البطاريه بعد 1800 كليومتر ,شهر من استلام السياره
السلام عليكم ورحمه الله
سلامات على كل اعضاء المنتدى وكل حبايب اللوجان وملاكها , النهارده هحكلكم عن اول معامله ليا مع توكيل رينو اقصد طبعا (خدمه ما بعد البيع) امبارح رحت الشغل بعربيتى اللوجان الاتوماتيك عادى زى كل يوم سواقه هاديه لانى لسه فى مرحله التليين انما بقا اللى مش عادى انى على الساعه 3 ونص واحد من زملاء العمل كان عايزنى احرك عربيتى لانها قفله على عربيته فى الجراج بتاع الشركه رحت لحد الجراج وهنا حصلت المفاجئه ... !؟
ادور فى العربيه الاقى صوت زى تكتكه كده والعدادات تتحرك وترجع مكانها تانى وبس مفيش اى حاجه بتحصل اجرب تانى برضو نفس الموضوع يتكرر واتلموا زملائى فى العمل لمساندتى فى الموقف ده واخذت التحليلات تتوالى وكانت الاراء كالتالى :
شخصيه رقم 1: ياعم ده تلاقيه المارش اكيد هوا مفيش غيره
شخصيه رقم 2: بس يا برنس انا سواق وعارف ده كمبيوتر العربيه مهيس فك القطاش ورجعه وهيا تدور اسمع منى :driving:
شخصيه رقم 3: دى بطاريه او دينمو او دفيره الكهرباء يعنى ممكن تبقى حجات كتير بس انا مش عارف :cool(1):
ولاقين نفسى بين كل التحليلات دى محتاس اخر حوسه:01964E~163:
الهم واحد ابن حلال قالى هوا العربيه مش ليها توكيل كلمهم رحت كلمت التوكيل خدمه مابعد البيع
ردو عليا طب خليك معايا و هحولك للمهندس المهندس قالى دى البطاريه تعرف تاخد وصله وتيجى بيها نغيرهالك قولتله لا وبعدين انا خايف اجى جمبيها لتقولوا انى انا اللى بوظتها !!
قالى طيب هنبعتلك عربيه الورشه ... يا مسهل ودى هتجيلى على الساعه كام قالى على الساعه 5 ونص طيب كويس استنا ان حد يجى مفيش وبعدين انا قافل الجراج على كل زملائى انما هما على الساعه 6ونص فقدوا الامل وبدئوا يخرجوا من مدخل الجراج ودى حاجه عزاب فعلا المهم جت عربيه الورشه على الساعه 7ونص كده والحمد لله طلعت البطاريه هيا السبب وغيروها والعربيه دارت ومفيش اى مشكله
الدروس المستفاده:
المهندس قالى ان لو العربيه فيها قفله فى اى جهاز واخد كهرباء من مكان الولاعه والفيوز مضربش ممكن العربيه تدى نفس الاعراض يعنى متدورش برضوا رغم ان البطاريه هتكون سليمه فى الحاله دى
العربيات الاتوماتيك حسب كلام المهندس مينفعش تجبها على N وتقطرها لان ده فى خطر كبييير على الفتيس لان الفتيس المانيوال شغال بضغط الزيت ولاكن التروس بتاعته مش غرقانه فى الزيت زى الفتيس المانيوال
وده كل اللى حصل وفى نهايه الكلام سلام
