بسم الله الرحمن الرحيم
اول حاجة احب اعرفكوا على نفسي .. اسمي دكتور أحمد .. صيدلي دفعة 2004 و الحمد لله مسافر و بشتغل برة مصر .. طبعا لما سافرت في الاول محستش اني بحاجة للجواز و اني اقدر ادبر اموري بنفسي و مكانش في مشاكل .. بس بعد ما كملت سنة برة حسيت اني مخنوق اوي و لقيت ناس كتير قرايبي و اصحابي منهم اللي خطب و منهم اللي بيتجوز .. ففكرت في الموضوع .. طبعا لقيت والدتي شافتلي عرايس بس للأسف محدش فيهم شدني بالنسبة للجمال الخارجي ولا حتى في السن ولا في المؤهل الدراسي .. و بالصدفة اتعرفت انا على بنت عن طريق صداقة انترنت و اتكلمنا فترة طويلة كأصدقاء و لما سافرت مصر طلبت اني اشوفها بس وقابلتني مع عمتها في جامعتها (لأن والدتها متوفية) طبعا لما شفتها ما شاء الله عليها من ناحية الجمال و طريقة الكلام و التعامل والأخلاق .. بعدها بشهرين قررت اني اخد خطوة جد لأني مش مستقر في مصر و مرتبط بشغلي .. فطلبت منها رقم والدها و كلمته و فاتحته في الموضوع و هو طلب انه يشوفني و يقعد معايا و يتعرف عليا .. و شغله في شرم الشيخ .. رحت شديت الرحال و سافرت و قابلته و الراجل كويس و أخوها طيب بس من وجهة نظري من اللي شفته انهم على قد حالهم يعني متوسطين الحال .. المهم اتفنا انه هينزل القاهرة و هجيب اهلي و نتعرف على بعض كلنا في بيت العيلة عندهم في القاهرة و نشوف الامور هتمشي ازاي .. تمت المقابلة مع ان والدي و والدتي مكانوش مقتنعين لحالتهم الاجتماعية و المادية و بسبب شرم الشيخ و كدة .. بس طبعا والدي عشان ميزعلنيش قرى الفاتحة مع والدها الحمد لله .. بعد كدة سافرت و بدأت اتكلم مع والدها عادي و مع اخوها والحمد لله علاقتي بيهم كويسة كلهم ..
المشكلة بقى اني انا بدأت اتخنق شوية ان خطيبتي عصبية اوي.. اي حاجة حتى لو هظار بتتعصب عليها اوي .. بحس بكبت و خنقة مبرضاش اطلعها قدامها .. بدأت احس اني اتخنقت اوي رغم اني بقالي سنة قاري الفاتحة و المفروض اني عرفتها كويس و بحب دايما افرحها .. بس بحس انها على طول عصبية و محتاجة معاملة خاصة .. و برغم كل ده بتحبني جدا و متقدرش تستغنى عني .. انا مش عارف .. هل اسيبها ولا اكمل معاها .. انا ساعات بفكر انها ممكن من كتر الكبت و العصبية اللي بكتمها جوايا دي اني ممكن يجيلي الضغط و السكر بعد الجواز .. معرفش يا جماعة تنصحوني بأيه هل انا اتسرعت في ارتباطي بيها لأنها مش جاية عن طريق اهلي ولا اللي انا فيه ده طبيعي ولا ايه .. انا مبقتش عارف بصراحة هل هي مريضة نفسيا ولا ده الطبيعي بتاع البنات كلها نظرا لعدم خبرتي في البنات و اني اول مرة ارتبط ..
انصحوني زي اخوكم الصغير ربنا يرضى عنكم و اعذروني لأني تعبت بجد