الموضوع: مقطورة للملاكي

موجودة فى الخليج طبعا

بس اعتقد محتاجة ترخيص فى مصر عشان تمشي سليم

الطبيعي إن أي مركبة ذاتية الدفع أو غير ذاتية الدفع يتم ترخيصها طالما لها حيز وتخضع لقواعد المرور وتسير في الطرق داخل المدينة أو خارجها، يعني البيتش باجي والموتوسيكل والتوكتوك والترايسكل والفيسبا والمقطورة الخاصة للملاكي بأنواعها زي حامل اليخوت وحامل الخيول ومقطورة النقل المتنوع لحمل مولدات الكهرباء والضواغط والمعدات والكرفانات او غرف الإعاشة المتنقلة، سواء الصغيرة أو الكبيرة، يجب اصدار ترخيص لها، والترخيص لا يصدر إلا بعد الفحص لأن لازم من شروط تتوافر لاستصدار الترخيص وتركيب الللوحات المعدنية كوجود سلسلة أمان غير الجنش الذي يتم تركيبه في مؤخرة السيارة، ووجود أضواء حمراء خلفية زائد عواكس جانبية وخلفية فوسفورية أو معدنية، وغيرها من بعض المواصفات.
الكلام ده جميل! بس محدش بيطبقه في مصر، ده رقم واحد، ورقم اتنين محدش بيراعي وسائل الأمان في تصنيع مقطورة أو في شرائها، وده للأسف الشديد.
بالنسبة لحكاية شرائها ففعلا موجود منها في مصر بس أغلبها متخصص.. إزاي؟؟؟ يعني ممكن تشتري حامل يخوت من أحد توكيلات اليخوت زي ياماها وهوندا، وممكن تلاقي كرفان متنقل وموجود منه عند بعض تجار بيع الأوناش والحفارات والكرفانات والمولدات الموجود منهم في أكتر من مكان زي الطريق الصحراوي ومستوردي المعدات الثقيلة استخدام الخارج، بس إنسى إنك تعرف تتحرك بيها في القاهرة، بالإضافة لأن لا حاجة لاستخدامها داخل المدينة، وممكن تستخدمها طبعا في السفر والطرق المفتوحة مع اهمية استصدار ترخيص لها ومراعاة عوامل الامان لسلامتك ولسلامة غيرك. وبالتوفيق
وممكن تفصل واحد على مزاجك في ورشة، وحصل إن صديق قام بتصميم وتنفيذ واحد قبل كده في ورشة ناحية قليوب وكلفته 15 ألف جنيه، واستغرقت حوالي شهر أو اكتر.

المشاركة الأصلية كتبت بواسطة yassero

شكرا جدا على رد حضرتك يافندم انا المقطورة الي عاوزها لشغل مقاولات يعني زي عربية نص نقل كدة يبقى صندووق عادي جدا صغير للعدد ومواد البناء وكدة بس هي هنا في السعودية تمنها ما بيعديش 3000 ريال ابدا وبيمشو بيها على سرعه عالية جدا وبيدخلو بيها الصحرا وبيطلعو الجبال عادي جدا والمستعمل منها ممكن 1000 ريال طب لو ممكن اجيبها من السعودية ممكن تترخص وتدخل مصر ولا هيبقى عليها جمارك كمااان وشكرا مقدما

بالنسبة لطبيعة الاستخدام ونوع المقطورة دي فموجود زي ما قلت لحضرتك عند تجار المعدات استعمال الخارج المستوردة موجودة مع الأوناش والحفارات وخلاطات الاسمنت والروافع الشوكية، هتحتاج شوية تدوير بس. عندك طريق مصر اسكندرية الصحراوي، ومدخل بعد كم21 وقبل كارفور عند منطقة المصانع وتوكيلات العربيات ومراكز الخدمة كذا واحد، وفي المنصورة كمان عندك تجار نقل استيراد ومعدات كتير.
وبالنسبة لإنك ممكن تستوردها فده ممكن ومتاح بس هتدوخ شويتين فعشان كده أنصحك تشتريها من مصر خالصة مخلصة وبالنسبة للتصنيع فمتاح بس مش هيطلع ثابت في الجري ولا يستحمل مدقات، اشتريها استعمال الخارج احسن وهتكون حالتها كويسة لأنها لا موتور وتكنولوجيا ولا تعقيد. وطالما هتستخدمها في المجال ده يبقى لا ترخيص ولا وجع قلب لأن أغلب الاستخدام في المدن الجديدة والأماكن النائية والمواقع حسب تخيلي وحسب ما شفت هنا في مصر.