الماروتي مش عاوزه تدور و مش عارف من ايه يا ريت حد يساعدني؟؟

**rameahmed** · 12-11-2012 09:04 AM

السلام عليكم و رحمة الله و بركاته

انا النهارده الصبح جيت ادور العربية لقيتها مش عاوزه تدور و مش عارف من ايه هل العيب في المارش ولا البطاريه بس انا بصيت علي البطاريه لقيت فيها ميه و مش ناشفه لا حاجه و زقيت العربيه عشان تدور و دارت الحمد لله بس لما جيت ركنتها عند الشغل و بطلت العربيه و حبيت اجرب اشغلها لقيتها برده مش راديه تدور و شكلها كده لازم حد يزقها فبرجاء المساعده ضروريييي عشان عاوز اعرف العيب فين بالظبط و جزاكم الله كل خير.

**alking_2006** · 12-11-2012 10:12 AM

السلام عليكم

1- و انتا بتدور لو صوت المارش ضعيف و بيعتل "يعنى تحس انه مطلع صوت بيطلع فى الروح" يبقى دى (بطارية او الشحن بتاع الدينامو ضعيف و فى الغالب بطارية) ..... بيتم الكشف عند الكهربائى على البطارية و شحن الدينامو لبيان الاصلاح اما بتغيير البطارية او اصلاح دائرة الدينامو

2- اما لو صوت المارش كويس يبقى ممكن (طقم بوجيهات) عايز يتغير لأنه عدى عليه اكتر من 10 الاف كيلو او واخد رطوبة او الاحتمال الابعد (ابلاتين) بردو عدى عليه اكتر من 10 الاف كيلو و بيبتدى يلدع و فى الاغلب بوجيهات

3- طبعا بيبقى فيه احتمال (مستبعد) و هو المارش و دا لو مش بيطلع اى صوت خااااااالص فيما عدا صوت (تك تك) و دا بيبقى اوتوماتيك المارش او ترس البندكس باظ و دا بيحصل لما تقرص على المارش جامد فى الدوارة عدة مرات

ممكن تقولنا اخر مره غيرت البوجيهات و الابلاتين امتى؟
و البطارية دى معاك بقالها قد ايه؟
و لما فتحت غطيان البطارية و العربية دايرة هل لقيت فوران تحت اى غطا من الغطيان (يعنى فيها ربع ضارب و فى طريقها للموت)؟

**hamahmy** · 12-11-2012 10:17 AM

بوص الحل الأسهل انك تزوقها زى المرة اللى فاتت عشان تدور و تروح لأقرب واحد بتاع بطاريات تخليه يكشف على شحن البطارية بالطونجر لو تمام و الديناموا بيشحن يبقى المشكلة من المارش لو فيه حاجة فى البطارية حايقولك و مش شرط ان البطارية فيها مية تبقى شغالة كويس لأن ممكن يكون فيها ربع ضارب او ممكن الدينامو عندك مش شحنه ضعيف ..... و لو العيب من البطارية افضل تجيب المرة اللى جاية بطارية جافة و لا مية و لا وجع دماغ ... تركبها و تنسى

**mohamed_kta** · 12-11-2012 10:43 AM

90 % البطاريه و طبعاً لازم تكشف عليها.

**rameahmed** · 12-11-2012 01:06 PM

انا فعلا بسمع صوت المارش اكنه بيطلع في الروح كده بس مش تكتكه ولا حاجه و العربيه موجوده من 2008 و عامله 17000 كيلو و مغيرتش بوجيهات خالص

**rameahmed** · 12-11-2012 01:07 PM

طب ايه احسن انواع البطاريات الجافه و اشتريها منين برجاء المساعده و متشكر جدا علي الرد و ابجد استفدت جدا و معلش عشان انا لسه جديد في موضوع العربيات ده :)

**alking_2006** · 12-11-2012 01:25 PM

المشاركة الأصلية كتبت بواسطة rameahmed

انا فعلا بسمع صوت المارش اكنه بيطلع في الروح كده بس مش تكتكه ولا حاجه و العربيه موجوده من 2008 و عامله 17000 كيلو و مغيرتش بوجيهات خالص

كدا يبقى اكيد بطارية
انا عن نفسى ركبت بطارية جافة ماركة "هانكوك" و كانت عاملة 230 جنيه و اديته البطارية القديمة بس الكلام دا من سنة ممكن تكون غليت و دى تجيبها من

محل "الإيمان للإطارات و البطاريات"
العنوان: 101 شارع التحرير
الطريق: من ميدان التحرير - هتدخل شارع التحرير - هتدخل أول يوترن بعد ميدان الدقى هتلاقيه على ايدك اليمين
المواعيد: من 9 الصبح لحد 11 بليل ما عدا الأحد
التليفون:
01223131096
01223966154
0233368054

و ابقا طمنا

**rameahmed** · 12-11-2012 11:14 PM

فعلا العيب طلع من البطاريه و انا جبت بطارية فارتا 40 امبير من كحل الفردوس في العباسيه بس كنت عاوز اعرف هل بطارية الماروتي الفابريكه بتكون 40 امبير و لا ايه بالظبط

**alking_2006** · 12-11-2012 11:20 PM

40 امبير

**Amr Axel** · 13-11-2012 12:37 AM

المشاركة الأصلية كتبت بواسطة rameahmed

فعلا العيب طلع من البطاريه و انا جبت بطارية فارتا 40 امبير من كحل الفردوس في العباسيه بس كنت عاوز اعرف هل بطارية الماروتي الفابريكه بتكون 40 امبير و لا ايه بالظبط

الف مبروك يا باشا بس ليه تجيب من محل عندك التوكيل نفسه بعد رمسيس تاخد نزلة شارع شنن و السبتية من كوبري اكتوبر و اول ما تنزل اسأل ع توكيل فارتا هيقولوك عليه لأنه تحت نزلة الكوبري و سعرها بيبقي ارخص من التجار اللي برة زي ما شوفت ناهيك اني لقيت تجار ساعات بيجيبوا بطاريات واقعة او انتاج قديم من محلات غير معروفة بدل التوكيل و يبيعها باضعاف
اهم حاجة بقي تتابع صيانتها و تروح بالضمان للتوكيل كل شهر تعملها صيانة و يمضيلك في الكارت الاصفر اللي خدته هناك لأنهم أضمن مكان تعمل فيه صيانتها عشان التجار برة بيغشوا ساعات المية اللي بتتحط
بخصوص البطارية زي ما قولتلك في الموضوع التاني هي الأصل 38 لكن بتتغير بــ40 امبير