صيانة ال 1000 كيلو لل m12
النهاردة رحت عملت صيانة ال1000 كم و العربية كانت عاملة حوالي 1360 كم المهم رحت مركز صيانة اسيوط للمبيعات قدام قيادة المنطقة الجنوبية العسكرية , قابلني المهندس رامز مسئول قطع الغيار لاني كنت مكلمه من امبارح علشان المراية الشمال اللي اتكسرت ( منها لله الغشيمة بنت التييت اللي طرشقتها) و الحمد لله طلعت موجودة و الاحلي انها ماكانتش هتحتاج رش لان الفبراية اللي بلون العربية كانت سليمة ففكيناها وركبت على الجديدة مكان اللي كانت واخدة فيلر و هتترش و دلوقتي معايا وش احتياطي زيادة بس اتكويت في 420 جنيه تمن المراية و المصنعية 20 يبقى 440 بس مش مهم الحمد لله انها جت في المراية .
نيجي للصيانة , حصل التالي :
-غسيل وتربيط العفشة كاملة بما فيها قواعد الموتور و الفيتيس وذلك بعد رفع العربية بالكامل على الهيدروليك و كانت تمام مش محتاجة تربيط يذكر باستثناء بيض الطرف اليمين خد نص لفة.
-تم مراجعة جميع الزيوت و السوائل و تنظيف فلتر الهواء و البنزين .
- تم غسيل الموتور و مشتملاته و تجفيفه جيدا.
-غيرت زيت موبيل 1 و فلتر زيت العربية بتاخد 5 لتر بالفلتر و بتغير الفلتر مع كل تغيير زيت 10,000.
- كشفنا عليها بالجهاز علشان نشوف موضوع لمبة الabs اللي ساعات تنور و تفضل منورة , فمظهرش عطل و العربية واقفة المهم المهنس قال للفني ركب الجهاز و امشي بالعربية و شوف المهم طلع الحساس اللي ورا يمين ضعيف فبيفصل ال abs كله , بس المهندس قاله غيره ضمان و فعلا دخل جاب قطعة الغيار فالراجل قاله دي قدام يمين مش ورا يمين فدخل تاني , طلعت مش موجودة فاعتذرلي المهندس و قاللي احنا هنطلبها و الصيانة الجاية نركبهالك ان شاء الله قلت ماشي المهم العربية ماشية و مفيش مشاكل.
- التقييم العام للمركز جيد مش ممتاز بس فيه ميزة انك بتبقي العربية قدام عينك و هيا بتتصين و بتبقى واقف مع الفني و هو شغال عكس المراكز التانية .
بس ليا سؤال , هيا البوجيهات 3 شمعة ولا شمعة واحدة ؟ لأنهم قالولي انها 3شمعة بس عايز حد يأكدلي المعلومة دي.