كنت بفكر ابيع شقتى و اجيب حاجة كدة فى المدن الجديدة و كنت محتار ما بين الشروق والعبور فكنت عاوز اعرف مميزاتهم و عيوبهم و توافر المواصلات من و الى كل واحدة فيهم لو العربية عطلت ولا حاجة و متوسط سعر المتر لو حد عنه خلفية
بانتظار ردودكم
كنت بفكر ابيع شقتى و اجيب حاجة كدة فى المدن الجديدة و كنت محتار ما بين الشروق والعبور فكنت عاوز اعرف مميزاتهم و عيوبهم و توافر المواصلات من و الى كل واحدة فيهم لو العربية عطلت ولا حاجة و متوسط سعر المتر لو حد عنه خلفية
بانتظار ردودكم
العبور طبعا افضل والفرق كبير
والاسعار هناك مش عاليه اوى
يعنى ممكن تلاقى حاجه 75متر
تدفع مقدم 65 الف
و400ج لمده 20 سنه (مدينه جديده اسمها جنه العبور)هو عباره عن حى جديد
انزل هناك ولف لفه على مكاتب السماسره
من وجهة نظرى الشروق افضل لانها المدينة الوحيدة التى خطتت لتكون سكنية فقط بعكس كل المدن الجديدة التى خطتت لتكون سكنية وصناعية بالنسبة للاسعار معنديش فكرة مع العلم ان العبور اقرب طبعا ولكن صناعية وسكنية وللعلم انا غير مقيم فيها ولكن معجب بالشروق دة من جهة نظرى مع كامل احترامى لكل الاراء
العبور طبعا أفضل بكتير
متوسط الأسعار من 1500 - 3000 / م2
العبور مدينة أكثر من رائعة
اى استفسار تحت أمرك 01223341501
صراحة أنا من سكان مدينة العبور . وشايف أن الشروق هيكون ليها مستقبل أفضل . خصوصا ان بحس أن نوعية ساكني مدينه الشروق أعلى إجتماعيا من العبور
الشروق افضل
تخطيطها سكنى بس - ارقى فى المستوى - ملهاش امتداد مستقبلى - على طريق السويس و الاسماعيليه - تخطيطها بيئيا كويس - قدامها مدينتى
اسعار معرفش للاسف
بالنسبة للاتنين انا شايف ان عيب الشروق حالياً انها بعيدة جدا عن اقرب حاجة للبلد اللى هى لو هنقول الماظة او مدينة نصر
لكن العبور قريبة اوى وبالذات بعد الكوبرى الجديد اللى عملوه فوق موقف العاشر بقى الحياة هناك عمار اكتر ده غير انك فى العبور فية جميع توكيلات العربيات فى بلدك صيانة وقطع غيار وكمان عندك مولات زى جولف سيتى مول تقريبا اللى فية كارفور لكن الشروق لحد دلوقتى تحس انها صحراء شوية ودة راى
مجرد تعليق على موضوع المسافه و البعد .. المسافه من العبور للشروق على طريق اسماعيليه 10 كيلو ... المسافه من طريق اسماعيليه عشان توصل لاماكن فى العبور بتعدى ال 10 كيلو فهى هى ... بالعكس الشروق تتفوق انك ممكن تخرج من ناحية طريق السويس
الاسعار فى الشروق فى الاكماكن الكويسه (اللى يتسكن فيها فى خلال سنتين مثلا) من 1800-2000 تقريبا
طبعا فى حاجات ارخص بس هتحتاج تنزل تلف لفه
شكرا لكل الردود وانا فعلا امبارح نزلت بصيت بصة كدة فى الحى الخامس والسادس والتاسع فى العبور والى حد كبير حسيتها كويسة وععمرانة شوية عن الشروق اللى رحتها من شهرين او اكتر
وخصوصا ان العبور فيها مرافق وخدمان و مدارس اكتر بكتير من الشروق ودة يمكن لانها اقدم ودة ممكن يحصل فى الشروق بس قدام شوية
ياريت بقى لو حد يعرف اية الاماكن و الاحياء الكويسة فى العبور و يكون المتر فيها لحد 1700-1800 ودى اقصى اسعار شفتها فى اللفة السريعة امبارح وكان منها بتسهيلات كمان
ليا اخ فالعبور وهي جميلة جدا
ولكن مع ذلك شايف الشروق افضل بفارق بسيط ..
