أهرام يوم الجمعة - عندما تتحدث الأموال

**OlaOsman** · 11-07-2008 03:31 PM

لما نفتح جريدة الأهرام بتاعة يوم الجمعة بنلاحظ كم الإعلانات اللي طاغية على أي أخبار ممكن تحاول تقراها في جريدة. اللافت للنظر اليومين دول و في عدد النهاردة بالتحديد هو كم الصفحات المخصصة لشركات التنمية العقارية.. تحس ان مصر دي في خلال 5 سنين هاتبقى دبي شمال أقريقيا :)

من حوالي 8 سنين او اكتر كنا لما نيجي نحجز إعلان لشركتنا كنا بنلاقي ثمن الإعلان في أي صفحة من صفحات 7 أيام رياضة أغلى بكتير من الصفحات التانية، فكنا بنفضل ان إعلاننا يكون في أي صفحة من اللي في الأول.. اللي يغيظ بأه هو ان الأهرام لسه رافعين سعر الإعلان في صفحات الرياضة، بالرغم من انها ما بقتش صفحات رياضة أصلا.. يعني ما أظنش ان خبر رياضي من 5 أسطر في صفحة بيخلي الصفحة دي صفحة رياضة. الأول كان المبرر لرفع سعر الصفحات دي هي إقبال الناس على قراءة أخبار الرياضة و بالتالي فرصة الإعلان انه يتشاف بتكون أكتر من الصفحات التانية.. انما دلوقتي الوضع هو تقلص أخبار الرياضة في الجريدة و إحلال الإعلانات محلها.. يبقى كده الصفحات دي تبقى صفحة إعلانات مش صفحة رياضة.. بس الظاهر ان الموضوع مسميات و خلاص عشان الحصول على كم أكبر من الفلوس.

بس برضه ارجع و اقول لنفسي، يعني اللي بياخد بالصفحة و الاتنين في أهرام الجمعة هاتفرق معاه كام ألف في صفحة رياضة من صفحة عادية؟ فعلا باحس في أهرام الجمعة ان الفلوس هي اللي بتتكلم و أد ايه البلد دي فيها فلوس كتير أوي.. بس مع ذلك فيها فقر كتير اوي.. الظاهر اننا رجعنا للعصر اللي كانت فيه فجوة بين الطبقة الغنية و الطبقة الفقيرة و بأه عندنا باشوات و أمراء و نبلاء و إقطاعيين من غير ملكية.. و ساعتها باسأل نفسي، امال هي الثورة قامت ليه؟ مش برضه من ضمن أهدافها كان إلغاء الفوراق بين الطبقات؟ و الله ساعات باحس ان أيامها كان احسن من دلوقتي على الأقل ما كانش فيه غلاء أسعار فاحش زي دلوقتي مخلي الفقير مش لاقي اللقمة حتى.

معلش يا جماعة، انا خرجت من موضوع و دخلت في موضوع تاني، بس هو تقدروا تسموا الموضوع ده فضفضة أو خواطر غير مرتبة نتجت من قراءة أهرام يوم الجمعة.. أقصد إعلانات يوم الجمعة :)

**mody_halawa** · 11-07-2008 03:44 PM

والله عندك حق حتى ملحق السيارات فية بتاع سبع صفحات اعلاات معارض هوة الملحق فية كام سبع صفحات والله انا بقيت احب الملح بتاع اخبار اليوم اكتر من ملحق الاهرام نيجى للجرنال فعلا الرياضة مبقتش صفحات رياض الصفحة ربعها رياضة الباقى اعلانات والله انا زهقت من الجرنال دة

SS · 11-07-2008 11:05 PM

المشاركة الأصلية كتبت بواسطة mody_abou_halawa

والله عندك حق حتى ملحق السيارات فية بتاع سبع صفحات اعلاات معارض هوة الملحق فية كام سبع صفحات

