الموضوع: كيا ريو 2013 خليجي ولا من التوكيل

المشاركة الأصلية كتبت بواسطة 2CODE

هو انا يعني مينفعش اكون متعلم اكتر منك وانا اصغر منك سناً ؟ كلام لايعقل !





هنعيده تاني يا جماعة يعني معنى كده لو مهما عملت اوروبا من عربيات حتى لو كانت سيئة هتشتريها وانت مغمض من غير ما تشوف اراء اللي اشتروها ولا تجربة ولا غيره ؟

هوهل يعقل يا جماعة ان خط انتاج لايتغير مستواه ؟ دا كلام علمي يا جماعة اي خط انتاج ممكن ان تقل جودته وتزيد جودته والجوده العالي اذا اتغيرت مش بتتغير الا للاسوء ولكن الخط السئ لما يتغير ممكن يكون للافضل

الموضوع مش موضوع ده بيصنع في سنة كام وده كام طيب ما انت عندك ناس عواجيز في البلد وفي ناس شباب يفهموا اكتر منهم مليون مره ومش واخدين فرصتهم نفس الموضوع ينطبق على كلامك يعني مينفعش ان يطلع حد احسن من القديم ؟ كل ده علشان اللي بيصنع العربية دي في اوروبا ؟ طيب تخيل فورد كانت في كوريا كنت هتقول ايه

ياريت نغير تفكيرنا شويه ونتكلم بواقع (التجارب) محدش ركب الفيستا قبل كده ومش بنشوفها في الشوارع الا نادراً واللي يقول لك الثبات ومش عارف ايه انا ركبت الفورد فوكس وبركبها مليون مره هي والريو عندي كنت لقيتني دخلت اقول للناس على الريو سيئة لو الفرق زي ما بتقول كده

يا باشا بالراحة بس انا مش عارف ليه متعصب كده ؟

دلوقتى طبعا الاولوية و الطبيعى ان الاكبر يبقى احسن .. يعنى لو عندك مدرس او استاذ جامعة طبيعى هيبقى ذو خبرة و اداء افضل من التلميذ الا بقى فى حالات قليلة بس الطبيعى اللى شغال فحاجة بقاله 100 سنة مثلا مش زى اللى شغال فى حاجة بقاله 20 سنة مثلا الا بقى لو اللى شغال 100 سنة دا فاشل اصلا فاللى بدأ بعده بمراحل عرف يسبقه .. و مثال حضرتك فى غير محله .. عشان محدش يقدر يقول ان كيا عندها تكنولوجيا و تعليم افضل من فورد .. حتى كيا نفسها متقدرش تقول كده

اكيد لو عربية سيئة محدش هيجيبها حتى لو صناعة المانى بس احنا بنتكلم عن فييستا محققة ارباح برة زى الفل و عربية معروفة

يا باشا انا هقولك على حاجة بصراحة لو مش لاقى فرق بين الفوكاس و الريو تبقى حاجة غريبة شوية لأن اصلا الفوكاس مش فئة الريو ..

و على فكرة انا بتكلم عن تجربة عامة و ركبت عربيات كورى و اوروبى كتير و فيه فرق واضح بين الاثنين ...

و برضه انا بحب الريو جدا و شكلها حلو فعلا و كيا بتطور من نفسها جامد بس فى نفس الوقت العربية غالية اوى يعنى مش عارف بصراحة لما الريو السنة ديه تبقى بسعر السيراتو الكوبيه من سنة و اهى ديه عربية من نفس الشركة و فئة اعلى و كوبيه كمان و مفيش فرق فى الاوبشنز تقريبا

المشاركة الأصلية كتبت بواسطة 2CODE

ماهو ده اللي مخلي مصر ورا اعذرني ولكن بجد انا مبنقدرش العقول في البلد

يا باشا مين قال ان كلامى معناه ان مفيش تقدير للعقول بس طبيعى اللى عنده خبرة منك و عاش تجارب اكتر منك يبقى احسن منك و بعدين احنا بنتكلم عن صناعة يعنى بحث و تطوير و علم مش واحد ذكى خلاص يبقى هو احسن واحد .. يعنى هقولك مثال تانى لو انت و حد تانى و قعدت تدرس 100 سنة و تطور فى نفسك و ابحاثك و تنتج و حد تانى قعد يطور فى نفسه 20 سنة طبيعى و منطقى جدا ابو 100 سنة هيبقى احسن من ابو 20 دا مش تقليل من ابو 20 بالعكس كويس انه قادر ينافس مع ابو 100 بس زى ما قلتلك طبيعى جدا ان صاحب الخبرة يبقى الافضل لأن و لا الاوروربيين اغبياء و لا الكوريين اغبياء ، كل ما فى الموضوع ان فيه فرق تراكم خبرات و تطوير و بحث يدى الافضلية لاوروبا

