في سنة 2007 و في يوم جمعه الساعة 8 الصبح و في طريق بلبيس الزقازيق الصحراوي ... قابلني رادار و ضابط الظاهر ان المدام كانت مبيتاه بره البيت و راح ساحب الرخصة عشان كنت ماشي 118 كيلو ( عمرك شفت رخامة كده ؟!!! )
انا دمي اتحرق و رفضت ادفع المخالفة و حلفت ما انا عايز ام الرخصة دي... و عليها يا معلم لحد النهاردة ماشي من غير رخصة سواقة ...
بس من شهر كده بدئت الكماين تكتر و التفتيش اشتغل و رخصة العربية خلصت من سنة و مش طالبة بقى وش اكتر من كده ...
هوووووووووووووووب و رحت طالع على مرور حلوان ( انا اصلا ساكن في مدينة نصر من 5 سنين ) و عديت في السكة على قسم حلوان و عملت مذكرة فقد لرخصة ( كلفت 1.5 جنيه و ربع ساعة وقت ) و طلعت على المرور و جبت نموذج استخراج بدل فاقد ب 7 جنيه ............ و رحت للموظف بتاع رخص القيادة الخاصة و طلب مني رقم الرخصة !!!! يا عم الحاج ضاعت مني هعرف رقمها منين انا ؟ قاللي روح للمدام بتاعة التصوير ( مش فاهم دي علاقتها ايه بالموضوع غير انها قاعدة في غرفة مكيفة و قدامها كمبيوتر و صورها وحشة جدا ) قالتلي مفيش بيانات باسمك و ارجع للموظف تاني ..............اللي قاللي خلاص اعمل رخصة جديدة .. ليه يا عم الحاج ؟ عشان المرور اتحرق في الثورة و الملفات و الكمبيوترات اتحرقت ... طب مفيش نسخة تانية ؟ مسمعتوش عن اختراع فضائي خزعبلي اسمه باك اب ؟ هوه طبعا عارف سفن اب لكن باك اب دي ممكن يفتكرها مشروب جديد في السوق ...

الموقف بقى ::::::::::::::::::
لازم اعمل رخصة جديدة ... و انا مش طالبة معايا اتعامل مع الاغبياء بتوع حلوان ... يعني لازم اغير البطاقة .... و عشان اغير البطاقة لازم اجيب وصل نور باسمي ... عداد الكهربا و التلفون و الغاز انا محولتهومش باسمي لحخد دلوقتي ............. كل الحوارات دي عشان اعمل رخصة سواقة


شفتوا بقى الثورة مضرة جدا ازاي ؟
و مرسي هوه السبب ان انا محتاج شهرين عشان اعمل رخصة
الحرية و العدالة اخونوا المرور اللي مش بيطلع رخص لغير الاخوان
نرفض استحواذ فئة او جماعه على رخص القيادة و نطالب باعادة انتخابات الرئاسة ( ........ يا اللي في بالي و انتوا عارفينه )