-
محلات للأدوات الكهربائية
سلام عليكم
حد يعرف محلات كبيرة أو مولات في القاهرة ( مدينة نصر - مصر الجديدة - الدقي - المهندسين ..إلخ ) تكون بتبيع أدوات كهربائية وحاجات المطبخ ( البوتوجازات وكدة )
أصل أنا معرفش غير محلات شارع عبد العزيز ( إللي في مدينة نصر ) ... بس عايز أشوف حاجات أكتر
كان عندنا في المقطم , رضوان العجيل وقفل ... ومش عارف فين الفروع التانية بتاعته ... بس أنا عايز ألاقي محل كبير وعنده حاجات كتير أوي ... مش عارض تلاجة أو إتنين أو بوتوجاز أو إتنين ... عايز أشوف حاجات مختلفة وماركات محترمة
-
هو اكبرهم طبعا شارع عبد العزيز
فى معرض فى ضهر جنينه مول قدام على رضا بتاع الاكسسوارات و على صف لاكازيتا اسمه الليثى كنت جبت من عنده حاجات زمان بس ناس محترمه و لو عايز حاجه معينه و مش عنده ممكن يجيبهالك
-
شكرا جزيلا لردك
وأسعاره بنت حلال ؟ ولا زي بي تيك ؟
إحنا مرة جبنا تلاجة شارب من رضوان العجيل كانت أرخص من بي تيك ب350 جنيه !
-
بى تك اسعاره عاليه
و شارع عبدالعزيز برضه اسعاره عاليه و مفيش فصال
الليثى كنت بجيب الحاجه بسعر شارع عبدالعزيز اللى فى العتبه
لو عايز من الاخر انزل شارع عبدالعزيز فى العتبه و خد لفه اعرف الاسعار و بعدين يا تشترى من هناك يا تروح محلات زى اليثى او شارع عبدالعزيز م نصر بس تكون عارف الاسعار
انا عن نفسى اشتريت غساله من شهرين رحت جبتها من اوليمبيك نفسهم .... فى معرض فى الشركه اللى فى امتداد رمسيس بعد نادى السكه وانت طالع على الدائرى روح اتفرج ختلاقى عندهم المنتجات اللى بضمان اوليمبيك و ارخص من اى مكان تانى .... معلش نسيت ده !!!
-
ربنا يكرمك ويجازيك خير
هوا بس سؤالي هل حد يعرف مووول كدة كبير فيه كل الماركات والبراندات والموديلات ... بحيث الواحد يختار ... ويعرف إللي موجود في السوق كله ... إنما ممكن الواحد يختار حاجة ويقعد يدور يجييها منين أفضل سعر
إنما الفكرة إن ممكن تلاجة تعجبني على النت ... بس مش ببقى عارف هيا موجودة في مصر ولا لاء !
-
شارع عبدالعزيز م نصر فيه اغلب الماركات محلى و مستورد
اتفرج و بعدين لف على احسن سعر زى ما بتقول
ربنا معاك :)
-
شكرا جزيلا يافندم
وبرضه بفكر أبص بصة على كارفور
ربنا يسهل
-
كارفور فى الاجهزة بلاش
ناس كذا مرة تشترى منهم وتشتكى
بى تك اسعاره اعلى من بره
بس ممكن تنزل تتفرج وتشترى من اى مكان تانى
فيه صادكو بس مش عارف ليه فرع فى مدينة نصر ولا لا
والاحسن منه
القاهرة للمبيعات
وليهم موقع على النت هما وبى تك فيه الاسعار
-
القاهرة للمبيعات لغاية دلوقتي فعلا أرخصهم
Content Relevant URLs by
vBSEO 3.6.0 PL2