الموضوع: تقريري عن جهاز - Spy 2-way Version 3

بسم الله

الجهاز فيه اختلافات بسيطة عن Spy 2-way 5000 أشهرها وأهمها إنه بيتشحن مش ببطارية.
نقطة إضافية: الجهاز مصمم بخاصية الميكرويف سنسور، بمعنى إن الإنذار هيشتغل لما كائن حي يقرب من العربية مدة معينة بصورة مشبوهة من غير حتى مايخبطها. بس طبعاً كعادة مستوردين بلادنا، الأوبشن ده مش نازل مصر. (هي قطعة ملحقة صغيرة يمكن توصيلها مباشرة)
الجهاز تجربتي معاه رائعة والحمد لله، والمدى مقبول جداً. لضمان الحصول على مدى جيد للريموت تأكد من ابعاد الإيريال عن الحواف المعدنية ب 10 سم على الأقل.

صور الجهاز:
الكرتونة من الخارج


الخواص بالتفصيل


دليل التركيب


دليل المستخدم


السارينة


الوحدة الرئيسية


الوحدة الرئيسية من زاوية أخرى


الريموت الأول


الريموت الثاني


الوصلات


شاحن العربية


جهاز استشعار الصدمات (وبه مؤشر لدرجة الحساسية)


وصلات مرفقة


لمبة ليد زرقاء عند التابلوه


الايريال الذي سيلصق على الزجاج لاستقبال وارسال الاشارة من وإلى الريموت

دليل الاستخدام والمواصفات

أول حاجة ده شرح بسيط للرموز اللي هاستخدمها في بقية الدليل:

فتح: الزرار اليمين في الريموت من قدام (شكل قفل مفتوح)
غلق: الزرار الشمال في الريموت من قدام (شكل قفل مقفول)
صامت: الزرار اللي فوق في الريموت من جنب (شكل جرس عليه X)
صوت: الزرار اللي في النص في الريموت من جنب (شكل جرس)
شنطة: الزرار اللي تحت في الريموت من جنب (شكل شنطة عربية)

أول زرارين دولا قدام الريموت في الوش، والتلاتة التانيين على الجنب اليمين، بينما الجنب الشمال فيه فتحة شحن الريموت

نيجي بقى لتفاصيل الاستخدام الأساسية:
1- ضغطة واحدة على زرار غلق: يقفل السنتر + يخلي الانذار في وضع الاستعداد + الأنوار الجانبية تنور ثانية + صوت السارينة (bi) يشتغل ثانية عشان يعرفك ان العربية اتعملها لوك.
2- ضغطة واحدة على زرار صامت: يعمل بالضبط زي فوق. يعني يقفل العربية بس من غير مالصوت بتاع السارينة يطلع.
3- ضغطة واحدة على زرار فتح: يفتح العربية بصوت(du du)، لو انت قفلتها بالطريقة رقم 1 أو يفتح العربية من غير صوت لو انت قفلتها بالطريقة 2. وفي الحالتين الاشارات الجانبية هتنور.

4- ضغط مستمر لمدة ثانيتين على زرار غلق: يعمل بحث عن العربية بضوء الاشارات + صوت السارينة لمدة 10 ثواني.
5- ضغط مستمر لمدة ثانيتين على زرار صامت: يعمل بحث عن العربية بضوء الاشارات بس من غير صوت السارينة لمدة 10 ثواني.
6- لو انت شغلت بحث عن العربية، بيفضل يبحث 10 ثواني. لو لقيت العربية وحبيت توقف البحث دوس على أي زرار في الريموت.

7- بعد 15 ثانية من تدوير العربية (سواء اتحركت بيها أو لأ)، أول ماتدوس فرامل السنتر بيقفل.
8- بعد 15 ثانية من تدوير العربية (سواء اتحركت بيها أو لأ)، لو الباب مش مقفول كويس، العربية بتدي انزار بالصوت ان فيه باب مش مقفول.

9- لو السنتر مقفول ودست زرار فتح. وخلال 25 ثانية محدش فتح باب العربية. السنتر هيقفل اوتوماتيك، على اعتبار إنك ممكن تكون دست الريموت بالغلط.
10- طب افرض انك فتحت الباب وركبت. وقعدت 55 ثانية في العربية من غير ماتفتح كونتاكت أو تدوس فرامل، السنتر هيقفل تاني.

11- لو سبت العربية وقفلتها بالريموت، وكنت ناسي باب مش مقفول كويس. بعد 10 ثواني العربية هتعمل صوت تنبيه. لو مخدتش بالك، بعد 15 ثانية هتعمل صوت تاني أطول، وهتلاقي الريموت في إيدك نور أصفر وعمل فيبريشن.

12- الأنوار الجانبية بتنور لما الباب ميكونش مقفول كويس. طب عايز تلفي الخاصية دي؟؟؟ دوس زرار فتح في الريموت لمدة ثانيتين، هتلاقي الريموت عمل صفارة مرتين معناها الخاصية اتلغت. لو عايز ترجعها تاني، دوس زرار فتح لمدة ثانيتين مرة كمان.
13- عايز تنور الريموت عشان تشوفه بالليل. دوس زرار غلق + زرار صامت في نفس الوقت. هتشتغل إضاءة خلفية خضرا في الريموت.

