عرض للطباعة
ده سؤال ممكن يحصل لاى حد فينا
بس الامن للعربية انى ابوظ جنبها وبعدين اسمكره ولا ابوظ الربع الامامى ؟
ده سؤال خطر ببالى و ربنا ما يوقعنا فى حادثة ؟
بس لو حصل وحد زنق عليك الاضمن للعربية ايه ؟ وطبعا ليك انت قبل العربية
طبعا حط كل الاحتمالات ماعدا احتمال النقل الكبير او المقطورة
طبعاً تخبط الجنب...........علشان طلعة رصيف هتزعلك جامد
إختار أقل الضررين.
حسب نوع الرصيف- ارتفاعه معقول اطلع الرصيف ارتفاعه عالى وصعب -ادخل فى الى زنق عليا
يعني هو يزنق عليا و انا لواحدي اللي اتضر , لا طبعا حجيب جمب عربيته معايا و يا نعيش عيشة فل يا نموت احنا الكل
انا ممكن ادخل في الرصيف في حالة واحد لو موتسيكل او عجلة او حد ماشي على رجله دي ارواح مفيهاش عناد
السلام عليكم
لو الرصيف واطي هطلع
لكن لو عالي هخبط جنبها علشان الي مزنق عليه يتعور معايا مش هشيل انا لوحدي وافديه لازم يتحمل غلطه كمان
والله المستعان
الصاج مقدور عليه انما العفشة لا قدر الله لو اتخبطت جامد ممكن تحتاج زراجين و كده
ايه يا جماعة الكلام الخطير ده ؟؟ سامحونى أنا مش شباب زيكم
موقف زى ده بيحصل فجأة بدون مقدمات مثلاً ؟؟؟
لو حصل فجأة مش عارف هاعمل ايه لو الفرامل ما أسعفتنيش !!!
هقولك على حاجة
لما حد يغلط غلطة ، اه حاول تتفادى غلطه بس بشرط انك ما تتفاداش غلطه بغلط تانى
يعنى هو يبقى حمار وكان هيحك عربيتك كلها تقوم انت تخيش في الرصيف بمزاجك ، ساعتها هو مش هيعمللك اي حاجة وهيحرق دمك ويقولك انت اللى دخلت في الرصيف
وبعدين كل موقف بيفرق ، يعنى انت لو دخلت في الرصيف اللى هو اصلا موازى ليك العربية هتتبهدل جامد و هتجيب عفشة وجنوط وعتب والعتب ده بالذات صعب جدا يتعدل تانى وكدة انت يعتبر خبطت الجنب التانى برضه واحتمال انك ما تعرفش تتفادى الخبطة الاولى بالكامل يبقى انت كدة خبطت العربية من الناحيتين
ولو الرصيف في وشك بالظبط ، ما تضمنش ايه اللى يحصل وكدة كدة انت هتخبط يبقى سيب اللى غلط هو اللى يبقى السبب في الخبطة
طبعا الكلام ده في حالة ان اللى هيحصل للجنب مجرد حكة او سمكرة عادية ، انما لو شيء هيصطدم بيك بعنف من الجنب يبقى حاول تحافظ على الجنب لان الجنب في الحالة دى هيجيب معاه سقف و قوايم والعربية هتتدمر انما من قدام اه هتكلف كتير وحاجات كتير هتبوظ ( كبوت ورفارف و فوانيس و اكصدام وشاسيه اكصدام و ردياتير وسربنتينة و قنطرة وفردة شاسيه ، واحتمال جنوط وعفشة لو هتركب رصيف ، ( طبعا كل الحاجات دى مش هتحصل كلها مع بعض )) انما في الاول وفي الاخر غالبا عربيتك هتفضل سليمة مع الاصطدام الامامى مع استعدال للشنب على البارد و احتمال عصرة بسيطة مش باينة في نهاية فردة الشاسيه عكس اللى هيحصل مع التصادم الجانبى القوى اللى ممكن يدمر العربية من الداخل ويأثر على الركاب ، ربنا يسلمنا جميعا ..
انا حسب ما اتعلمت من قواعد المرور ان من اخطر العمليات تغيير المسرب فجأة...
وعلى هذا الأساس مبغيرش حارتي لحد كسر عليا ابدا الا في حالة اني متأكد ان محدش جنبي...
طبعا بالشكل ده برفع شعار اخبطني شكراً!!
لكن بالتجربة...
محصلتش الحمد لله ان حد خبطني بالشكل ده رغم اني مبغيرش مساري وبكتفي بالاحتفاظ بحارتي وتنبيه الباشا اللي بيكسر عليا....
تحياتي
Sent from my LT18i using Forum Runner
الجنب.. حتي لو حتاخد الأبواب ف السكة..
