أول حاجة أحب أسلم علي أعضاء المنتدي المحترم..

انا شفت المنتدى من3 أيام وعجبني التجاوب فيه والخبرات الممتازة اللي فيه

انا إتوفر معايا مبلغ حوالي 8000 جنية وقلت بدل ما يقعدوا معايا ويتصرفوا واحدة واحدة أحطهم في حاجة تنفعني وتفضل موجودة

بعد البهدلة اللي في المواصلات وأوقات تنزل من البيت متعرفش تركب ولا تاكسي ولا سيرفيس ولا أوتوبيس طبعا وأزمة البنزين والسولار والحاجات اللطيفة اللي بقت في كل مكان في مصر قلت أشتري فسبا خصوصا إني لما ربنا بيوفقني أركب سرفيس أو تاكسي وتلاقي الطريق واقف بتلاقي اللي عارف يسلك ويمشي هو اللي بيكون معاه فسبا

فقررت اجيب فسبا زيرو لأني لسه جديد في الفسب والموتوسيكلات ودي أول حاجة ليا ومش عايز يتضحك عليا في مكنة تقرفني وتكرهني في كل المكن وكل يومين أروح للميكانيكي وده يشتغلني وده ينصب عليا

معلش انا طولت عليكم المهم إستقريت علي الفسبا الكريستالة و كان سعرها 7200 هنا في بورسعيد وده أفضل سعر لاقيته وكان عند وكيل إل إم إل هنا في بورسعيد

رجت للمخزن وراني الألوان أخترت لون جديد مش منتشر...أقرب ما يكون لللون المشمشي

المهم حجزت المكنة ومكنش معايا فلوس مصري قالي خلاص هات ورقة ب100 دولار تحت الحساب

دفعت ال100 دولار وإتفقت معاه الإستلام يوم الأحد...قالي بس علي فكرة الورق بيتأخر15 يوم

بس في كام حاجة قلقاني

أول شئ هل طبيعي إنه يأخد مبلغ تحت الحساب بدون ما يديني إيصال أو شئ؟

تاني حاجة هل موضوع تأخير الورق ده طبيعي ؟ ولو طبيعي وانا أخدت المكنه ومشيت مش ممكن أي حد يسألني علي ورقها؟

كمان هل في شئ من الكماليات تنصحوني أشتريه مع المكنة؟

المفروض وانا رايح أستلم المكنة أخد معايا زيت أو بنزين او حاجة من الحاجات اللي هأحتاجها علشان أدور المكنة

كمان يا ريت تفيدوني بنوع الزيت المناسب للكريستالة وإيه الحاجات اللي أخد بالي منها في المكنة


أسف علي أسئلتي الكتير واللي بعضها ممكن يكون ساذج

لكن لثقتي في خبرتكم و ردودكم المحترمة أنا فتحت الموضوع وسألت كل الأسئلة اللي عندي