تلك الجمله الكاذبه التي يقولها معظم الاباء عندما يتقدم شاب مغفل لخطبه ابنته المصون و تعتبر تلك الجمله عباره عن صندوق كبير يحتوي علي مصائب سوداء علي "دماغ العريس و علي دماغ اللي خلفوا العريس" فعلي سبيل المثال لا الحصر عند فتح ذلك الصندوق اللعين:

المصيبه الاولي : "البنت لازم تسكن في شقه في التجمع الخامس" و كأن هذا التجمع هو قطعه من الجنه او من يسكن فيه سوف يدخلون الجنه حتما

ما مشكله السكن في شقه بعقد ايجار و حتي ان كانت في حي شعبي او حي متوسط؟ ما المشكله في شراء شقه في حي متوسط او حتي حي شعبي؟ ما مشكله مشاركه اهل العريس و العروس في شراء شقه هذا التجمع؟ مع العلم انه يجب علي العريس تجهيز "عش الزوجيه" كما قال الشرع و لكن الظروف اصبحت سوداء سواد كاحل

المصيبه الثانيه : "لازم تجيب شقه جمبنا" و كأن العروس سوف تأخذ الرضعه من والدتها يوميا بالرغم من تخطي العروس سن الرضاعه بالتأكيد

و لا ننسي ان الام سوف تتواجد في منزل ابنتها باستمرار لبدء مسلسل خراب البيوت او لاعطاءها تلك الرضعه او لمساعدتها في امور المنزل "لان البنت متدلعه و مبتعرفش تطبخ و لا حتي تسيأ السيراميك" و ايضا لا ننسي ان في لحظه اي مشكله بين الزوجين سوف تجمع الفتاه حاجيتها "في اي بؤجه و طيران علي بيت ماما ما هو جمبنا"

المصيبه الثالثه : "لازم تجيب شبكه ب 50 الف جنيه" و كأن العريس سوف يخطب احدي بنات المملكه المتحده او ان العروس هي الوحيده من نوعها في البلد او ان العروس مزوده بخاصيه الطيران مثلا

و يتناسي الجميع كيفيه حصول العريس و اهله علي مبلغ فادح كهذا في تلك الظروف السوداء

المصيبه الرابعه : "لازم تجيبلها شبكه زي بنت عمتها كده" و كأن بنت عمتها تلك اصبحت هي مثال لكل فتيات البلد "و في الاخر هتلاقي بنت عمتها دي اصلا رقاصه و اللي متجوزها واحد تاجر بانجو"

المصيبه الخامسه : "لازم تعمل فرح في فندق هيلتون" و كأن باقي قاعات افراح البلد "بيئه و معفنه" او ان تلك القاعه لا يتم دفع ثروات باهظه فيها او كالعاده ان تلك القاعه هي الوحيده من نوعها في مصر او ان تلك القاعه بها مليون دولار "حلال علي العريس و امه"

المصيبه السادسه : "مفيش حاجه في الطريق" و كأن موضوع الحمل و الولاده بأيدي العروسين لا بأيدي الله عز و جل

يتدخل الجميع في هذا الامر و يحدث ضغط نفسي علي الزوجين و يتناسي الجميع صعوبه الحصول علي اموال لتربيه الاولاد و يتناسوا ايضا ان تربيه الاولاد في هذا الزمن مهمه شبه مستحيله

المصيبه السابعه : "لازم تمضي علي القايمه" و كأن العريس بيشتري غساله ايديال زانوسي بالقسط و بالطبع العريس المغفل بيوقع علي تلك القائمه الحقيره بمنتهي البلاهه و "هو مش عارف انه بيمضي علي مبالغ و حاجات توديه اللومان هو و اهله"

اللي حصل معاه كده يخبط لايك و خلينا مننساش اهم حاجه ان ايديال زانوسي بقت زانوسي