العبور افضل
يا ريت لو حد اتعامل مع شركة محترمه سواء في الشروق او العبور يفيدنا
انا عايز شقه استلام فوري وبالتقسيط
لفيت في الشروق والعبور ودخت السبع دوخات ولسه ما لقتش حاجه تناسبني
مش هتلاقى تقسيط كويس لو استلام فورى
المعتاد بيديك سنه بعد الاستلام
فى بريدج قدام مستشفى حسبو فى مدينة نصر شفت عندهم حاجات كويسه فى الشروق
بانتظار مزيد من الاراء
روح على شركة مصر الجديدة للإسكان والتعمير ... أمام قصر الرئاسة بمصر الجديدة .... عندهم شقق فى مشروع نزهة العبور مساحات تتراوح بين 127 م إلى دوبلكس 240 م ...مقدم 20% و تسليم فوري ... والباقى أقساط شهرية على 6 سنوات بدون فوائد .. أو 10 سنوات بفائدة 7% .... لكن سعر المتر يبعمل حوالي 2100 ج ... أنا ملم بالتفاصيل دي لإنني لسة واخد شقة منهم .... هي غالية شوية بس أنا دفعت 80 الف وخدت شقة 192 م .... والباقي هاتسدد عل 6 سنوات بدون فوائد ... أنا شايفها صفقة كويسة .. وبالتوفيق إن شاء الله
وفى كمان ... كمبوند زهرة العبور (تنفيذ الشركة السعودية) ... رائع المستوي ... والسداد 50% وإستلام والباقى 50% على 5 سنوات ... لكن المساحات أقل والسعر 2200 ج تقريبا .. لكنة كمبوند ممتاز ... سور وأمن وحدائق ومول ومسجد ... تحس إنة فى التجمع مش فى العبور
انا شفته الصيف اللي فات .. هو كويس .. بس غالي اوي كشقه في العبور .. وكمان الكمبوند بعيد عن الطريق الرئيسي اوي ... يعني من طريق الاسماعيليه للكمبوند كانك مسافر
والسعر كان 2450 جنيه للمتر ... 50% مقدم و 50% على 3 سنوات بدون فوائد او 5 سنوات بفائدة ( مش فاكر كام )
..
المساحات المتاحه : من 57 م ... 89 م ... 98 م ... 102 م ... 111 م ... 116 م ... 140م ... 145 م ... 165 م
بس حد عنده فكره عن سمعة الشركه دي ؟ السعودية المصرية للتعمير
طيب هل العبور اقل من التجمع بفرق كبير ولا بسيط؟؟؟ لان اسعار التجمع اغلي بكتير!!! بعني في التجمع متوسط سعر المتر ٣ الاف!!! يا ريت اللي شاف الاتنين يفدنا
نص تشطيب
العبور اقل من التجمع بكتير
طبعا فى بعض المناطق عاليه بس المجمل التجمع بيعتبر اعلى كتير
فى أماكن فى العبور لا تقل عن التجمع فى شيئ ولكنها قليلة ... (الحى السابع والسادس- الجولف - الجولف هاوس - منطقة ال 800 متر - كمبوند زهرة العبور) ... الجولف هاوس مثلا المتر فية 4000 ج ؟؟؟
ما عدا ذلك دون المستوى أو يحتاج سنوات لكي يعمر .... مشكلة العبور الوحيدة والكبري فى وجهة نظري هي طريقها ... الطريق لما بيقفل بيبقى مصيبة ... لكن التجمع له مداخل ومخراج كتير جدا
للأسف مش معاية .. ومش هايفيدوك بحاجة فى التليفون ... دي شركة حكومية!
تمام حضرتك ... التجمع (سمعة + عدد كبير جدا من الكمبواندز المغلقة + عدد مهول من الفيلات + عدد رائع من المحاور والمداخل والمخارج ..... ثم الرحاب!!) .... لو الحكومة تستفيق من الأن وتعمل نفق من العبور عرضى يوصل مباشرة إلى الطريق الدائري ... تبقى تمام ... لكنك لو فى العبور وعايز توصل الدائري لازم تتطحن فى طرق متكدسة ... لكن التجمع .. خطوتين وتبقى فى الدائري
طب وبالنسبة للمواصلات و مدى توفرها لو الواحد عربيتو عطلت ولا حاجة؟
انا شايف الشروق افضل فى المستقبل من العبور
يعنى 3 سنين كمان والشروق هتبتدى تبقى مدينة شغاله
لانها دلوقتى فعلا صحرا " او دا الى شفته لما رحتها "
واللى معاهوش عربيه كويسة هناك هيغنى ظلموه
لان المواصلات قليله جدا فعلا
العبور فيها اماكن واماكن ,,, وكل منظقه ليها سعرها
هل من معلومات اضافية
متابع
صراحة انا شايف العبور فى المستقبل تبقى احسن خصوصا بعد بناء جامعة عين شمس هناك
وعندك احياء ممتازة جدا هناك بس الاسعار عالية شوية فى السادس والسابع