المشاركة الأصلية كتبت بواسطة 2CODE

الانسان حياته هرمية يعني يبدأ بالطبقة السفلى وهي مرحلة الطفولة حتى ان تصل للمرحلة العليا التي هي مرحلة الشباب وفيها يكون نضج العقل بعدها يبدأ ينخفض من الطبقة العليا من الهرم الي الطبقة السفلى مره اخرى وهي فتره الشيخوخة وفيها دمار وصغر العقل وده معروف طبعاً

يمكن مثال الانسان مكنش فى محله اوى بس احنا زى ما قلت بنتكلم عن صناعة ايه اللى هيخلى شركة كبيرة بتطور و بتبحث ترجع لورا او حتى تقف تستنى المنافسين اللى ابتدوا بعضها انهم يحصلوها

المشاركة الأصلية كتبت بواسطة 2CODE

جميل جداً وده اللي احنا عايزينه بس انا مش هقول لك انت طبعاً سيد العارفين ان متاخدش برأي الناس برا على اي عربية لان العربيات اللي بتجيلك هنا غير اللي عندهم نهائياً طيب ما لو هنتكلم كده ريو اخدت جوايز كتيره جداً وتشوفها على موقعهم بس العربية اللي عندهم غير العربية اللي بتجيلك خالص

فللاسف ده مش مقياس انا مشتريتش العربية على اراء الاجانب انا دخلت هنا شوفت مين اشترى الريو وقال ايه عليها وده الصح مش تشوف برا ايه الاخبار واشتري ما انت عارف التوكيلات بتعمل ايه في مصر والعربيات بتجيلنا ازاي

لا معلش الكلام دا معظمه فى الكورى و اليابانى .. هقولك ليه العربيات الاوروبى معظمها بيجى من برا مش تقفيل مصرى و فى نفس الوقت العربيات الاوروبى هنا مبيعاتها تكاد لا تذكر بالنسبة للشركات الام فمش هيقدر ينزله خط انتاج بمواصفات مختلفة و اظن انى عمرى ما سمعت عن عربية اوروبى بيحصل فيها اللى بيحصل فى الكورى هنا فى مصر من فك و تركيب اوبشنز زيادة و كلام من ده و ده طبعا برضه مش عيب من شركة كيا مثلا دا عيب ضمير الناس هنا فى مصر ..

الفييستا اللى هنا زيها زى اللى بتنزل برة و دا حال كل العربيات الاوروبى فى مصر تقريبا و هتلاقى فرق اوبشنز بس يعنى مش جايبين اعلى فئة بس العربية نفسها هى هى

المشاركة الأصلية كتبت بواسطة 2CODE

تصدق يا مهاب انا زمان مكنتش بحب الكيا نهائي واي حد كان بيجيب كيا كنت بقول له ملقتش الا الكوري! وده غلطنا اننا بنعمم على الحاجة

لكن بعد السيراتو بدأت اغير رأيي وجت الريو وكل ده خلاني اغير رأيي وليه لأ ما انا اشتريتها بالفعل :)


لصاحب الموضوع محدش اشتري الفيستا كتير ليه تكون انت من الناس اللي هتتجرب فيهم العربية في مصر ؟ احنا المصريين مش لاقيين الفلوس في الارض فعلشان كده خليك في حاجة الناس اشتريتها ومجرباها واهم حاجة توكيل العربية ايه اخباره هي دي اهم عوامل شراء العربيات خصوصاً في مصر العربية بتجيلنا صفيحة وموتور مش اكتر ولو حبيت تشتري شويه وسائل امان في العربية تلاقي فرق 40 او 50 الف جنية فعلشان كده شوف اراء الناس في العربية ومتشتريش عربية محدش جربها كتير ومش منتشره شوف الريو شوف الاوبل كورسا هتلاقي عربيات برضه في نفس الفئة ولكن الارخص ومقابل الجوده ووسائل الامان هتلاقي الريو

يا باشا انا مش بكره الكيا ولا الهيونداى و الله و كتير اتخانقت مع ناس فى المنتدى هنا و انا بدافع عن الكورى بس فيه برضه فرق بين الاوروبى و الكورى

و على فكرة انا نصحت ناس كتير اصحابى بكورى و صينى كمان بس كل وضع و ليه ظروفه و احنا بنتكلم عن معادلة كاملة يعنى مش عربية و خلاص لا فيه اعادة بيع ، سهولة تصليح ، قطع غيار متوفرة بسعر كويس ..

و برضه كلام الزيادة فى الفلوس ده عشان الامان فى الكورى بس ، الاوروبى بينزل standard بوسائل الامان abs & airbags & ebd .. نادرا ما تلاقى عربية اوروبى مفيهاش الكلام ده عكس الكورى نادرا ما تلاقى فيه الكلام ده و ده برضه مش عيب كيا او هيونداى عيب الوكلاء هنا فى مصر

بصراحة كعربية قصاد عربية الكورسا و الفييستا افضل من الريو .. بس لو حطينا اطراف المعادلة التانية زى الصيانة و الانتشار و قطع الغيار الريو هتنافس