الى خبراء المستعمل فقط ... الانترا 2007
السلام عليكم و رحمة الله و بركاتة
دى اول مشاركة ليا ف القسم الجميل دا ,,, انا كنت متابع بعض المواضيع بس من غير مشاركة تذكر
و بجد قسم هيونداى دا قسم حيوى و مشرف جدا و دا طبعا بفضل الله اولا ثم بمجهودات SE_coralsea وKareem Fawzy (بالمناسبة انا معرفهمش و لا عمرى شفتهم قبل كدة بس ان شاء الله يكون فى فرصة)
انا بس كان ليا طلب عند خبراء المستعمل :
انا معروض عليا الانترا 2007 الشكل قبل الاخير
المواصفات : اوتوماتك عداد 75 الف كيلو فابريكة جوة و راشة برة كلة (داخلة فرن) تكييف تتش و جنوط اصلية و كاميرا متركبة ف التوكيل و cd changer برضة متركب ف التوكيل و متركبلها فرش جلد (لايوجد ف العربية abs او air bags) و طبعا ازاز كهربة و سنتر و الكلام دا
العربية دى بتاعت شخص عادى مش تاجر عرفنى علية واحد صاحبى تاجر (التعامل معاه ف حاجات كتير غير العربيات و هو راجل ثقة) المهم ان اخويا سأل و احد صاحبة تاجر مشهور اوى عندنا ف اسيوط و قال ان العربية دى صعب جدا يكون دا عدادها الحقيقى و انها غالبا مقلوبة و عشان كدة هو راششها كلها لان موديل 2007 مش محتاجة تترش كلها لكن حسب كلام صاحب العربية انها فابريكة دواخل و ان معاه فواتيير صيانة ال 60 الف كيلو
العربية ثانى يد و صاحبها كان طالب 85(بيستهبل طبعا) و خلص الكلام ع 82 الف
كنت عايز اعرف منكم العربية تمنها العادل كام؟ و اتاكد ازاى ان العداد سليم و انها مش مقلوبة قبل كدة؟ و اية رايكم اساسا ف العربية؟
ع فكرة انا صعب جدا انى اسافر الايام دى عشان اكشف عليها ف التوكيل ف القاهرة و توكيل اسيوط لسه فاتح عندنا و الصراحة انا مش حاسس انهم هيكونوا فاهمين
معلش طولت عليكم و ارجو الافادة لانى بجد مستعجل جدا