الموضوع: سؤال للمرة الاخيرة لوحوش الميجان

المشاركة الأصلية كتبت بواسطة ahmed a.maksoud

من ناحية هتلاقي...........هتلاقي

من ناحية الحالة...........اشك أنك هتلاقي حاجة نضيفة بالسعر ده.

الموديل كان فيه مشاكل فى قطع غيار المفروض أنها معمرة........يعنى تقعد 100 الف مثلاً على الأقل........بس اللى كان بيحصل أنها بتبوظ قبل كده.....و بالتالي صعب أنك تلاقي ميجان موديل 2005 مغيرتش الحاجات دي........لو مكانتش القطعة معيوبة هتلاقيها دلوقتي عدت عمرها الإفتراضي.

بالنسبة للناس اللى بتخوفك من الميجان............خد لفة فى مواضيع القسم و أحكم بنفسك.

لو طلع فيها مشكلة.........حسب المشكلة....فيه مشاكل بتتحل ب 100 جم و فيه مشاكل ب 2000 جم.

أهم حاجة لو هتجيب ميجان هى أنك تكشف فى التوكيل و تقولنا التقرير فيه أيه......

بالتوفيق إن شاء الله.

متشكر جدا يا ا.احمد على اهتمك وسرعة الرد

انا عارف ان السعر قليل شوية بس معلش توضيح اخير ، فلنفترض ان الاساسيات كلها سليمة وجبت العربية ب 55 مثلا وهكون على استعداد انى اصرف 3-4 الف جنيه بس على كام شهرين او تلاثة عشان اعالج اى مشاكل تظهر فيها ، فهل المبلغ ده هيكون كافى ولا ممكن الموضوع يفتح معايا فى اكتر من كده ؟

المشاركة الأصلية كتبت بواسطة وائل مختار

انا رأى الشخصى اصبر شويه وحاول تكملهم 60 وان شاء الله بالمبلغ ده تجيب حاجه حالتها كويسه
ومتخفش من الميجان ومتسمعش كلام الناس اللى بيفتوا على الفاضى والمليان الميجان عربيه محترمه جدا جدا بس لازم تكون حالتها كويسه جدا عشان متقرفكش

المشكلة انى بعت العربية بتاعتى وماشى من غير عربية دلوقتى ومش عايز اجيب حاجة مؤقتة واصرف عليها وارجع ابيعها تانى عشان اجيب الميجان

هنزل ادور على ميجان ان شاء الله وربنا يهدينى لصالح

ال 4 آلاف اللى حضرتك بتتكلم عليهم ممكن تغير بيهم موتور العربية ههههههه

لو العربية أساسيتها كويسة كموتور نفسه وفتيس تمام اشتريها والأعطال العادية اللى حصلت مع الأعضاء بتتلم بمبالغ معقولة مفيش الألوف دى إلا لو العربية مطحونة وعلى فكرة قطع غيارها سعرها كويس برا التوكيل

اولا متشكر جدا لحضراتكم

المشاركة الأصلية كتبت بواسطة mohammedaladel

ال 4 آلاف اللى حضرتك بتتكلم عليهم ممكن تغير بيهم موتور العربية ههههههه

لو العربية أساسيتها كويسة كموتور نفسه وفتيس تمام اشتريها والأعطال العادية اللى حصلت مع الأعضاء بتتلم بمبالغ معقولة مفيش الألوف دى إلا لو العربية مطحونة وعلى فكرة قطع غيارها سعرها كويس برا التوكيل

