرى ارجوك

برضو معاك حق في كلامك
بس اللي روح الناس سهله عنده مش الباشا لا الباشا التاني اللي راكب الموتوسيكل
هوا صعبان علينا دلوقت لانه وقع
طب غير كده وسيله انتقاله من بايك الي عربيه او نص نقل او مقطوره مع ثبات فكره علي انه يخالف وشوف الكوارث اللي بجد
وعلي فكره لو حتي عدي عليه و موته ولاحياخد يوم حبس لانه ببساطه ماشي في طريقه عادي جدا
شفت بقي ان التاني هوا اللي لاخايف عليك ولا عليا ولا علي اسرته و لا علي نفسه
اصل الموضوع ده بالذات شائك قوي بالنسبه ليا و بيحصلي كتير قوي في المشي العكسي و في كسر الاشارات برضو مش بعرف اسكت وعملت عشرات الحوادث قصد في اللي ماشي مخالف قدامي وعلشان محدش يفهم غلط اني بطبق القانون بايدي لا
الموقف بيكون مثلا ان اشارتي خضرا وكل العربيات اللي جايه في الاشاره التانيه واشارتهم حمرا ماشيين عادي جدا(والاشاره شغاله عادي مش بايظه) بقوم مكمل في طريقي عادي جدا وهكذا
وشويه تاني ارجع اقول افرض عملت في حد حاجه و ضميرك حيعذبك او لو حصلك حاجه و العيال والبيت
صراعات
اسف اني طولت بس اكبر مشكله في مصر هي المصريين

**AHMED_DINAMO** · 02-11-2012 07:50 AM

ايوه ايوه بحب انا الكلام ده ده انا مقضيها ف الكلاب البلدى لو مشيت عكسى حتى ههههههه

**Y a r i s** · 02-11-2012 08:31 AM

المشرع المصري يافندم حكم. علي بيخش عكس. شهر سجن وسحب رخص ست شهور على ما اتذكر .... عارف لييييييييييييييه !!!!

لان الي بيخش عكس ده ممكن يضيع حيات اسرة كاملة بغبائوا واستهتارواااااااا
مش عارف ومع احترامي لكل الي بيخش عكس .... ايه الفرق بينوا وبين الحيوااااااان .... الحيونات مافيش قانون يردعهم. لكن البني ادمين في قوانين. بتزبطهم والمفروض يكون ليه عقل يفكر فيه .... هيخس ايه يعني لو مشي محترم وفي السليم ... ده حتى دخولوا عكس دليل لعدم احتراموا مش بس لقواعد المرور. لأ ده دليل على انوا مبيحترمش البلد. كلها بالي فيها. وشايف كل الناس على جزمتوا ... وحاسس انوا مش عايش في بلد محترمة فيها قانون وليها رئيس .... لأ ده شايفها غابة او زريبة او مولد ملهوش صاحب لمجرد انوا دخل عكس فده دليل لعدم احترام الدولة بالي فيها ومفيش حد مالي عينواااااااا

فانا باعتبر. الي داخل عكس ده نوع من البطجة ، والاستهتار بحياة الاخريين. وحياة الناس المحترمة وتعريض حياتهم للخطرررر ... ومش فاهم انا هيخسر ايه ولا هيخس ايه لمن يمشي محترم ... ولا هيا دي الديمقراطية بالنسبهالووو انو يمشي بحرية بغض النظر عن حياة الاخريين ويخش عكس زي مايحلالوا ... وتحياتي

**m_adeleid** · 02-11-2012 08:38 AM

كان في واقعه شهيره ساعه لما حصلت عن رجل مصري اصطحب اسرته لألمانيا لتمضيه فتره من الصيف و زياره قرايبهم اللي هناك
و هناك اجر عربيه بما انه مطلع رخصه دولي
وكانوا الاسرتيين رايحيين رحله مع بعض في يوم
الراجل اللي جاي زياره دخل من دخله غلط وعرف انها غلط بعد حوال 100 متر او اكتر قليلا
بالنصاحه المعهوده و عدم احترام النفس قبل القانون رجع مارشدير علشان يصحح مساره
طبعا اتمسك
بصو بقي الجميل في الموضوع
مدفعش غرامه او مخالفه او اي حاجه
لا اتحول للقضاء
والقاضي بصو بقي حكم بايه
ههههههههه
عرضه علي دكتور نفسي اولا لتحديد قواه العقليه قبل ما يحكم عليه
هههههههههه
تخيلوا
مش مصدقين ولا ممكن ييجي في بالهم ان حد يمشي مارشدير في شارع المفروض المشي فيه اللأمام
(مش عكسي )

الموضوع: لو سمحت متمشيش عكس

LinkBack

أدوات الموضوع

عرض

لو سمحت متمشيش عكس - انشر الموضوع فى :

-

-

-

المواضيع المتشابهه

لو سمحت الناسى الى بتشتغل او بتفهم فى نطام الصوت ضرورى لو سمحت

لو سمحت

لو سمحت

لو سمحت

لو سمحت

الكلمات الدلالية لهذا الموضوع

المفضلات

المفضلات

ضوابط المشاركة