ملحوظه: انا وضعت الموضوع في القسم الاجتماعي لانه موضوعي كوميدي اسود و ليس سياسي بحت و ارجو ان لا يتم نقله
في خلال الايام الماضيه قبل سفري من مصر سمعت كلام من بعض الاشخاص الذين لهم علاقات ببعض ان القضاه ان النائب العام قد بدأ في فتح تحقيق جدي حول نتيجه الانتخابات الرئاسيه و حول موضوع المطابع الاميريه فخطر في بالي ذكر احد حالات توجيه اسر "العسكريين" لانتخاب احد مرشحي الرئاسه (بدون ذكر اسماء عشان عارفين هو مين)
تلك الحاله حدثت معي شخصيا بعد محاولات حثيثه من والدي (لواء جيش متقاعد) لتوجيهي انا و اخي لانتخاب احد مرشحي الرئاسه
قبل الانتخابات بعده ايام قد سمعت من ابن عمي باجتماع موسع بقياده والدي و عمي (هو ايضا لواء جيش متقاعد) مع الاسره الكريمه و اظن السبب معروف لدي الجميع و لكن حدثت مشاحنات بين والدي و بين والدتي و اختي و زوجها لانهم كانوا يريدون انتخاب الدكتور عبد المنعم ابو الفتوح
لم اعلق علي هذا الموقف نظرا لمعرفتي الوطيده بوالدي و عمي و ايضا لاني لم اتوقع ان يحدث توجيه شخصي لي و لاخي العزيز
قبل ميعاد الانتخابات للمقيمين خارج مصر ب 24 ساعه حدث هذا الموقف الكوميدي الاسود
التوقيت: الساعه 8 مساءا بتوقيت لوس انجلوس و ال 6 صباحا بتوقيت القاهرهالمكان: غرفه معيشه منزلي الحبيبالوصف: جالس انا العبد لله و زوجتي و الاولاد نشاهد التلفاز و ناكل الفيشار بالمناسبه كنا نشاهد احدي افلام الرعب المخيفه ذات تقييم rنظرا لانها المفضله لدي اطفالي (عيال عندهم سنه و اتنين و بيحبوا يتفرجوا علي افلام رعب بتقييم rو لا تعليق)شخص ما يرتدي عباءه سوداء و "شايل بلطه و عمال يطير في رقاب الممثلين يمين و شمال وسط فرحه العيال بموضوع تطير الرقاب ده"
هاتفي يرن فقلت الحمد لله حتي اقوم من امام "كميات الدم اللي عمال يتطرطش و كميات الاعضاء البشريه اللي عماله تتحدف و العيال فرحانه"
العبد لله: (بالانجليزيه بمنتهي العفويه) كيف حالك يا والدي؟والدي: متتكلم عربي زي الناس يا ................. (شتيمه زي الفل)العبد لله: حاضر يا سياده اللوا ... ايه اخبار حضرتك و اخبار ماما ايه ؟والدي: ماما؟ كتها نيله اللي عايزه خلف شبه خلفكوا ... قال ماما قالالعبد لله: (دمي بدأ يفور بسبب التهزيأ و انا شعري شاب بس اسمه ابويا برضه) انا اسف ... تحت امرك يا حاج
والدي: الانتخابات عندكوا بكره صح؟العبد لله: (باستهبال لاني عرفت المكالمه رايحه علي فين) انتخابات ايه يا حاج؟والدي: انتخابات رئاسه بلدك يا ................... ( شتيمه زي الفل بس مختلفه عن الاولانيه عشان المصداقيه بس)
العبد لله: اااااااااااااه معلش يا فندم و الله نسيت ... الشغل متلتل علي دماغيوالدي: حوش كتر الشغل حوش ... كأنه الوحيد اللي بيشتغل ... المهم تروح بكره انت و مراتك تنتخبوا ............
