-
شفت الموت بعينى
اللهم لك الحمد والشكر
النهاردة إتكتبلى أعيش شوية كمان علشان أربى عيالى
شفت الموت بعينى ...
عرفت النهاردة أد أيه الإنسان قريب من الموت
عرفت النهاردة إن الطريق ملوش كبير
عرفت النهاردة إنك مهما كنت حريص وربنا كاتبلك تموت هتموت .. ولو كاتبلك تعيش هاتعيش
عرفت النهاردة إن مفيش حاجة إسمها إنك بتعرف تسوق كويس .. طالما القدر موجود ومكتوب
والصورة خير دليل وأفضل شرح
صدق أولا تصدق .. انا اللى كنت سايق العربية دى وربنا قدر لى إنى أطلع منها بدون أى خدش
الحمد لله الحمد لله الحمد لله
http://www.nileup.com/uploads/13520766361.jpg
-
لا حول ولا قوة الا بالله العلى العظيم
اولا الحمد لله على سلامتك
منظر العربية واضح ان ربنا سترها معاك وخرجك بالسلامة بلطفه ومشيئته
قدر الله وما شاء فعل
وعسى ان تكرهوا شيئا وهو خير لكم
.....
ياريت بعد ما تهدى شوية تقولنا ايه اللي حصل
الحمد لله على سلامتك وفداك 1000 عربية
-
الف حمد لله على سلامتك
و لو على العربية قدر الله و ماشاء فعل
-
حمد لله على سلامتك
وربنا يعوضك ان شاء الله خير منها
-
حمد الله علي السلامه وفداك عربيات الدنيا
-
الف حمد الله علي سلامتك
الحمد الله انك بخير
-
(أيه اللى حصل؟)
السؤال ده أنا إتسألته كتير أوى النهاردة ... من الناس اللى طلعتنى من العربية ومن الشرطة اللى جت تعاين الحادث
أيه اللى حصل ... أنا معرفش أيه اللى حصل
كل اللى فاكرة إنى كنت كالعادة على طريق شرم الشيخ متجه إلى عملى .. وعند ملفات أبو زنيمة وهيه ملفات خطيرة .. وأنا حافظها صم ... بدأت الدنيا تمطر مطر خفيف .. قلت ياواد ياأحمد إهدى شوية علشان المطر بيخللى الأسفلت زى الصابونة
دخلت على الملف مش فاكر كان بسرعة ولا بالراحة
معرفش أيه اللى حصل خلانى أدوس سنة فرامل وأنا داخل على الملف
هل سرحت .. ولا الكاوتش فرقع من غير ماحس ... والله ماعرف
المهم دست سنة فرامل وأنا داخل الملف لقيت العربية فجأة حدفت منى شمال .. عدلت الدريكسيون ودست فرامل جامد العربية كلها لفت منى يمين ولبست فى الحاجز الأسمنتى اللى باين فى الصورة الناحية التانية من الطريق ببوز العربية وش فى وش ... الخبطة خلت العربية كلها تلف 90 درجة وإتخبطت تانى فى الحاجز من الناحية الشمال ورا ... ومن قوة الخبطة العربية لفت حولين نفسها وإترمت الناحية التانية من الطريق جوه الرمل ... الكلام ده كله حصل فى جزأ من الثانية ....
أنا كل اللى فاكرة اللحظة اللى العربية إنزلقت منى .. ولقيت نفسى بلبس فى الحاجز .. إحساس غبى
الثانية اللى فقدت فيها السيطرة على العربية .. أنا فاكر إنى قعدت أقول بسم الله .. وعدت حياتى كلها أمامى فى لحظة وأنا بخبط فى الحاجز .. حسيت إن لحظة موتى جت ... وبعد مالعربية وقفت قعدت أبص لنفسى .. ومصدقتش إنى سليم .. لدرجة إن الناس اللى وقفت على الطريق مكنوش مصدقين إن فى حد ممكن يطلع من العربية دى سليم .. وبعد لطف ربنا بيه .. الحمد لله ربنا جعل سبب حزام الأمان ( مبمشيش غير وأنا رابطة ) والأيرباج كان الله أعلم أنا كنت هابقى فين دلوقتى
اللهم لك الحمد يالطيف ... العربية فى ستين داهية .. فدا ضفر من ضوافر عيالى كان ممكن يتيتم النهاردة ... دى عظة لي وعظة لأى حد .. علشان كله يصدق فعلاً إن الموت بييجى فى لحظة بدون إستأذان
-
لا حول ولا قوة الا بالله و قدر الله وما شاء فعل
وممكن تكون دوست فى بقعة زيت كانت على الاسفلت ومش باينة بسبب المطر
وحمدا لله على سلامتك وربنا يعوضك خير عن العربية وفداك
-
ألف حمد لله على سلامتك..والله المفروض تصلي ركعتين شكر لله على انه نجاك حداثة زي دي.
وفعلا الطريق ملوش كبير.
وربنا يستر طريقنا جميعا ويكفينا شر الحوادث يارب.
-
ربي لك الحمد كما ينبغي لجلال وجهك وعظيم سلطانك
قدر الله وما شاء فعل
الف حمد لله علي سلامتك
فداك الف عربيه
Content Relevant URLs by
vBSEO 3.6.0 PL2