سؤال لأصدقائي ملاك السيينا ...

**misry** · 02-11-2012 06:40 PM

السلام عليكم ...

لو سمحتم يا جماعة أنا عندي كام سؤال كده أتمنى تجاوبوهم لي ...

1- هو ليه مافيش مواضيع عن diy لعربيات السيينا , يعني الحاجات البسيطة اللي ممكن نعملها
ومانروحش للميكانيكي أو الكهربائي ؟

2- ايه أفضل انواع لفيوزات السيينا لأني اشتريت نوع صيني والكهربائي قال لي وحش ... هل ده صح وايه أفضل نوع ..؟

3- لو حصل وما لقيتش الفيوز بالامبير المناسب , أحط فيوز أمبير أعلى ولا أقل من الاصلي ... يعني مثلا
لو المفروض أركب فيوز 10 أمبير وما لقيتش ... أركب 15 وللا 5 ...؟

4- المفروض اني لما ارفع دراع الاشارة يمين أو شمال انه يرجع لوضعه الطبيعي مع اعتدال الطارة , ده مش بيحصل عندي , فياترى ده سببه ايه ...؟

5- ياريت يا جماعة تعملوا كام موضوع كده عن اسماء وصور ووظائف كل قطعة في السيينا , زي مثلا
صورة الدينامو ومكانه واعطاله واعراضها واماكن السيور وهكذا ...

6- لو بتحصل صفارة أول ما ادور العربية , يبقى ده سير عاوز يتشد وللا يتغير ...؟

7- ازاي افك فرش الابواب وانضفها من جوه, لأني كل ما أدخل الزجاج وارفعه يبقى عليه تراب ...؟

8- أنا امبارح الحمد لله عملت السمكرة للجزء اللي كان مخبوط , هل ممكن اسيبها كده لأني مش عاوز
ارشها دلوقتي وللا في خطر ان المكان يصدي ...؟

9- انا عندي الكراسي متوسخة وجربت الفوم وما جابش نتيجة مرضيه ... ايه افضل طريقة لتنظيف الكراسي ..؟

10- هل في حاجة بتتباع ممكن انضف بيها الموتور بنفسي وللا أروح للكاركير أفضل ...؟

11- ادعولي ان العربية تبطل مصارف شوية علشان انا زهقت خلااااااص ...

**misry** · 03-11-2012 05:20 PM

معقول الاسئلة صعبة للدرجة دي ...؟؟؟

**misoalex** · 04-11-2012 12:25 AM

تنظيف العربيه والموتو رالافضل تروح لكار كير يعملهالك ويشيلك البقع اللى على الفرش
كان فيه عرض كار كير هنا فى المنتدى وعاملين خصم تقريبا
وفيه اسبراى فوم للموتور بس لازم تعمل بعدديه بهواء فى اى بنزينه فالافضل تروح لحد يعملهولك كله وخلاص

معنديش فكره الابواب بتتفك ازاى ياريت حد يفيدنا فى الموضوع ده
واللى اعرفه ان ابواب السيينا بلاس غير العاده

وبالنسبه للصفاره ممكن تبقى سير وممكن تبقى بليه لازم تروح لمكانيكى يبصلك عليها

ومكان السمكره طبعا لازم يترش لو مش عاوز ترشه روح لاى بتاع دوكو يحطلك عليه طبقه معجون تحميه
او انت اشترى برايمر من اى واحد بتاع حدايد وبويات وادهن بيه الصاج عشان يمنع الصدأ

موضوع الامبير بتاع الفيوز ده يفضل تجيب نفس الامبير وعموما فيه كارته كده فيها جميع الفيوزات من اول 5 امبير لحد 50 تقريبا والكارته كلها ب 3 جنيه تقريبا
وعموما لو انت مجبر تركب حاجه غير نفس الفيوز يبقى الافضل تركب قيمه اقل لان لو اعلى يبقى ولا كأنه ليه لزمه ممكن ميفصلش
واللى اعرفه ان كل الفيوزات اللى فى السوق صيييينى بس اللى بيبقى زى الشفاف ده كويس افضل من البلاستك العادى على الاقل بتشوف الفيوز جوه اتحرق ولالا

الزرار بتاع الاشاره ده المفروض يرجع بس مش فى كل الاحوال عموما ده شغل كهربائى هو حيفك الكاره ويبص على السوسته او الاوتوماتيك بتاعه بس يفضل يكون كهربائى شاطر عشان ميبوظش الدنيا

**misry** · 04-11-2012 02:21 AM

انا فعلا رحت النهاردة ومعجنتها علشان احافظ عليها ...

وبالنسبة للعفشة الراجل قال لي ان الدنجل لازم يتغير وما لقيتهوش في طنطا , انت تعرف الاقيه فين في الحرفيين

وهل له مقاس معين وللا اقول لهم انا عاوز دنجل سيينا وخلاص ...؟

---------------------------------------------------------------------------------------------------------------

أنا نفسي في مواضيع زي اللي في قسم الاوبل والسيات , دول بيعملوا تقارير رائعة ومفيدة جدااااااا

أتمنى انها تتعمل هنا ...

شكرا

**misoalex** · 04-11-2012 03:44 AM

المشاركة الأصلية كتبت بواسطة misry

انا فعلا رحت النهاردة ومعجنتها علشان احافظ عليها ...

وبالنسبة للعفشة الراجل قال لي ان الدنجل لازم يتغير وما لقيتهوش في طنطا , انت تعرف الاقيه فين في الحرفيين

وهل له مقاس معين وللا اقول لهم انا عاوز دنجل سيينا وخلاص ...؟

---------------------------------------------------------------------------------------------------------------

أنا نفسي في مواضيع زي اللي في قسم الاوبل والسيات , دول بيعملوا تقارير رائعة ومفيدة جدااااااا

أتمنى انها تتعمل هنا ...

شكرا

استاز محمد ابتدى يعمل سلسله من التقارير دى ربنا يجازيه خير

والدنجل بيتباع فى العزبه (عزبه شلبى ) استعمال وممكن فى الحرفيين
دور فىالمواضيع الى فيها عناوين واسماء بتوع قطع الغيار واتصل بيهم الاول بدل ما تيجى من طنطا على الفاضى ومتلاقيش لان ساعات مبيبقاش عندهم بضاعه

**misry** · 04-11-2012 04:14 PM

المشاركة الأصلية كتبت بواسطة misoalex

استاز محمد ابتدى يعمل سلسله من التقارير دى ربنا يجازيه خير

والدنجل بيتباع فى العزبه (عزبه شلبى ) استعمال وممكن فى الحرفيين
دور فىالمواضيع الى فيها عناوين واسماء بتوع قطع الغيار واتصل بيهم الاول بدل ما تيجى من طنطا على الفاضى ومتلاقيش لان ساعات مبيبقاش عندهم بضاعه

أنا عارف ان استاذ محمد ما شاء الله عليه عامل تقارير ممتازة

بس أنا نفسي في مواضيع زي :::

- ازاي انضف الرشاشات والبوابة

- ازاي اغير فلتر الهوا

- ازاي اغير الزيوت

- ازاي اطمئن على السيور والزيوت

- ازاي افك فرش الابواب وانضفها

وحاجات زي كده , بس ما ينروح للصنايعية ويبوظوا اكتر ما بيصلحوا ...

بالنسبة للدنجل فربنا يسهل بس ةهبقى آخد يوم في الحرفيين وعزبة شلبي وربنا يسهل ...

شكرا ...