قبل ما اكمل المكالمه احب اعقب علي ما يحدث في الفيلمالبلطه بتطير ناحيه الكاميرا و تقريبا الكاميرا قد تهشمت و رقبه المصور انفصلت عن جسده "و الدم عمال يطرطش علي الشاشه و العيال مازلت فرحانه و بتضحك مش عارف علي ايه" و زوجتي "ميته من الضحك بسبب طريقه كلامي و تعبيرات وشي"
العبد لله: مراتي مين بس اللي تنتخب ؟ مش كوسه هي يا حاج يعني
الوالد: اه صحيح معلش نسيت ... و مغلطناش في البخاري يا سيدي ... خلاص تروح لوحدك و تنتخب .......
العبد لله: بس ده فلول يا فندم و ........
الوالد: ( يقاطع كلامي بسمفونيه من الشتائم اللي زي الفل و المشكله ان مفيش شتيمه بتتكرر ابدا و ده برضه عشان المصداقيه) فلول مين ياله؟ انتوا تفهموا ايه في السياسه اصلا؟ مش كفايه خربتوا البلد و و و و و (السمفونيه اياها بتاعت الفلول او حزب الكنبه ايهما اصح)
العبد لله: يا فندم احنا عايزين دم جديد و بعدين المرشح بتاعي انسحبوالدي: مين ده ان شاء الله؟العبد لله: الدكتور محمد البرادعيوالدي: (بلهجه اقل حده) اه هو راجل محترم و مشرفنا بس يا بني البلد دي مينفعش يمشيها الا الجيش و انت عارف كده كويس
العبد لله: احنا جربنا الجيش 60 سنه و خربوا البلد يا فندم و خلونا نعيش في تخلف و لا حضرتك شايف ان البلد كويسه؟
والدي: ( كلام يعف لساني عن ذكره و مخي يعف عن تخزين الكلام ده اصلا )
العبد لله: هدي نفسك بس يا سياده اللواء
"مراتي وقعت طبق الفشار علي الارض من كتر الضحك بسبب منظري اللي شبه الكتكوت المبلول" و ما زال تقطيع الرقاب ساريا في الفيلم (واحده بتاخد البلطه في جنبها و بتتقسم نصين و الحياه زبادي في الخلاط و العيال بيهيصوا لسه)
والدي: بكره تعمل اللي قولتلك عليه مفهوم و لا لأ؟العبد لله: يا فندم مينفعش الكلام ده و الله و بعدين ازاي حضرتك بتقولي انتخب مين و منتخبش مين؟ انا مش عيل صغير يا حاج
والدي: انا ابوك و عارف مصلحتك اكتر منك فتعمل اللي اقولك عليه و انت لسانك في بقك
العبد لله: (انا علي وشك الانفجار) تحت امرك يا فندم ... اي اوامر تانيه؟
والدي: متشكرين يا ............... هكلم الزفت التاني دلوقتي (الزفت التاني ده هو اخويا و دكتور و في نص التلاتينات و متجوز و عنده 3 عيال و بيتقاله زفت و لا تعليق) "و بكره بعد ما تخلص تكلمني" ( علي اساس اني رايح اقتل واحد مش رايح انتخب)
العبد لله: ( طنطاوي استايل) اه طبعا
و كالعاده سياده اللواء "رزع السماعه في وش امي" و .... لحظه لانه يوجد ممثله ما مازالت حيه ترزق و تطلق الرصاص بغزاره علي الشخص ذو العباءه و لكن يبدو " انه مش بني ادم اصلا لان ابن ............ مش راضي يموت"
بعد هذا الفاصل الكوميدي الاسود اتسائللماذا فعل "العسكريون" هذا مع العلم انهم "هيفضلوا عايمين علي وش الفته حتي لو اليهود حكموا مصر" ؟ لا اجد اجابه مقنعه لهذا السؤال
الرجاء مراعاة أنتقاء الألفاظ حتى لا تعرض نفسك لعقوبة الأيقاف
فمثل هذه الألفاظ لا يسمح بتادولها على المنتدى
م ع 3