مع ملاحظة ان لو فيه موضوعات مكتوبة هتلاقيها عبارة عن اعلانات متخفية فى صورة موضوعات من عينة شركة معرفش ايه تحتفل بتسليم اول دفعة من الموديل الفلانى و يقعدوا يكروا فى مميزات العربية و خد بالك العربية خالية من العيوب وطبعا صورتين لرئيس مجلس الادارة او العضو المنتدب يكونوا من الحجم كبير عشان ينشرح قلبك....نفس القصة مع وكلاء العربيات او المعارض الكبيرة لما يفتح فرع جديد....و تتكرر نفس المسرحية الظريفة فى مجلات تانية كتير....خد عندك صفحة السياحة فى الاهرام ...حاجة ما شاء الله تفرح اللى ما يفرحش....يعنى كل الفنادق فيه مناسبات سعيدة...يا بتحتفل بمرور كام سنة على انشاءها ...يا اما بتكرم اى حد من العاملين فيها..مدير الفندق...الشيف العالمى حسن بطيخة ..مش مهم مين المهم انهم عندهم حد مجتهد يستحق التكريم..يا اما خبر تعيين احد المدراء ...يا الفيلم اياه بتاع العارضة العالمية سونيا او ملكة جمال موزمبيق او سفير دولة معرفش ايه وقع اختياره بعد طول بحث على الفندق اللى مفيش منه اتنين ليقيم فيه اثاء تشريفه لبلدنا العظيم ....ومتناسش صورة الضيف و معاه مدير الفندق وبتوع العلاقات العام واى حد كان معدى ساعتها لازم يكونو منورين كمان....و يجب عليك كمواطن مسالم برىء لطيف ظريف انت تقرا الكلام ده وكأنك بتقرأ اخبار السياحة و تطوراتها فى بلدك....و انت يا استاذة علا و انت بتشترى الجرنان أعتبرى نفسك بتشترى الوسيط و معاه كام مقال ع كام خبر هدية ..عشان متتخنقيش.

**Ahmed Samy** · 12-07-2008 12:29 AM

المشاركة الأصلية كتبت بواسطة SS

الشيف العالمى حسن بطيخة ..

المشاركة الأصلية كتبت بواسطة SS

أعتبرى نفسك بتشترى الوسيط و معاه كام مقال ع كام خبر هدية ..عشان متتخنقيش.

احلى جملتين شفتهم النهارده

**جمال** · 12-07-2008 01:38 AM

المشاركة الأصلية كتبت بواسطة SS

و انت بتشترى الجرنان أعتبرى نفسك بتشترى الوسيط و معاه كام مقال ع كام خبر هدية ..عشان متتخنقيش.

متنساش ان الوسيط يوزع مجانا مش بجنيه و ربع يعنى اغلى من العدد العادى
انا بحاول اجد اى خبر يقرأ فى اهرام الجمعة فلا اجد , المفروض يوزع مجانا بجد

SS · 13-07-2008 01:26 AM

المشاركة الأصلية كتبت بواسطة etrawy

بس المشكلة إن الناس اتعودت (الاهرام -يوم الجمعة) , (الأخبار-يوم السبت) , (الجمهورية -يوم الخميس)

فعلا ديه تعتبلر من الثوابت فى بلدنا بس انا الحمد لله كسرتها ....بطلت اقرا جميع ايام الاسبوع

المشاركة الأصلية كتبت بواسطة haima

متنساش ان الوسيط يوزع مجانا

لألأ..عندك..لحد كده و كفاية...انت فاكر نفسك قاعد فى بلد عادية...مش قادر تعرف مدى تميز البلد اللى انت قاعد فيه...لأ بجد الوسيط بيتباع لو انت ما بيوصلكش و كنت محتاجه هتلاقى بعض بائعى الجرايد و الكتب بيبوعه ومش رخيص كمان ...و ده طبعا حرصا منهم على و قتك و تعبك فى البحث عليه...شوفت بقى انك مش مقدر بلدك!!!

**TIMODAX** · 03-08-2008 11:06 AM

المصري اليوم هو الحل

**aif** · 05-08-2008 01:50 PM

الأهرام .....
ايوة افتكرته ...... انا دايما باشوفه .... مفروش علي السفرة لما بناكل سمك .....
وكنت ساعات باقرأة من كام سنة كدة ......
يااااااه ... هو انتي لسة بتشتري الأهرام يا علا ؟؟؟؟؟؟؟؟؟؟؟؟؟؟؟؟؟؟؟؟؟؟

-

-

الموضوع: أهرام يوم الجمعة - عندما تتحدث الأموال

LinkBack

أدوات الموضوع

عرض

-

-

-

-

-

المواضيع المتشابهه

أحسن طريقة لأستثمار الأموال

مباحث الأموال العامة.....قابل يا عم

حد شاف أسعار الشارك في أهرام النهاردة ؟

صور تتحدث عن نفسها

الكلمات الدلالية لهذا الموضوع

المفضلات

المفضلات

ضوابط المشاركة