شباب السلام عليكم و رحمه الله
انا واقع في نفس المشكله الازليه بتاعت اي حد بيدور علي شقه في ايامنا الحلوه دي
انا من سكان مدينه نصر و شغلي مرتبط ما بين مدينه نصر و مدينه بدر
فكرت في منطقه الزهراء خصوصا العماير اللي ورا الصف الاول من الحته اللي فيها زي ما يكون سوق كده
المربع السكني الممتد من اخر مترو مصطفي النحاس شمال لحد ما تطلع الشارع الرئيسي معلش الاسماء هربانه مني دلوقتي
حاسسها عماير نضيفه و منطقه سكنيه معقوله و ان كنت معرفش الاسعار ولا انظمه السداد هناك
نيجي لحاجه تانيه و هي اطراف الزهراء الملقبه بمساكن الالفينات و ان كانت المساحات صغيره لكن الشقه ب 200 الف و في كلام ان في مشروع جنبه الشقق فيه 3 اوض و بتزيد حوالي 20 الف تقريبا
مشكله العماير دي عدم وجود اسانسيرات و ان كان المنور زي ما يكون مؤهل لتركيب اسانسير
مشروع عمائر مدينه نصر و ده مش بعيد قوي يعني و ان كان في كلام منتور علي النت ان الشركه نصابه من حيث المساحات صافي و معلن عنها و الله اعلم لسه مرحتش اتفرج ولا ليا علاقه بالشركه اصلا
طبعا الشروق و ان كنت معرفش فيها كتير لأني كل ما ادخلها و ابعد عن الجهاز و الجامعه الفرنسيه بتوه لحد ما الاقي نفسي خارج من حتت معرفهاش
و حاليا بيوسعو طريق السيوس الصحراوي في خطوه متأخره لكن جت في وقتها لأن تسليمات مدينتي بدأت و مظنش ان الطريق هيفضل مهمل كده و اظن ان دي فرصه للي عايز يسكن في مدينه واسعه و نضيفه و هاديه و خايف من جوده و سمعه طريق السويس الحسنه بالذات التريللات المجنونه عليه
و لسه شايف اعلان عن هليوبلس الجديده منطقه فيها اسمها الكوربه الجديده, مدينه هيلوبلوس دي مدينه بعد الشروق 3 بين مدينه الشروق و مدينه بدر
ممتده زي الشروق من السويس لغايه الاسماعيليه
و دي ميزه عارف قيمتها كويس سكان العبور اللي بيقضو وقتهم كله علي طريق الاسماعيليه ذو المداخل و المخارج الغبيه
الاعلان بيقول 47 الف تقريبا مقدم و الباقي اقساط 450 جنيه تقريبا لمده 10 سنين
طبعا عرض مغري جدا و لو لقيت زيه في الشروق يبقي اوكي لكني سمعت كلام مش حلو عن ان الشروق حر و جوها مكتوم ده غير اني محستش ان الشروق مخططه كويس و الله اعلم يمكن متقسمه بطريقه معرفهاش
و في مساكن المصريه السعوديه في اخر الاوتوستراد الصف التاني متاخمه لمستشفي الكهربا
مساكن قريبه مش بعيده و اظن مستواها معقول لعد اختلاطها جغرافيا بالهجانه و مشاكلها المزمنه مع احترامي للسكان هناك
لكن معرفش لا مساحات ولا انظمه سداد و سعر متر هناك خالص
بصو بقي
ياريت اللي فعلا عارف كويس ميبخلش بمعلومه صحيحه علي اخواته
انا داخل علي ارتباط و محتاج شقه في حدود 200 الف قابله للزياده البسيطه علشان مجيش علي الكاش كله و اقدر اشطب و افرش و تقسيط الباقي
فمحتار ادفعهم في حته زي العاشر مع كرهي للشارع الرئيسي المزدحم بالباعه و الميكروباصات و احاول اسكن و اتعايش مع الدائري و ده حل مقبول نوعا ما بسبب قربه كمسافه بين كل شيء
او عمارات المصريه السعوديه
او في حد قالي عن العمارات اللي قبل العبور و سعر المتر هناك ب 1050 جنيه!!!!
طبعا سعر ممتاز لكن للاسف مش قادر اقنع نفسي بسبب طريق الاسماعيليه الخانق و ازدحام المرور عليه و توقفه اغلب الاوقات
ياريت اللي يقدر يساعدني يتفضل و بجد متشكر جدا
امضاء مواطن مصري زي اغلب الناس محتار
عندي شقة سوبر لوكس 136 متر دقائق من كارفور العبور بسعر تحفة جداااااااااا وبالمطبخ جديد
الاتصال على 01006491676 للاستفسار على الشقة
انا عندى شقة فى كمباوند زهرة العبور 165 م2 و خالصة السعر من الشركة المصرية السعودية و العقد معايا و جاهزة للتسليم منى للمشترى ت : 01001027702 و بسعر ممتاز