استفسارات عن الفرونتيرا

**samehafez** · 10-07-2008 03:51 AM

يا جماعة كنت عاوز اعرف شوية حاجات عن الشيفرولية فرونتيرا موديلات لحد 98 اسعارها هتكون في حدود كام يعني في منها ديزل و لا كلها بنزين ؟؟
الناس اللي العربية معاهم يا ريت يقولوا مشاكلها ايه ...و اخبار اماكن الصيانة و الاصلاح ايه

و سؤال مهم الضرائب علي تجديد الترخيص بكام ؟؟؟

**Adham** · 12-07-2008 11:08 AM

بص يا سيدي الفاضل هل الفرونتيرا من 98 الى 2004 تجميع مصري (منصور) و كلها 6 سلندر حرف في24 صباب 3200 سي سي بنزين
و دي اسعارها حسب الموديل و حسب حالتها بالطبع
يعني من 80 الف و لغاية 145 الف

اما موديلات قبل 98 فدي بتبقى مستوردة و ليها اسماء متعددة و منها 3 مواتير 2 منهم ديزل 2400 سي سي و التاني 2600 سي سي و دي مش شايعه قوي في مصر و نادرة

و بتنزل تحت مسميات تانية برضة بنزين 3200 زي المصري

ايسوزو - روديو
هوندا - باسبورت
أوبل - فرونتيرا
هولدن - فرونتيرا (أستراليا)
فوكس هول - فرونتيرا (أنجلترا)

و في كل الاحوال هيه هيه نفس العربية بالضبط في كل حاجة والاختلاف مابيزيدش على العلامة عالشبكة و طارة الدركسيون حسب الماركة و بس

و خللي بالك ان كلهم شركة واحدة (جنرال موتورز) عدا الهوندا

و العربية دي شاسيهها و البودي أمريكي
و الموتور و العفشة أيسوزو (ياباني) بالكامل (يعني قطع الغيار للموتور و العفشة الأصلي بتبقى ياباني)

بالنسبة للضرايب الجديدة مش عارف انا لسة مجدد في فبراير بس اعتقد انها حاتبقى 1300 جنية تقريبا بدل ال650 جنية سابقاً

و عامة هي عربية متينة و معمرة و قطع غيارها في معظمها رخيصة خاصة فيما يتعلق بالبودي و العفشة (رخيصة جداً حيث انها مشتركة مع شيفرولية دبابة و ايسوزو نص نقل في حاجات) بس قطع غيار الموتور اغلى شوية

و عامة هيه متينة في البودي و العفشة وصالونها واسع و مريحة جدا و ناعمه و سحبها قوي و تكييفها قوي جدا

عيبها استهلاك البنزين 80 كيلو في الصفيحه جوة البلد
و 140 في السفر

و فية كذا موضوع هنا في المنتدى انا كنت كتب و رديت فيهم عن اسعار قطع غيارها و عن مميزاتها و عيوبها بالمقارنة بعربيات 4*4 تانية ممكن تبص فيهم

بس عامه قطع غيار العربية دي علشان مايشتغلوكش :
1- مالكش دعوه بالتوكيل (منصور)
2- تاخد قطع الغيار اللي محتاجها في ايدك و تلف على محلات قطع غيار الياباني و النص نقل و تقوللهم نص نقل ايسوزو او جيب ايسوزو قديم

و عامه شوف :الشرقاوي (جسر السويس) - محمد نصر ( ابن الحكم) - الصوابي (الخلفاوي)

و المتخصصين بقى :

اسوان (شامبليون)
ايسوزو سنتر (سكة الوايلي- الحدائق)
اميريكان توب (شامبليون)
عشم نوار (دمشق)
بس دول تلاقي الحاجة اغلى شوية (حاجتهم هيه هيه ساعات عند التانيين بس اضرب السعر في 3) بس فاهمين قوي و عندهم كل شيء ليها و معظمهم بيوزع قطع غيار اصلي للتوكيل

**samehafez** · 14-07-2008 07:26 AM

الف شكر ....و ربنا يخليك ... و لو حبيت ادور عليها ....سوقها اخبارة ايه ... يعني لو نزلت سوق الجمعة هلاقي منها و لا انا و نصيبي

**Adham** · 14-07-2008 01:30 PM

لا ماتلاقيش منها في سوق الجمعه و نصيحة لو لقيت ماتشتريش الا لو فعلا رخصة بأسم صاحبها و بيبعها بنفسة

العربيات دي ماتتباعش في سوق الميكانيكية و السماسرة

الاحسن شوف اعلانات سوق سيارات الاهرام (الجمعه)

و اكشف عليها كويس و انت بتشتري

بالذات الفتيس و الموتور(لأن اصلاحاتهم بتتكلف كتير و اي عيب تشوفه طفيف ممكن يكون كونترول يونيت مثلا او حاجة مش سهلة) و بالنسبة للصاج من برة مش مهم لأنة رخيص قوي يعني رفارف او كبوت متوفرين و ارخص من ال128 (الكبوت ب 240 و الرفرف ب 220)
يستحسن تكشف في منصور و انت بتشتري مثلا او في اي مركز خدمة بس يكون فاهم العربيات دي مش يتعلم فيها
و يسحسن ان العربية يكون معاها سرفيس هيستوري من التكيل يعني يكون صاحبها بيصونها في التوكيل و تشوف ملف الصيانة بتاعها من فواتير و خلافة معاه

و تحت أمرك في اي مشورة

**Adham** · 17-09-2017 01:12 PM

جروب الفرونتيرا عالفيس بوك فيها حوالي 500 عضو... انضموا لنا حاتلاقوا معلومات كتير مفيده وستيكر للجروب ومقابلات اعضاء وبيع وشرا قطع غيار و عربيات وبوستات ومعلومات فنيه عن الصيانه و قطع الغيار واماكن توافرها و الميكانيكيه اللي متخصصين فيها

https://www.facebook.com/groups/293083091114728/