أرحم من اني أدخل ف الرصيف يبقي دخلت ف عفشة (أي شغل ف العفشة عدا الصيانة المعتادة أو تغيير المستهلكات بيرعبني) + عتب +اكصدام لو الرصيف عالي شوية + احتمال كبير عدد 2 جنط . غير انك لو خيشت جامد ع الرصيف حتاخد بني آدمين ف سكتك..
يبقي رفرف ولا باب مش مشكلة مقارنة باللي حايحصل لو طلعت ع الرضيف.
تاني حاجة ان مهما كانت الخبطة فا انت فضلت علي الأسفلت والخبط كله حديد ف حديد وحميت ناس علي الرصيف مالهاش ذنب.
تالت حاجة ان اللي زنق عليا ده مايحصلوش حاجة وانا اللي آخد ضرر أشد عشان خايف علي عربيته!! اذا كان هو مش خايف عليها.. يبقي خليه ينوله من الحب جانب عشان بالمرة لو فيها محضر يبقي انت المتضرر وهو الجاني لأنه هو اللي كان بيغير حارة بغشومية. انما طلوعك ع الرصيف حايضيع حقك بانك تطالبه بأي تعويض.
متفق مع الجميع
و هخش في اللي كسر عليا
غالبا في المواقف ديه حسب تقديرك بتتفادى الموقف دون أي خسائر
لو اللي زنق عليك بنفس سرعتك أو أسرع منك حاتضرب فرامل وتخليه يسابقك
لو اللي زنق عليك أبطأ منك وانت اللي داخل جنبه بسرعة يبقى حسب تقديرك الفرامل حاتجيبك ومافيش حد غشيم وراك يبقى تضرب فرامل جامدة .. أما لو الفرامل مش حاتجيبك يبقى تشد بالعربية مع استمرار الكلاكس والرعاش بالليل بحيث الشدة ممكن تخليك تعدي من آخر فرصة قبل ما يضيق بيك المكان
هي عايزة سرعة بديهة وربنا يسترها معانا جميعا
على فكرة أنا مرة حصل معايا موقف مشابه لكن مش بالظبط بعربيتي القديمة 124 .. كانت عربية أصيلة
موتور 1600 لادا كنت ماشي على الصحراوي 140 الساعة 2 بالليل في المكان اللي خمس حارات مش أربعة
وطبعا الحارة الخامسة بتنتهي بسور علشان يبقوا 4 حارات وانا كنت ماشي في الحارة الرابعة ويميني الحارة الخامسة فاضية وجنبي في الحارة الثالثة ترلة مقطورتين
المهم لاقيت رعاش في المرايا وواحد مجنون سايق نص نقل على سرعة أعتقد ممكن تجاوز 200 وماشي على الحارة اليمين اللي حاتخلص المهم الراجل قرر يشد من قدامي قبل ما يلبس في الحيطة بس السحب ماأسعفهوش وخلاص حايلبس في السد
طبعا الحل السليم إني أضرب فرامل علشان ياخد شماله لكن 124 فراملها مع بوش الدركسيون حاتخلي العربية تاخد زوايا مش متوقعة وحالبس يا فيه يا في التريلة .. رد فعلي ساعتها إني لاقيت فراغ في الترلة جنبي دخلت بتقريبا ربع جنب العربية تحت الترلة ووالله ما أقدر انسى الموقف ده عجلة قدامي وعجلة ورايا ولو سرعتي مع الترلة اختلفت شوية كنت رحت في الرجلين لحد ما الراجل عدى في خرم الإبرة وطار ..
طبعا حاتقولولي ارتفاع سقف العربية أعلى من التريلة .. أنا نفسي مستغرب بس ده اللي حصل .. ستر ربنا :)
افرمل و احاول اتفادى الموقف
لا كده ولا كده ... هادوس فرامل ههههههه
في حاجة انا بعملها قبل ما يحصلي الموقف ده وهو اني باستمرار ببص في المرايا لو لقيت حد غشيم جي من ورا بقفل عليه الغرزة الي ممكن يجي يخبطني منها ( طبعا باديلو اشارة ويكون الكلام ده قبل مايكبس عليا جامد ) والحمد لله نفع معايا الموضوع ده اوي
لكن لو لقيت نفسي مضطر اني اخبطه او اطلع الرصيف فطبعا اخبطه بالجنب .
وربنا يسترها معانا ومعاكم انشاء الله
ممكن حضرتك الفرامل في المواقف ديه تبقى ضرر ليك انت وللعربية الي وراك والي رخم عليك يعدي منها سليم
... ولاقدر الله ممكن الفرملة تخبط الي قدام في الزجاج لكن الخبط بجنب العربية تعتبر اقل خسارة مش بس فلوس لكن للأفراد كمان .