ربنا يبشرك بالخير ، وان شاء الله مش هاجيب عربية مطحونة ابدا لا ميجان ولا غيرها

المشاركة الأصلية كتبت بواسطة airfox

بس يا باشا انا في اتنين اصحابي اشتروا ميجان 2005 في نفس الاسبوع واحد جابها ب 56 و التاني ب 51 اللي اشترا ب 51 كان عارف ان فيها شويه حاجات في العفشه ز كسل يكشف علي العربيه اساسا قبل ما يشتريها و لما اشتراها لقي ان فيها تصليح بحوالي 5000 جنيه و العربيه ترجع زي الفل و فعلا عمل معظم الحاجت اللي فيها و العربيه كويسه و الثاني كشف علي العربيه وكانت كويسه بس هي داخله عي صيانه ال 120 و هو هيعملها علي حسابه و فيها شويه شغل عفشه بس علي خفيف بس في المجمل العربيه زي الفل .اما بالنسبه للسعر ف اللي اشترا ب 51 كان صاحبها طالب 55 و اللي اشترا ب 56 كان طالب 58 يعني انت ممكن تفاصل حسب حاله العربيه و ممكن تلاقي حاجه لقطه وتعرف تخلصها لان برده الميجان مش اي حد بيشتريها لازم يكون حد مقتنع بيها و بيحبها وان شاء الله ربنا يوفقك

انا العربية عجبانى من زمان ، ومع ابن خالى بس انا مش قادر اعتمد على رأيه عشان هو من النوع بيزود الكوتش فى التوكيل ، اونا طبعا مش هبقى كده ، وفى الغالب اللى هيبيع العربية بالسعر ده مش هيبقى كده .

المشاركة الأصلية كتبت بواسطة medori

العربيه ممتازه جدا بس نصيحه حاول تعمل زى ما الناس نصحوك و تكملهم 60 و تجيب حاجه حالتها نضيفه 2006 او بعديها، بلاش 2005 على الرغم من ان زى ما قالك احمد مفروض ان اغلب عيوبها اتصلحت . انا عربيتى 2006 و كانت مغيرتش الكويلات الاصليه اللى جايه بيها و عملتلى مشكله جامده و كانت العربيه هتولع بسببها!! و اهممممممممممم حاجه كشف التوكيل. انا متفق مع محمد ان قطع الغيار موجوده بره التوكيل جديد و استيراد و اسعارها معقوله بالنسبه للاوروبى و اليابانى المحترم، بس برضه اللى بيفهموا فيها بجد قليلين و مش موجودين فى كل حته يعنى لو عطلت منك فى مكان بعيد يا تكلم حد و يا يرضى يجيلك او ما يرضاش او تكلم التوكيل يبعتولك مهندس (و ده خدمه مميزه جدا فى حد زاتها بس ليها تمنها طبعا) يا ونش و حاسب يا معلم.
انما انا مختلف مع محمد فى مبدأ اساسيات و موتور و فتيس تمام تبقى العربيه تمام و الباقى كله يتلم، انا عربيتى الشاسيه و لا الهوا و الموتور ممتاز و الفتيس مانيوال انما من ساعت ما جيبتها من 3 شهور و هى موريانى الويل بسبب حاجات تانيه، من طقم دواره و علبه بيئه و كويلات و المشكله معايا ان كل دول باظوا ورا بعض و كل حاجه قرفتنى لوحدها و مصروف عليها لحد دلوقتى تقريبا 6000 و لسه هتصرف تانى عشان عطلت تانى بسبب طقم الدواره امبارح و ده عيب حتى فى التوكيل مكانوش هيعرفوه، ده بس حظى الوحش مع العربيه ان كل ده حصل ورا بعضه فى فتره قليله فحرق دمى.
بس انا عند رأيى، العربيه ممتازه جدا و فيها كل حاجه من قوه و راحه و امان وسعر مستعمل متعرفش تجيب بيه حاجه تانيه فى الفئه ديه و لو رجع بيا الزمن هجيبها تانى بس مش هسترخص و هتاكد قبل ما ادفع جنيه فى العربيه ان اللى قبلى كان مهتم بيها كويس اوى عشان متقرفنيش. اة بالمناسبه، اللى بيهتم بالعربيه بيبقى مهتم بيها فى كل حاجه من دواخل و خوارج فلو لقيت عربيه التابلوه بتاعها مبهدل مثلا او الكونسول او كده، سيبها و امشى على طول عشان ده هتلقيه معكوس على اساسيات العربيه حتى لو محستيش ده فى ساعتها و انتا بتشترى

انت كده قلقتنى تانى بعد مكنت اخدت القرار ، انا حتى لو زودت ممكن اتعرض لنفس مشاكلك ، وايه اللى صرف المبلغ ده ؟؟