تفادي الخطر في موسم المطر
نقلا عن موضوع شخصي لصديقي العزيز ايهاب جمال
الكلام المفيد في الوصول الاكيد
تفادي الخطر في موسم المطر
كل سنه وانتم طيبين يا شباب الشتا و المطرة رجعت
و طبعاً ساعة مطر في بلدنا معناها أسابيع شوارح مبلولة و مطينه
بس ده مش معناه اننا نقعد في بيتنا شهور او نحول لعربيات
كتير بنحتاج ننزل بالبايك و أحياناً بتفاجئنا المطر و المية واحنا مش مستعدين
خلونا نراجع سوا المشاكل و حلولها علشان نأمن نفسنا و بايكاتنا
كل نقطة هنا في أهمية اللي وراها ركز و ماتستخفش بيهم و ماتلعبش في عداد عمرك
قواعد تنطبق في موسم المطر زي و أكتر من غير موسم المطر
السيفتي واجب مش إختيار ماتستهبلش ماتستغباش ماتبخلش على عمرك
الخوذة تقلعها في السرير بس، طول مانتا راكب احمي البطيخة، ربنا مش مجهزها للصدمات العنيفة فشخشخ جيبك و اعتبره عيب خلقي عندك و غطيها باغلى ما تستطيع شرائه
عيونك حبيبي اغلى ما عندك تتحمي بنضارة ضد الكسر و التطاير + غطا الخوذه الشفاف
درجتين حماية برضه مش كفاية ضد لاقدر الله زلطة عكسية محشوره بين عجلتين نقل دوبل وانتا ماشي بسرعة يعني سرعة إجمالية تصل لنص سرعة الصوت، لو جت في جاكيت سيفتي ممكن تخرمه، ربك يستر و تكسر وش الخوذه بس، يعني النضاره تحت الخوذة مش إختيار، واجب مفهوش هزار، ولو مصر تركب من غير ما تغطي وشك و عينك هاقولك اكتر ما يقرفني
تخيل سواق الاوتوبيس اللي قدامك بيتف من الشباك، افتكر الكلاب و البنيادمين عاملين ايه عالاسفلت اللي بيطرطش عليك..
الجوانتيات السيفتي لو بتحب صوابعك
الجزمة البوت السيفتي لو بتحب رجلك
جاكيت سيفتي في نفس اهمية الخوذه لحماية عمودك الفقري و كيعانك
الركب السيفتي لو بتحب ركبك
و الشوية دول بس كل الف جنيه تصرفه هيوفرلك كا قدر الله ربع مليون عمليات لو حظك كويس
السرعة
كلنا بنحب الجري، وإلا كنا اشترينا عجل مش موتوسيكلات
بس الأذكيا مننا هما اللي يعرفوا فين يجروا و فين يمشوا عادي، افهم دي بسرعة علشان الغباء هنا مالوش علاج
لازم ما تقدر الطريق و الزحمة قدامك و الوقت المطلوب للوقوف و أي بهللة ممكن تحصل من اللي حواليك و مفاجئات اعطال البايك
لو مش قادر تتحكم في نفسك و تفهم و تقدر صح، بيع البايك النهارده احسنلك و احسن للبشرية
حالة البايك
مش كل المكن زي بعضه و موتوسيكلك نفسه حالته بتتغير مع الوقت
اتعود عالصيانة الدورية لكل حاجة و فيه بوستات كتير عن الموضوع ده بس اللي يهمنا هنا منه دلوقتي الفرامل والكاوتش
أظن لو محتاج حد يقنعك بأهمية جودة الفرامل و تعودك عليها بطل قراية واتعلم تيريكو احسن
الكاوتش بقى محتاج شرح
احنا عايزين ايه من الكاوتش؟
عايزينه مايفرقعش فجأة
مايتزحلقش
مايبقاش فيه هزة او رعشة
يعني لازم يكون منفوخ صح حالته نضيفة مش ممسوح و مافهوش قطعات او شقوق أو بروز
الكاوتش الممسوح بيزحلق لأن النقشات مهمتها التعامل مع الرملة و الزلط و المية اللي فوق الاسفلت
منغير نقوش بارزه فانتا يا باشا راكب باتيناج في شوارع بلانا، و طبعا مش محتاجين نشرح اد ايه احنا مش محتاجين زحلقة
الوقوف الآمن في الظروف العادية
لو كاوتشاتك و فراملك تمام و الطريق نضيف و سرعتك عادية و مافيش حاجة للوقوف فجأة
