الموضوع: حرام عليكم....كفايه يأس واحباط .. نظره موضوعيه!!!

المشاركة الأصلية كتبت بواسطة samo9992003

بس حضرتك نسيت تقول (على فكرة انا مش اخوان) فى اخر الموضوع عشان يكمل

جامدة

المشاركة الأصلية كتبت بواسطة hobiko

خلينا نتكلم بموضوعية على رأى صاحب الموضوع

الفكرة هنا فى كتير من الناس اللى بتنتقد الأخوان و الرئيس مرسى بتتلخص فى كذا حاجة

1) رفع سقف التوقعات ......

الأخوان خلال الأنتخابات الرئاسية و حتى بشكل أقل طبعا اثناء الأنتخابات البرلمانية ... سوقوا مرشحهم و نفسهم على أساس أنهار العسل اللى حتفيض على المصريين على حد تصريح واحد زى عصام العريان و ان مشروع النهضة اللى عكف على كتابته و دراسته اكثر من 3000 عالم و خبير هو الأمل اللى حينتشل مصر من الضياع و الفقر و المرض و حيحولها لدولة حديثة ناهضة فى وقت قصير و كلام من عينة ليه تنتخب شخص لما ممكن تنتخب مشروع و طائر النهضة سوف يحلق فى سماء مصر و الكلام اللى انتوا عارفينه

اللى حصل بقى على أرض الواقع ...... اننا اكتشفنا كذب هذه الأداعاءات و الوعود و الأحلام و المشاريع ...... لم يكن هناك اصلا ما يسمى بمشروع النهضة بأعتراف خيرت الشاطر و تناقلت و تناثرت الأقاويل عن ماهية مشروع النهضة الحقيقى و ما هى طبيعته و و كيف سوف يتم تنفيذه و ما هى خطوطه العريضة لنكتشف انه كان كله كلام فى الهوا و مجرد دعاية انتخابية و بيع للأحلام للبسطاء حتى يحصلوا على أصواتهم فى الأنتخابات

2) استمرار تطبيق نفس سياسات و ممارسات النظام السابق ............

النظام السابق كان بيستلف بالربا من الخارج و بيحمل الأجيال القادمة ديون ....... النظام الحالى بيعمل كده برضه
النظام السابق كان بيقلل الدعم عن الناس و بيزود ضرايب لسداد الديون الخارجية و الداخلية ..... النظام الحالى بيعمل كده برضه
داخلية النظام السابق كانت بتضرب الناس و تسحلهم و تموتهم افترا و ظلم ...... داخلية النظام الحالى بتعمل كده برضه
النظام السابق كان حاكم سيناء بالحديد و النار ....... النظام الحالى هربانة منه خالص و ربنا يستر على اللى بيحصل فى سيناء
النظام السابق ماكنش مخلى الجيش يضرب المواطنين و بيهددهم فى الشوارع ....... النظام الحالى بقى بيخليهم يعملوا كده
النظام السابق أطلق بلطجيته و مجرميه على المتظاهرين فى الشوارع ....... النظام الحالى أطلق ميليشياته على المتظاهرين فى الشوارع
النظام السابق كان اعلامه و مؤيديه بيهللوا و بيروجوا لأى عمل عادى على اساس انه انجاز و اعجاز و لم يسبق له مثيل و ان الشعب مبسوط و فرحان كذبا و زورا فى اطار صناعة الفرعون ....... النظام الحالى اعلامه و مؤيديه و حبايبه بيعمل نفس الموضوع بالظبط و برضه فى اطار صناعة الفرعون
رأس النظام السابق كان بيتحرك بجيش من التأمين و الحراسة و السارات و المدرعات ........ رأس النظام الحالى بيعمل زيه بالظبط

3) عدم وجود رؤية او خطة للمستقبل و عدم وجودأى خطوات جادة على الطريق السليم ........

طالب مش بيذاكر خالص و مقضيها لعب .. فى الأمتحانات الدورية الصغيرة بيجيب درجات ضعيفة و يكدب و يقول لأبوه انه جايب درجات عالية .... أبوه مش مصدقه و قاله يا ابنى انت كده حتسقط أخر السنة ..... فيرد الطالب تفائلوا بالخير تجدوه و استنى لأخر السنة لما تبقى النتيجة تطلع تبقى تقولى الكلام ده غير كده ماتقدرش تحكم عليا من دلوقتى

طب بذمتكوا ......... واحد مش بيذاكر حينجح ازاى ؟؟؟؟؟؟؟؟!!!!!!!!!

ده بالظبط اللى بيحصل مع النظام الحالى ....... انا مش باقول و لا حتى عايز انه فى شهرين تلاته و لا حتى 10 او 20 او 30 كل حاجة فى البلد تبقى فله و جميله و متطورة و ناهضة ....... أبقى مجنون رسمى لو قلت كده ...... بس انا عايز اشوف خطوات على الطريق الصحيح ...... خطوات تحسسنى اننا حنوصل فى الأخر ..... خطوات تحسسنى ان فيه وراها عقليه محترمة و دراسات متطورة و رؤية سليمة ...... مش كل ما أخطى خطوة اكتشف انها غلط اقوم راجع فيها تانى ....... و نفضل نضيع الوقت و الجهد فى المحاولة و الخطأ ........ و عمر ما فيه دولة فى العالم نهضت و تقدمت بالتجريب و اتخاذ القرار ثم دراسة تأثيراته و أبعاده بعد ذلك !!!!!

