يوم 2 / 11 / 2012 يوم لن ينسى من ذاكرتى - موضوع خاص بيا

**tananybasha** · 03-11-2012 10:50 PM

السلام عليكم و رحمة الله و بركاته
والصلاه و السلام على رسول الله
و ما تشاؤن الا ان يشاء الله
انا عارف من الأول ان ده مش مكان الموضوع
بس لازم افك نفسى عشان انا مش عارف اتكلم غير هنا
يوم الحمعه
الساعه 9.30 الصبح
مراتى من باليل تعبانه جداً
هى فى اخر التامن و على وش ولاده
مفيش فى دماغى اى حاجة
هى بتولد قيصرى يعنى
فخلاص مش فارقه
قررت الصبح انى اروح للدكتور اهو يوم اجازه و بالمرة عندى امتحان بتاع بنتى فى المكتبه الساعه 11 فيقى مشوار واحد
اتكلنا على الله
الساعه 10 رحت للدكتور بعد ما كلمته بالرغم انى عارف انه قافل بس المساعدين بتوعه موجودين
كشفت عليها الدكتورة و حددت ان الولاده هتكون يوم الأتنين و هتتحجز الأحد لعمل التحاليل
و اديتها حقن بتاعت تنشيط الدورة الرئوية ابيدرون و مسكن
الساعه 5 تقريباً وصلت البيت لأنى عديت جبت حاجات و هدوم للمولوده زيها زي اخوتها
نيجى للساعه 7.15
مراتى بعد ما كان الم بقى صويت و صراخ و انهيار كامل فى وظائفها الحيوية و الدنيا بقت وحشة جداً
كلمت الدكتور قاللى انا هاجيلك على المستشفى دلوقتى
الساعه 7.21
بعد 6 دقائق كان العيال فى العربية لابسين و انا بالبس مراتى عشان ننزل
الساعه 7.23
لقيتها بتصوت و الصويت زاد قوى و الدكتور بيقوللى على الخط هو فيه ايه بص عليها
قاللتلى انا حاسه ان فيه حاجة هتنزل منى
ببص لقيت راس العيل نزلت
7.24
عمال اصوت فى الدكتور و مره واحده حصل ما لم اراه من قبل
الطفله نزلت على الأرض هى و ما يخصها كله
و مراتى اغمى عليها
و الدكتور بيصوت فى ودانى
مش عارف اعمل ايه
موقف بجد رهيب
حتة لحمة حمرا على الأرض
مربوطه بالحبل السرى و كيس الحمل مرمى قدامى و مراتى ساكته خالص على الأرض
الدكتور قاللى سيبك من مراتك ده اغماء بسبب مجهود الطلق
صحى البت
و انا اللى جاى عليا اعيط و اصرخ
قاللى اهدى عشان البنت متموتشى
الساعه 7.28
قاللى خليك معايا
هات خيط و اربط الحبل السرى فى اربع مواضع جامد
انا مش عارف انا ربطه ازاى
هات مقص و قص ما بين الربط التالت و الرابع
امسك من رجلها و اخبط على ضهرها و على رجلها
شوف النبض
لقيت نبض
بس ضعيف
حط عليها ريحه و اعمل تدليك و تنفس صناعى
البنت النبض ابتدى يقل و ابتدت تزرق و مفيش فايده
قاللى طير بيها على اى مستشفى و انا معاك
لفيتها فى فوطه و بطانية صغيره
و نزلت حافى بالشراب و الدم مغرق قيمصى و هدومى كلها
نزلت شيلتها لأحمد ابنى و ناديت على الجيران يلحقوا اللى مرمية فوق دى
الدنيا اتقلبت فى لحظه
طيرت بيها على اقرب مستشفى و خبطت العربية بتاع 6 او 7 مرات
الساعه 7.38
كنت بيها فى قسم الحضانات فى مستشفى جنبى
الدكتور جه ربنا يباركله
بص عليها
و راح جرى بيها على جوه
هنا بقى انا انهرت تماما
مش عارف اعمل ايه
اللى فى البيت هتموت لو مرحتشى المستشفى
الدكتور بيصرخ فى ودانى لأنه معايا على الخط
مش عارف اسوق و لا امشى حتى على رجلى
اتصلت بعمتى اقرب حد ليا
فى 5 دقايق مش عارف ازاى كانت جيبه ابنها هو عنده تاكسى و كانت عندى
و ابتدت رحله البحث عن دكتور نسا عشان يشوف اللى فى البيت بالرغم ان الدكتور معايا على الخط
بعت عمتى على البيت و دخلت الحضانات قاللى هى دلوقتى بين ايد ربنا
مفيش استجابه للتنفس الطبيعى
و حطنيها على التنفس الصناعى
قاللى مفيش فى ايدك حاجة
البنت تتعوض بس الحق اللى فى البيت
كان الجيران جولى عند المستشفى و كلمت امها عشان تيحى و اصلاحات الدائرى موقفه اتجاه الجيزة
رحت البيت لقيت الجيران فوقوها و شالوا السجاجيد اللى اتبهدلت و الملايات و شربوها حاجات سخنه
بعت عمى على الحضانه و خليت معاه احمد ابنى و ناس من الجيران
و نزلت مراتى على الدكتور اللى معايا على التليفون اكتر من ساعه
الساعه9.30
كنت داخل بيها للدكتور اللى مجهز العمليات اصلا للولاده
خدوها على جوه
و انا متابع الحضانه لغاية ما الدكتور قاللى عايشة و بتتنفس بس لازم تتحط فى عناية مركزه عشان صدرها مقفول خالص بسبب سوائل الرحم اللى متلعطشى على طول
الساعه 11.30
مراتى طلعت من غرفة العمليات و كنت عملت بتاع 100 مكالمه و اخو مراتى و عمى و ابوها و ابويا و جوز اختها كله بيدور على حضانه فاضية يكون فيها جهاز طوارئ تنفس
مفيش
الساعه 11.40
لقيت محمد ابن عمتى بيقوللى دكتور الأسعاف عرف يتصرف فى مكان بس غالى قوى
قلتله اسعاف ايه
قاللى هى لازم تتنقل فى عربية اسعاف مجهزة بحضانه طوارئ
قلتله ماشى خليه يحجز
قاللى لازم تيجى عشان تستلم التقرير و البنت
خدت معايا اخو مراتى عشان مسوقشى لوحدى
و رجعت على المستشفى خلصت الأجراءات و التقرير
الساعه 2.22
نا داخلين مركز الجضانات فى المنيل
كشف عليها الدكتور و قرا التقرير
و قاللى ده حاله فشل تنفسى من الفئة التالته نتيجة وجود سوائل و ميكروبات فى الرئة
يا دكتور هتعمل ايه
قعد يقوللى ارقام و حسابات و زفت و طين على دماغه
قلتله دخلها و اشتغل
2.45
البنت فى الحضانه و معلقين محاليل و نوزل للأنف و اكسجين مضغوط عالى الكثافه
قاللى انت كده تمشى
انا كان معايا عمى و اخو مراتى و ابن عمتى و اتنين من جيرانى ربنا يبارك للجميع
قلتله مش لما اطمن
قاللى مفيش قعاد
هتمشى و الزياره من 1 الى 2 ظهرا
مشيت
و طلعت على اللى فى المستشفى
لقيتها ابتدت تفوق
و اللى عليها كلمه واحده
البنت فى ايد ربنا انما انت لو مت مش هنلاقى غيرك
فضلت فى المستشفى لغاية الساعه 11 تانى يوم
و روحت البيت
و غيرت هدومى و نزلت عشان اقابل الأستشارى
بالمختصر المفيد
هى دلوقتى فى مرحله خطر لو وصلت للمرحله الرابعه و احتاجت للتنفس الصناعى
و ده اللى بنحاول نهرب منه
قلتله اعمل اللى انت عايزه و اللى يقدرك عليه ربنا
و روحت البيت و طمنتهم
و حاولت انام
و منمتشى برضوا
الحمد لله على كل شئ
و اسألكم الدعاء ان ربنا يسترها من عنده
و ما تشاءون الا ان يشاء الله
و اسف على الأطاله

