الموضوع: تجربتي في شراء سيارة ابيزا 94

بسم الله الرحمن الرحيم
طبعا انا عايز في الاول اشكر كل رجالة المنتدي و ده عشان هما بجد ساعدوني كتير بعد ربنا و اصحابي في شراء السيارة المناسبة و الحمد لله
ثانيا
بعد قراءة اكثر من موضوع لقيت ان في اكثر من طريقة لشراء السيارة و الكشف عن السيارة و انا استقريت على شراء السيارة عن طريق المعارف او الانترنت و البعد نهائيا عن السوق لسببين اولهم : شراء سيارة مستعمله في حدود الرينج اللي كان معايا من 25 الى 30 يبقى لازم يكون معاكل صنايعي مضمون .. و انا لبست بسبب واحد في عربية مازدا 323 موديل 82 و خسرت 10 الاف جنيه بسبب الميكانيكي الثقة
.ثانيا معظم السوق تجار و سهل جدا انه يخدعك في الموديل القديم و في السعر .
ثالثا: النت بيوفرلك اكثر من موديل و اكثر من سيارة فبالتالي تقدر تبحث بشكل اكبر .بمعني بدل ما تسأل حد برينج كام تجيب عربية تقدر تبحث بالفلوس اللي معاك عن كل العربيات فبالتالي يكون واضح قدامك في رينج من 25-30 الف تقدر تشتري اي عربية ... اكسيل -ابيزا - اونو-بونتو... و في نفس الوقت تقدر تعرف العربية دي منتشر ة قد اية من نتيجة البحث فبالتالي تشوف المنتشر اكثر و دي كانت فعلا طريقة الشراء بفضل الله
الكشف عن السيارة : دي كانت المشكلة الاساسية و ده لاني معنديش حد يخدمني اووي في عملية الشراء و يديني راية فكان لازم اعتمد على نفسي عشان كدة قريت الموضوع ده كويس جدا و ابتديت اطبقه http://www.nilemotors.net/Nile/217973-a.html
لكن اقسمت اني مش هشتري العربية غير لما اكشف عليها في بنزينه و عايز احكي لكم عن موقف حصل معايا مهم جدا انا روحت اشتري عربيه بونتو موديل 94 و كانت تحفة و دواخل فابريكا و مرفوعه 20 سنة و مركونه في جراج و في حاجات لسة باكياس المصنع . المهم بعد المعاينة مع واحد قريبي تاجر عربيات بيشتغل في الزيرو قالي تحفة اشتريها و لظروف صاحب العربية اضطرنا نقبله مرة تانية. و في المرة دي طلعنا جربناها و الراجل في النص قالي يا ايمن اشتري العربية دي يالا نلف و نطلع على الشهر العقاري .. لكن انا بصيت للراجل و قولتله ابدا لازم اطلع على البنزبنة لسببين ...الاول اني كنت مستخير و واول مارحت شوفت العربية لقيت العجله نايمة و بعد عناء تغيير العجلة اتحركنا ثانيا : العشر الاف جنيه كانوا لسه واجعني و حبيت اتاكد...
و فعلا بمجرد وصولي للبنزينه و رفعوا العربية قالولي العربية رشه دواخل و فيها بارومة و المهندس قالي احسنلك ابعد عنها و قد كان
بعد الموقف ده قررت اني مش هشتري عربية غير لما ارفعها في بنزينه ... و نفضت لاي حد قالي دي موديل قديم لان العربية اساسيات . يعني لو في اي حاجه في الشاسية فانت مش هتقدر تعمل حاجه لكن لو في الموتور او العفشة سهلة ان شاء الله
طبعا في الوقت ده اصلا انا مكنتش محدد عربية معينة لاني عرفت ان في شراء المستعمل اهم حاجه حالة السيارة و توافر قطع الغيار
بعد اكثر من معاينة ابتديت خلالهم احدد كذا حاجه اعرف من خلالها العربية دي كويسة و لا لأ .
و دي طبعا من اللينك اللي موجود فوق
المهم لقيت العربية بتاعتي على النت و كلمت صاحبها و روحت شوفتها انا وواحد صاحبي و لقيتها ماشاء الله العربية فابريكا برة و جوا و حالتها كويسه و التابلوه بحالته و لكني اصريت اني اكشف عليها في البنزينه
و دي نقطه مهمه جدا لاني كنت موسوس قوي . وكانت في بنزبنة محددة كنت مقرر اني مش هشتري عربية غير لما اكشف عنها فيها لأن لما صاحبي حكالي عليها اعجبت بيها جدا لانهم
1- بيرفعوا العربية يكشفوا عليها كويس جدا من تحت و قالولي ان العربية فيها حكات من تحت في الشاسية و ده طبيعي عشان العربية واطيه و فيها تريحه بسيطه من ورا تقلل من السعر لكن لا تعيبها
2-كشف على الموتور بيفك الموتور من فوق و بيفك البوجيهات و العمه و الكربرتير عشان يكشف عن كل حاجه و بعدين بيكشف عن كبس الموتور و معندهمش كشف كمبيوتر
3-كشف على المساعدين و الجلب و المقصات و غيره
4- بيجرب العربية بنفسه عشان يشوف و هي ماشية اخبارها ايه و يكشف على الفتيس
5- كشف عن حالة البودي من برة
6- سعر الكشف كويس 80 جنيه
7-كل حاجه المهندس قالي عايزة تتغير انا بغيرها فعلا دلوقتي واحدة واحدة عشان الفلوس مقصرة شوية D;
8-اللي باع ليا العربية لسه فاكر لغاية دلوقتي ان وديته مركز صيانه او توكيل مش بنزينه

بعد ما حصل الكشف سالت المهندس... و هما ناس محترمه جدا و مع اي اذان بيسيبوا الشغل و يصلوا ...و قولتله انا مبفهمش في نتيجة الكشف. العربية دي اشتريها و لا لأ ؟ و كان رده انا مبسعرش عربيات لكن اتكل على الله و اشتريها و لكن لو اتفقت على قرشين قلل عشان التريحة اللي قولتلك عليها
فعلا بعد الكشف على العربية اللي استمر من 30-45 دقيقة اتوكلت على الله و اشتريت العربية
مرحلة التسجيل : طبعا دي انت بتختار اما انك بتعمل توكيل او تسجل لو معاك فلوس التسجيل في الشهر العقاري و انا اخترت التسجيل عشان التوكيلات دلوقتي الواحد بيقلق منها في اعادة البيع .

انا كتبت الكلام ده بعد شهر من شراء العربية عشان اتاكد ان كلامي هيكون صدق و يفيد الناس فعلا واني مضحكش عليا تاني

لو حد حابب يعرف البنزينتين اللي انا قولت عليهم ياريت يقول و انا هبعتله على الخاص عشان ميكونش اعلان

اسف على الاطاله و اي اخطاء في الكتابة لكن دي اول مشاركة طويلهلكن انا استفدت بمواضعيكوا جدا و حبيت انقل تجربتي كاملة عسى تكون فيها افادة

بصراحة ربنا يكرم حضرتك ....... حالتك نفس حاتى دلوقت ..... انا فعلا معايا 25 وممكن أزود عليهم الفين تلاته اذا لزم الأمر....... بس كنت عاوزة أعرف انت كنت بتدور على موديلات ايه بالضبط ..... وياريت لو تدلنا على اسم البنزيمة وأظن دة مش اعلان ده مجرد توجيه ومبادلة خبرات