نهدي بالتدريج بالفرامل الأمامية، بالتدريج يعني بالراحة واحدة واحدة نزود الضغط
وزن الموتوسيكل بالتدريج بيبقى لقدام بسبب الاندفاع و الضغط بيبقى عالفرامل الامامية
و لو حبيت تقف أسرع بعد ما تدوس الامامية بشوية تضغط بشويش عالخلفية لحد ما تقف
تحذير: ضغط الفرامل الخلفية فقط و عالسرعات العالية يفقد الراكب توازنه
دي مش عربية، فراملك في ايدك مش في رجلك
الخلفية فقط لمساعدة الوقوف بالتدريج بعد الامامية و ليست للطوارئ في الطرق النضيفة، و لكن مهمة في حالة التراب و المية و الطينة
في الملفات نعتمد أكثر عالفرامل الخلفية بالتدريج و ليس فجأة، و بعدها يمكن إستخدام الأمامية قليلا و ليس للوقوف
تحذير: ضغط الفرامل الأمامية في الملفات يؤدي لفقد التوازن، و ضغط الخلفية فجأة أيضا يؤدي للسقوط
في حالة التراب و المية و الطينة مع ازدياد سوء حالة الطريق تقل أهمية الفرامل الامامية و نعتمد على الخلفية أكثر ثم الاتنين مع بعض بالتدريج
تحذير: في حالة التراب و المية و الطينة الضغط فقط عالفرامل الامامية فقط يعني زحلقة إعتمد أكتر عالخلفية و الجير الواطي - أول تاني - أحسن حاجة، نزل رجليك الاتنين عالسرعات البطيئة علشان تسند ما تتكسفش، نص الطريق عندنا انضف من أطرافه
أهم حاجة في الوقوف الآمن عدم توقف العجلة عن الدوران و زحلقتها على الطريق، علشان كده قانا ندوس الفرامل بالتدريج
و لو حسينا بالعجلة وقفت و بتتزحلق نخفف الضغط عليها برضه بالتدريج و بعدين نزود الضغط شوية شوية
و ده بالمناسبة محلول في المتوسيكلات الغالية اوي و العربيات بنظام اى بي اس نظام ضد توقف العجلة و زحلقتها
Anti Lock Breaking System ABS
في حالة الزحلقة الخلفية ماتحاولش تعكس الجادون علشان تعدلها، كل المطلوب من سعادتك توجه الجادون في الاتجاه الامامي اللي انتا عايز تروح ليه و هيا ها تعدل نفسها ماتخافش او تعوج الجادون فجأة
في حالة الزحلقة الامامية تخفف الضغط تدريجي عالفرامل الامامية
طبعاً مش محتاج افكرك ان الخطوط البيضه المرسومة عالطريق بتزحلق مع الفرامل والحوادايات و كمان البلاعات..
مشاكل بلدنا حاجتين: الطينة و الزيت و الاتنين مالهمش حل غير السرعة البطيئة و الانتباه الشديد
ملخص السواقة في المطر:
---------------------------------
- لازم الكاوتش يكون مش ممسوح و منفوخ كويس
- ماتكلبش ( لا تكلبش) عالجدون زيادة سوق عادي
- ممنوع استخدام الفرامل الامامية في المطرة و الرمل، فرمل بالخلفية بالتدريج و ساعدها بالامامية يشويش
- لو اتزحلقت منك ماتحاولش تعوض بالجادون، خليه و خلي راسك باصة لقدام و البايك هايعدل نفسه
- بالاضافة للكلام المنطقي من انك متزودش السرعة و تسيب مسافات زيادة و تلبس فول جير
افهم وزن موتوسيكلك و جرب بنفسك كتير لحد ما يبقى كل اللي فوق ده بالنسبالك اوتوماتيك
مثلا انا غيرت من تمانين سيسي وانا صغير ل متين وخمسين لربعمية .. و دلوقتي الف و تلتمية
و كل مرة اكنني باعلم نفسي السواقة من أول و جديد، ما تستعجلش و جرب لحد ما ردود فعلك تبقى صح كل مرة و مش محتاجة تفكير
Ride Safe, have fun, watch for your friends, watch out for the idiots and road conditions,
ربنا يحمي الجميع
هــــــــــشـــــام ســــــــــــــعد