موضوع خفيف - ايه رأيكم فى الاغنيه دى
ايه رأيكم فى الاغنيه دى ؟؟
Disalata: Hobba Egyptian Style/ هوبا ايجيبشان ستايل - YouTube
و دى طبعا تنويعه على الاغنيه الاصليه الكوريه المشهوره
بالمناسبه الاغنيه من انتاج "دى سلطه" ودى عباره عن موقع على النت و بينزل مجموعه من البرامج اللى بيقدمها 8 شباب - كل شاب بيقدم برنامج فى الموضوع اللى هو بيحبه (موضه - مواقف يوميه - سينما - شعر .. )
الـ 8 شباب دول مابيقبضوش فلوس عن الموضوع ده و الموضوع كله هما واخدينه هوايه من الاساس و بالتالى كلمه "انتاج" بالمعنى المفهوم مش موجوده
و كلمات الاغنيه اصلا من تأليف البنت المحجبه "اللى حاطه موبيل جوه الطرحه " و طبعا من تمثيل الشباب دول بالاضافه الى ناس عاديه قابلوهم فى الشارع لأول مره
انا عرفت المعلومات دى لأنهم كانو مستضيفنهم فى الراديو و سمعتهم و انا راجع من الشغل
اللى عاجبنى فيهم هو ال creativity اللى عندهم سواء من ناحيه انشاء قناه على النت او عمل الاغنيه دى فى حد ذاتها و اللى من وجهة نظرى شايفها دمها خفيف جدا و احلى كمان من الاغنيه الاصليه
و لسه من شويه شايف برنامج على قناةMBC Action و ذكر فيها الاغنيه و قدم فيها التشجيع و التحيه للشباب دول
لكن اللى اندهشتله هو كميه الهجوم الرهيب عليهم من المصرين نفسهم و ده باين من التعليقات على الفيديو و من الرسائل اللى اتبعتت فى البرنامج اللى طلعو فيه فى الراديو
يعنى الاغنيه دى و لا اغانى ايكا و اورتيجا اللى قارفينا بيها بعد الثوره ؟؟
فانتو ايه رأيكم فى الاغنيه دى بصراحه ؟؟ وهل احنا كمصرين بنحب دايما نبقى اعداء النجاح لبعض
