الموضوع: الى الان 43 طفل ماتو ؟؟ من المذنب

المشاركة الأصلية كتبت بواسطة yasserelsayad

انا مش فاهم ايه علاقة الحكومة ولا الوزير حتى فى حادثة زى دى
دا حادثة نتيجة اهمال خفير المزلقان او سواق الاوتوبيس بس كدا مفيش حد تانى ليه دخل

+1

انا بصراحة برضه مش فاهم ..

هل من واجب رئيس الحكومة مثلا انه يلف على المزلقانات كلها يتأكد مقفولة ولا مفتوحة كل شوية ؟

طبعا كلنا زعلانين على اللى حصل و مصيبة كبيرة

و برضه عشان مندخلش فى السياسة فيه الف سبب يخلى الحكومة ديه تمشى يعنى انا مش معاهم خالص بس ممكن افهم وجهة نظر حضراتكم فى موضوع تحميل مسئولية الحادث للحكومة كلها يمكن يكون فيه حاجة غايبة عننا

المشاركة الأصلية كتبت بواسطة Ahmed_Adham

بس هرجع وأقولك ماهو اشارات المرور الكترونيه وبتبينلك قدامك كام ثانيه و الاشاره تفتح أو تقفل ومع ذلك الناس طول النهار والليل بتكسر الاشارات هل ده معناه ان وزير الداخليه المفروض يقف جنب كل اشاره يشوف الناس هتلتزم بيها ولا لاء؟ وهل الصح ان جنب كل اشاره نعين عسكري عشان يقف في نص الطريق والاشاره قافله عشان يجبر الناس انها تقف؟ أمال احنا عملنا الاشارات ليه أصلا؟

احنا عندنا أزمه التزام وضمير. احنا شعب معندوش ضمير...

مبدأ الثواب و العقاب اللى مش بيطبق هنا فى مصر

يعنى انا مثلا كنت فى اوروبا كله بيقف فى الاشارات اللى هى كل مترين تلاتة يعنى كل ما تمشى تلاقى اشارة و مفيش حد بيجرأ انه يكسرها ابدا عشان الموضوع بسيط كاميرا بتسجل نمرة العربية و ليهم عدد معين من النقاط كل ما يعمل مخالفة يزودوا فيه اول ما يعدى الليميت بتاع رخصه تتسحب منه و ميعرفش يسوق بس طبعا هنا حتى لو طبقوا النظام ده تلاقى اللواء مش عارف مين بيكلم اللى مسئولين عن النقط و يقوله شيلى النقط من رخصة حمادة .. حمادة ده حبيبى من زمان و الله بقت بلد تقرف

مهو يا فندم لو كل حادثة ومصيبة زى العباره وقطار الصعيد وقليوب والحوادث دى يبقى بعد كل حادثة الغفير يتسجن وبتاع التحويلة كمان

والوزير قاعد فى مكتبة ومطمن انة مش هيسيب الكرسي لكن لما الحادثة تقلب الراى العام على الاقل يكون فى يقظة من الوزير لمتابعه الناس اللى تحته واللى مش شغال يحاسبة لانه عارف انه هيتحاسب

انا من راى مايكونش مجرد قبول استقاله فقط لان الوضع هيكون زى مابنقول _ شالو الدو جابو شاهين_ لازم يكون فى محاسبة للوزير ورئيس الهيئه والغفير و لعسكرى المرور

المشاركة الأصلية كتبت بواسطة yasserelsayad

اه طبعا
هو لما سواق الاوتوبيس ولا الونش يعمل مصيبة هقول ان المشكلة فى الوزير مثلا على اساس ان هو اللى كان سايق.

انت بالمنطق دا بقى لو مثلا واحد سايق عربية سيراتو خبطك تروح عامل محضر لشركة كيا

المشاركة الأصلية كتبت بواسطة mohab.nabil

+1

انا بصراحة برضه مش فاهم ..

هل من واجب رئيس الحكومة مثلا انه يلف على المزلقانات كلها يتأكد مقفولة ولا مفتوحة كل شوية ؟

طبعا كلنا زعلانين على اللى حصل و مصيبة كبيرة

و برضه عشان مندخلش فى السياسة فيه الف سبب يخلى الحكومة ديه تمشى يعنى انا مش معاهم خالص بس ممكن افهم وجهة نظر حضراتكم فى موضوع تحميل مسئولية الحادث للحكومة كلها يمكن يكون فيه حاجة غايبة عننا

ده مرفق عام تديره الحكومة و مسؤول عنه رئيس الحكومة سياسيا ! و الا على كده نلغي المسؤولية السياسية ! .. ده في الكورة بيقيلو المدير الفني ( اللي هو ما بيلعبش الماتش ) و مش مسؤول عن اضاعة الفرص .. لما فريقه بيتعرض لهزائم .. اما بالنسبة لموضوع السيراتو .. تقريبا مش واصل لحضرتك الفرق بين شركة تبيع سيارة و مش مسؤولة عن قيادتها .. و حكومة مسؤولة عن ادارة مصالح شعب .. يعني حضرتك زعلان لتوجيه نقد للحكومة و رئيسها .. بالرغم من وقوع حادثتين قطار بعدد ضحايا ضخم في الفيوم و اسيوط في اقل من عشرة ايام .. امال نلوم الحكومة امتى ؟! .. لما نص الشعب يضيع في حوادث زي كده !! .. انا معرفش طبيعة شغل حضرتك ايه .. و لكن .. رؤسائك اللي اعلى منك مش بيحصل انهم ممكن يتحاسبوا و يتجازوا كمان على تقصير منك او من زملائك بالرغم من عدم اشتراكهم معاك بهذا التقصير المباشر .. الكلام ده بيحصل لانهم هم المسؤولين عن المحاسبة و اختيار اطقم العمل و الاشراف الاداري على المؤسسة المسؤولين عنها .. و في النهاية عمر رئيس الوزراء و لا الوزير هيسوق قطر و لا اتوبيس .. و لا عمره هيفتح او يقفل مزلقان .. يبقى نباركلهم بمناصبهم الابدية الخالية من اي مسؤولية !