ده اللى مخلى الناس بتهاجم النظام الحالى ........ كل يوم قرار و يرجع فيه ..... كلام عن انجازات فى الهوا و نسب نجاح غريبة الناس مش حاسه بيها فى الشارع زى نسبة حل مشكلة المرور و مشكلة انبوبة البوتاجاز و مشكلة رغيف العيش .... قرارات أغرب عن اغلاق المحلات بدرى عشان توفير الكهرباء مع ان والله ما حتفرق فى ازمة الكهرباء حاجة قفل المحلات بدرى

4) مسودة الدستور اللى كانت من أسوأ ما يمكن و يتحملها التيار الأسلامى داخل اللجنة على حد كلام محمد محسوب عضو التأسيسية و وزير الدولة للشئون القانونية

دول موضوعين بيكلموا عن مسودة الدستور ...... يرجى مراجعتهم للتعرف أكتر على تفاصيل المسودة و الأنتقادات ليها

http://www.nilemotors.net/nile/316673-a.html

http://www.nilemotors.net/nile/314863-a.html

5) أزمة الكهرباء اللى حصلت الصيف اللى فات .........

بدون كلام كتير ......... انا عملت موضوع فى السابق بكلم فيه عن الأزمة و أبعادها و حلولها

أزمة الكهرباء فى مصر ...... المشكلة .. الحقيقة .. الحل - نايل موتورز - nilemotors.net

من الأخر و لغاية دلوقتى ....... مافيش اى حلول تم تنفيذها او البدء حتى فى تنفيذه و الصيف القادم أسوأ من الصيف السابق


ده بالأختصار كده ليه واحد زيى مش متفائل بالعقل و المنطق و بالواقع

مع احترامي لكلام حضرتك .... بس انا مش جاي القسم الاجتماعي عشان اجادل حد في السياسه... معظم ان ما كنش كل النقط بتاعت حضرتك اترد عليها في قسم احوال الشارع المصري

انا مش عاوز اجادل حد ... انا كل هدفي ان ققول للناس هنا ان لازم يكون عندهم امل في بكره... انهم لازم يعرفوا ان هي دي الدنيا مفيش حاجه من غير تعب وتمن

عاوزيين الحريه ... عاوزيين الكرامه...عاوزين العزه...عاوزين الحياه الكريمه... لازم نتعب وندفع التمن ونصبر ونشتغل باتقان .. هي كده ربنا خلق الدنيا كده

ما فيش حاجه اسمها ضربة حظ او مرسي معاه عصايا هيفرش الارض بالدهب .....مرسي نفسه عارف كويس ان مهمته في الرئاسه مش نزهه وشوية منظره بعربيات الحرس الجمهوري وانه هيطلع عينه ومش هينام لو عاوز فعلا يأدي الامانه

عن أبي عبد الله خباب بن الأرت رضي الله عنه قال: شكونا إلى رسول الله صلى الله عليه وسلم وهو متوسد بردة له في ظل الكعبة فقلنا ألا تستنصر لنا ألا تدعو لنا ؟ فقال : " قد كان من قبلكم يؤخذ الرجل فيحفر له في الأرض فيجعل فيها ثم يؤتى بالمنشار فيوضع على رأسه فيجعل نصفين ويمشط بأمشاط الحديد ما دون لحمه وعظمه، ما يصده ذلك عن دينه والله ليتمن الله هذا الأمر حتى يسير الراكب من صنعاء إلى حضرموت لا يخاف إلا الله والذئب على غنمه ولكنكم قوما تستعجلون " . رواه البخاري .

والله العظيم بكره هتروق وتحلى :), عمر ربنا ما هيضيع صبرنا ابدا

خليكم عندكم يقين وثقه في الله,,, لن يضيعنا الله ابدا

متتهزوش يا جماعه بحد يولول هنا ولا هنا ... ومتكنوش ابدا جنود لناشري الاشاعات وتحققوا من الخبر قبل ما تنشروه.. وده ما يمنعش لو في خطأ اتأكدا منه لازم طبعا نصصحه مش ندفن رؤسنا في الرمل زي النعام بس لازم ناخد بايد بعض ونحوال ننجح البلد

بس كده .. فكروا كويس قوي يا جماعه ومتخليش حد يستغلك من غير متشعر

طبعا كعادة المواضيع من النوعية دي
الراجل بيدعو للتفاؤل والعمل والبعد عن الهدم
وبقدرة قادر الموضوع ينط فيه
المولولون والمعددون والمتشامون والشامتون
ونفس الكلام ونفس المبررات
لا حياة لمن تنادي
الخلاصة
انا اكتشفت ان كتير اوي من الناس
بتكرة الاخوان اكتر ما بتحب البلد
ودول فعلا والله اللي هيضيعو البلد
لانهم عندهم استعداد البلد تولع والاخوان والسلفيين والتيار الاسلامي بصفة عامة يسقط
بس لو البلد وقعت هتقع على دماغهم اول ناس

المشاركة الأصلية كتبت بواسطة تامر.محمد

اه فيه بلاوي و غلطات تودي في داهية

لكن كمية الولولة غير طبيعية

طيب ممكن نعرف .. كمية الولولة الطبيعية ؟!