امتى يكون الدبرياج عايز يتغير

**abdulhafeez** · 08-11-2012 12:42 PM

ازاي اعرف ان طقم الدبرياج عندي محتاج يتغير ..... والطقم تقريبا بيعيش قدايه كام سنة او كام كيلو تقريبا ؟؟؟

**Amr Axel** · 08-11-2012 01:46 PM

بالنسبة العمر الافتراضي لطقم الدبرياج ده بيعتمد ع ظروف القيادة و طريقة القيادة نفسها
يعني واحد طول الوقت وسط البلد او بيعلق رجله ع دواسة الدبرياج او بيتعافي ع الدواسة كل ده بيأثر ع العمر الافتراضي
عكس مثلا واحد طول الوقت طريقته مفتوح رجله خفيفة ع الدبرياج مبينقلش كتيير ده العمر الافتراضي اطول
و اعتقد غالبا ع ما اسمع انه بيكون في حدود 80-100 الف كيلو المتوسط و يعتمد زي مقولت ع الظروف السالف ذكرها

بخصوص امتي يتغير لما تظهر اعراض انه خلاص بيخلص d:
يعني مثلا رجرجة ع الأول و انت طالع مع ضعف سحب العربية مثلا العربية من سرعة 80 بتزيد بالعافية و كأنها بتزحف تشم ريحة شياط و انت ماشي و بتنقل و ارتفاع صوت الموتور مع ضعف السحب مع مراعاة ( ان كل الصيانات في مواعيدها و كله تمام و فلتر الهوا متنضف و كل الفلاتر و البوجهيات كله تمام يعني لأن فيه ناس فلتر الهوا يبقي شبه مسدود اساسا و بيستعمل بنزين سئ و منضفش الرشاشات ويقولك العربية تعبانة و طقم الدبرياج بايظ ) و هكذا

و فيه اختبار بسيط لتقييم حالة طقم الدبرياج انك تجيب ع الرابع و انت واقف و تحاول تطلع بالعربية لو بطلت يبقي الدبرياج سليم لو اتحركت يبقي الدبرياج ده خلاص بيودع

**hemaa_82** · 08-11-2012 03:39 PM

بصوا يا اخوانا

الدبرياج لو طلع علي الرابع يبقي شغال ... و لو بطلت علي الرابع و مطلعتش خالص برضه شغال ... لان في الحالتين نقل الحركة تم بس في الاولي المتور حرك العجل و في التانية الثبات بتاع العجل وقف المتور

انما لو ال ار بي ام بيعلا و العربية ما بتتحركش والفتيس علي اي غيار يبقي مفيش اساسا دبرياج .....

ايام عزيزة 128 لما كانت الاسطوانة في الكنافة كنت بدي الغيار و هية و راحتها بقي يا تتحرك يا نستني شوية :)

**bassem.naguib** · 08-11-2012 07:40 PM

أمتى الدبرياج يتغير :
1) ضعف في السحب بصفة عامة بالنسبة للـ rpm
2) قلة كفاءة العربية في صعود طريق منحدر
3) لو في الأواخر حتشم ريحة مميزة (مش عارف أوصفها)

العوامل المؤثرة على الدبرياج :
1) ظروف الطريق .. يعني لو أنا ساكن في منطقة زي المقطم مثلاً .. أكيد حيكون العمر الأفتراضي لطقم دبرياج العربية أقل من العمر الأفتراضي لنفس العربية طريقها مستوي .
2) أسلوب القيادة نفسه .. زي الفرك والتفحيط .. أسلوب قيادة هادي أو رياضي .
2) سند (ترييح) القدم اليسرى على دواسة الدبرياج أثناء سير العربية يقلل من العمر الأفتراضي لبلية الدبرياج .
3) كثرة تحميل السيارة بأفراد أكثر من حمولتها المقررة .. أو كثرة جر سيارات أخرى (شائعة في العربات النقل أو نقل الركاب)