الموضوع: تقرير نايل موتورز المصور عن جيلي إمجراند

المشاركة الأصلية كتبت بواسطة takakan2005

مسألة غريبة شوية !!!
رابط المشاركة
الجيلى الأيمجراند طولها وعرضها 4635-1789 ووزنها 1280 كجم وصاجها محمل وأثقل
والصنى الجديدة طولها وعرضها 4425-1695 ووزنها 1430 كجم ( الوزن أكتر لكن الأبعاد أقل من الأيمجراند ) ودى مسألة غريبة شوية لأن الجيلى بالأبعاد دى أكبر وأطول وأعرض من الصنى وصاجها اثقل
وبالتالى المفروض تكون أثقل ( الوزن بيأثر فى الأتزان والسرعة وإستهلاك البنزين ) !!!
ياريت تفسير للمسألة دى وهل ده بيأثر فى الأتزان ( بصرف النظر عن باقى العوامل الأخرى اللى بتأثر فى الأتزان )

وفيه مسألة تانية التعليق فى الجيلى أمامى ماكفرسون والخلفى عمود وذراع عزم ( هل ده torisiom beam ) والصنى الأمامى دعامة مستقلة ماكفرسون والخلفى ذراع تعليق متعدد الوصلات ( هل ده multi link ? )

ومنتظر الرد والتفسير لو سمحتم وشكرآ

ده مبدئياً البروشور بتاع الصني الجديدة (اقتبسته "خلوها اقتبسته" من أخونا أحمد مصطفى منسق نيسان) .

للأجابة على سؤالك بخصوص عفشة الصني وزي ما هو مكتوب في البروشور أن التعليق الخلفي مالتي لينك .. ومن المعروف أن المالتي لينك بيدي أداء أنعم للعفشة عن التورشن بيم الموجود في الإمجراند .. ولكن مقابل ثبات أقل (خرج طبعاً المرسيدس والبي أم والسيارات الأوروبية والأمريكية بصفة عامة من الحسبة دي خالص لأنهم بيستخدموا تكنولجيات معقدة في تصميم العفشة للسيارة تحقق النعومة والثبات)

نيجي للنقطة التانية بخصوص الثبات والوزن .. طبعاً الوزن بيكون أحد عوامل ثبات أي سيارة .. ولكنه ليس عامل وحيد في التأثير على الثبات فهناك على سبيل المثال ارتفاع السيارة بالنسبة لعرضها يؤثر تأثير كبير مثل ما حدث في الصورة التالية :

أنا بصراحة مشفتش الصني الجديدة .. ومعنديش دليل أن الصاج بتاعها أضعف أو أقوى من الامجراند .. بس مش سمك الصاج وحده اللي بيحدد وزن السيارة بصفة عامة .. هناك عوامل أخرى مثل وزن الموتور نفسه والفتيس .. ووزن العفشة نفسها ومكوناتها والجنوط إذا كانت سبورت أم جنوط عادية وووو إلخ .. فعلشان كدة ممكن نلاقي وزن سيارة أكتر من سيارة بالرغم من أنها أقل في الأبعاد .

وبما أننا جينا في منطقة الوزن والصاج والثبات .. هناك معلومة خاطئة لدى الكثير من مالكي السيارات ألا وهي "صاج العربية دي محمل تبقى 100% وأمان" على حين أن الموضوع مش كدة خالص .. ممكن عربية تكون معظم مكوناتها للهيكل الخارجي فبر مش صاج خفيف حتى وتكون أأمن من أي عربية أخرى .. وأول شركة برعت في ها المجال هي شركة فولفو السويدية بتصميمها نظام "نقاط الانهيار" في هيكل العربية نفسها وهو نظام أشبه بأله الأكورديون في انضغاطه عند العزف عليه .. فعندما يحدث ارتطام للسيارة يمتص هذا التصميم الصدمة كلها دون أن تصل نهائياً لمقصورة الركاب ... وحنروح بعيد ليه .. فيه أتقل من صاج اللادا ؟!! ولكن دخلها في كراش تست حتلاقيها حصلت على صفر بامتياز .

وفي النهاية صانع السيارات عند تصميمه للسيارة بيراعي الوزن والأبعاد والأيروديناميكية والموتور اللي حيجر الثقل ده كله للخروج بسيارة تكون أكثر ثباتاً وأقل في استهلاك البنزين .. وده اللي بيميز سيارة عن أخرى .

ومن وجهة نظري الشخصية يمكن تفسير وزن الصني الأكتر لتحقيق ثبات أكتر تعويضاً للعفشة الخلفية المالتي لينك .. وقد يكون هذا التفسير صحيح أو خاطئ .. تحياتي .