14- لو طفيت العربية ونزلت منها، في خلال 10 ثواني لو مقفلتش السنتر: العربية هتعمل صوت يفكرك، وهتلاقي الريموت كمان عمل صوت. لو قعدت دقيقة مقفلتش العربية برضو، العربية هتقفل نفسها اوتوماتيك (بشرط تشغيل خاصية auto-arm).
15- بديهي إن الإنذار هيرفعلك الإزاز اوتوماتيك مع عملية الغلق (وحدة الرفع مطلوبة).

16- عايز تقفل العربية بس من غير تشغيل الانذار (مثلاً في المغسلة). افتح الكونتاكت بعدين دوس زرار غلق لمدة 3 ثواني متصلة وشيل ايدك بعدين دوس عليه مرة واحدة كمان. في الحالة دي انت عملت تعطيل لخاصية الانذار بحيث انه ميشتغلش لما تقفل السنتر. عايز تلغي اللي فات؟؟؟؟ افتح الكونتاكت بعدين دوس على زرار غلق لمدة ثانيتين.

17- لو دست على اي زرار في الريموت، والإشارة مش واصلة العربية، الريموت هيعمل صوت موسيقى للتنبيه إن المسافة بعيدة.

18- جبت ريموت تاني بشاشة وعايز تبرمجه على نفس الانذار، دوس على زرار code learning في الوحدة الرئيسية للإنذار. بعدين دوس على اي زرار في الريموت الاصلي، هتلاقي شاشته بقت أصفر. بعدها دوس على اي زرار في الريموت الجديد.

19- جهاز حساس الصدمة فيه مؤشر لضبط حساسيته تجاه الصوت والاهتزازات.

20- الشحن الكامل للبطارية ياخد 1.5 ساعة من شاحن العربية.
21- عمر البطارية بعد شحنها يزيد على شهرين (وبرضو حسب الاستخدام)
22- شحن البطارية في نهاية مدتها لما بيخلص بيخلص فجأة. يعني لو الريموت اداك انذار ان بطاريته ضعيغفة، واستنيت عليه من بالليل للصبح، ممكن تصحى الصبح تلاقي الريموت فاصل ومش بينطق. النصيحة، أول مالريموت يقولك عايز اشتحن اشحنه.

23- اطفاء الريموت: اضغط زرار فتح لمدة 7 ثواني.
24- تشغيل الريموت: اضغط زرار فتح لمدة ثانيتين.

25- خاصية Auto-Arm أي غلق السنتر اوتوماتيك بعد النزول من السيارة. ممكن تشغيلها او اطفاءها من قائمة Settings الريموت.
26- للدخول لقائمة Settings اضغط زرار فتح + زرار غلق في نفس الوقت لمدة ثانيتين. بع ذلك استخدم زرار غلق للتنقل داخل القائمة، وزرار فتح لتعديل القيم المطلوبة.

27- لو انذار العربية اشتغل وانت مش موجود، بعد ماتيجي للعربية هتلاقي اللمبة الزرقة بتنور متواصل عشان تعرفك. والعربية هتعمل صوت du مرتين او اربع مرات حسب خطورة الانذار (يعني خبطة عادية أو حد حاول يفتح الباب)

28- انذار الطواريء (متواصل): يشتغل في الحالات دي: حد فتح الباب بالمفتاح أو بأي وسيلة - حد داس دواسة الفرامل - الكونتاكت اتفتح بالمفتاح - الكونتاكت اتفتح بتوصيلة. الانذار ده بيفصل موتور العربية للتأمين وبيشتغل على مرحلتين، أول مرحلة 30 ثانية، بعدها 4 دقايق، بعدها بدون انقطاع. حسب تكرار الحالات السابقة.

29- زرار غلق أو زرار صامت: ضغطة واحدة لإسكات صوت الإنذار.
30- في حالة عطل الريموت أو فقدانه: افتح الباب بالمفتاح، هيشتغل إنذار الطواريء. دوس دواسة الفرامل. ثم افتح الكونتاكت واقفله 10 مرات. في الحالة دي هيسكت صوت الانذار.

31- زرار الشنطة: لمدة ثانيتين يفتح الشنطة. ويمكن فتح الشنطة بتركيب ريلاي واستخدام اكواد أخرى مثل زرار الشنطة مع زرار الصامت على سبيل المثال.

32- إنذار الخطف (والعربية دايرة ماشية او واقفة): اضغط لمدة ثانيتين أو أكثر على زر صامت. كل أنوار العربية هتشتغل، وصوت السارينة هيشتغل متواصل بأعلى صوت، ثم بعد 20 ثانية هيتم فصل الموتور. للإلغاء اضغط زرار فتح.

وما توفيقي إلا بالله

ياريت السعر لانى عايز ضرورى اركبه و مكان اللى اشتريت منه و ركبهولك


و مشكور على التقرير الرائع