ظافر بدال دبرياج 132

**ziours** · 06-11-2012 01:22 AM

انا ياجماعة كنت عليت الدبرياج عندي سنه عشان كان وطي وكان قارفني في النقل بعد ماعليته شويه مشيت دقيقتين بالعربية واذ الاقي الدبرياج غطس لجوه في ارضية العربية وماردش تاني جبت الميكانيكي وحل البدال ولاقينا الظافر ده مكسور طبعا قعدت ابهدل الميكانيكي واقوله انت السبب لانك عليته زياده وهو يحلف ايمنات المسلمين ان ده العمر الافتراضي للظافر انتهى مش عارف كلامه صح ولادي اشتغالة المهم روحت لحمته ورجعت للميكانيكي تاني عشان يركب البدال تاني والواير تاني طبعا كان يوم مايعلم به الا ربنا ركب الميكانيكي وخلص وجيت اجرب تمام مافيش مشكله لاكن النهارده الصبح لاقيت العربيه سحبها زي الزفت وتقيلة ولما تسخن شويه الاقي رجه خفيفة في الطلعه رجعت للبيه تاني لاقى العجله اليمين الاماميه تقيله وسخنه مسكت في خوانيقه وحلف ان الدبرياج ماالوش علاقة بتقل العجلة وان دي مشكله فرامل هل كلامه صح ؟
اسف جدا على الاطاله بس نفسي اطمئن

**misoalex** · 06-11-2012 03:00 AM

انا شايف ان المكانيكى ملوش اى زنب على كلامك

تعليه الدبرياج دى عباره عن مسمار بيتربط فى اخر كابل الدبرياج ولو عاوز تعليه بتربط الصاموله ولو عاوز توطيه بتفك الصاموله
انا كنت بعملها بنفسى فى ال 128 زمان

انت اكيد البدال عندك كان واطى من الاول بسبب انه مشروخ وعلى وشك انه يتكسر او كان سليم فعلا بس لما انت عليت الدبرياج مستحملش واتكسر لان عمره الافتراضى انتهى

اما لو الرجرجه دى مش من العجله (وده احتمال وارد جدا ) يبقى طقم الدبرياج عندك (ديسك واسطوانه وبليه ) هو كمان مش مستحمل وعمره الافتراضى انتهى وعاوز يتغير

وبالنسبه للعجله اللى ادام لو فعلا هى اللى قافشه وعامله الرجرجه فدى برضه ملهاش اى علاقه بالدبرياج دى بتبقى جهاز الفرامل قافش وعاوز يتنضف ويتزيت او يتغير لو بايظ