**SonaSteel** · 03-11-2012 11:06 PM

لا حول ولا قوة الا بالله ...... ربنا يارب يقومها بالسلامة ويتم شفاها لي خير ويجعل التعب ده كله في ميزان حسناتها ياااارب العالمين انه علي مايشاء قادر .
ربنا يعينك ويقويك علي اللي انت فيه يارب .... ويجعله في ميزان حسناتك
ابشر بكل خير ان شاء الله .... انه الجواد الكريم

**forget** · 03-11-2012 11:08 PM

ربنا يقومهوملك بالسلامة يارب وخلى ثقتك بربنا كبييييييييييييييييييييييي يييييييييييييييرة

**sherif moneer** · 03-11-2012 11:11 PM

ربنا معاك يا طناني باشا ويصبرك و خير ان شاء الله

**أحمد كوجار** · 03-11-2012 11:15 PM

انشاء الله تشفى البنت وأمها، ويقوموا بالسلامة.
وكتر خيرك اللي اتصرفت لحد كده.

**moaaz** · 03-11-2012 11:17 PM

ربنا يقومهاااااااااااااااااالك بالسلامة يا رب[.....خليك واثق فى ربنا و انت واخد بالاسباب ...ف ربنا ان شاااء الله هيستجيب لدعوات الناس دى كلها وانا واحد منهم ....اسال الله العظيم رب العرش العظيم ان يشفيها ..

**tananybasha** · 03-11-2012 11:19 PM

والله العظيم
الدكتور بيقولى كويس اوى انك لسه واقف على رجلك و مفقدتشى اعصابك فى اللحظات دى
و انا لا عارف ازاى جالى قلب اقطع و اشيل و اربط و افك و اجرى و اسوق و احاسب ووووووووووووووو
مش عارف
ربنا المستعان