الموضوع: تشخيص خاطئ لعلبه دركسيون سيينا 1400 بس جه بفايده - انظر الصور..

السلام عليكم و رحمه الله و بركاته
اتمنى للجميع يوم سعيد ان شاء الله
[OVERLINE]
المشكله :-
1/ صوت طقه جهه السائق عند المطبات ثم وجود ترشيح جامد على مجموعه الدركسيون ( السكاترا و الخراطيم ) ده من بره و الاسوء من جوه من ناحيه التقاء اطمه الدركسيون بالعلبه من جهه الدواسات .
2/ شخصت الموضوع عند اكثر من حد بتاع زوايا انها علبه دركسيون و لابد و حتما العلبه تتغير و الطقه من العلبه.
3/ حاله نكد و شعور سيئ انك تسأل على علبه الدركسيون فى السوق تلاقيها ب 1800 جم الى 2000 جم و طبعا تركى - برازيلى - ايطالى موش مريح شكلا و لا مضمونا.
4/ اجلت الموضوع شهر علشان اجهز الاموال ( علبه - اجزاء عفشه ان وجدت - زيوت غسيل - مصنعيات - عطله ).................الخ
5/ عصره قلبى لما افكر انى افك اى شغل فابريكه معمول و خصوصا عن اقتناع انه مافيش صنايعى مصرى ملتزم و فاهم و مبيبوظش حاجه جنب شغله- خصوصا انى بتعامل مع اجانب كتير و عارف يعنى ايه مستوى الشغل الصح اللى المفروض يتعمل .

ايه اللى حصل :-
و انا بفكر اعمل الشغل ده فين و محتار شحنت جيبى ب 3000 جم و فى ذات المومنت يوم الخميس روحت لمركز كوول اير و الخاص ب صديقى المهندس ايمن - فى نظرى من اكفأمهندسى التكييف و التبريد فى مصر -واخدت رايه فى المشكله .
فعلا التشخيص المضبوط 50 % من حل المشكلة:-
انا اعتمدت على خبرته الطويله فى التشخيص و قلت اروح يمكن ..... المهم قالى و لا تتعب نفسك هنشوف ونبلغك على طول دلوقتى.
المفاجأه:-
قالى جالى ميكانيكى ممتاز من سوريا الاسبوع اللى فات و ان شاء الله خير .
جه الاسطى محمد ابو عبود - شاب فى نهايه العشرينات مبتسم و مؤدب و قمه فى الاخلاق و قالى بتشتكى من ايه - سردت عليه الموضوع - قالى نشوف و تكرم
- خد البلادوس و نزل البياره و تحت العربيه و 5 دقائق قالى العيب من كوليه الخرطوم بتاع تغذيه السكاترا بزيت الباور و العلبه سليمه و الطقه اللى كنت باسمعها من بيضه المقص
ازبهليت شويه و قلته يا عم راجع تانى الله يسترك - اكد نفس الكلام و بلغنى ان الفحص اللى عمله دقيق و سليم .
المطلوب ايه وقرار البدأ :-
- سألته نعمل ايه و ايه المطلوب و هينفع و الا لا ؟؟؟

- اكد انه لازم نفك العلبه بره و نبص على خرطوم الباور و نعمل اللازم
معرفش ليه كنت مطمن - يمكن علشان الموضوع هيكلف اقل ...- المهم قلته ابدأ بس وحيات ابوك عاوز الشغل الاصلى زى العربيه ما كانت
1 ساعه هى زمن فك
1/ العفشه الشمال و المقص و السكاترا و خرطوم الباور.
2/ الحاجه خرجت زى الزفت و كلها زيت و انا كل ما اسمع صوت المسامير اللى بتتفك لاول مره - قلبى بيتقطع المهم....
3/ طلع الخرطوم و فلا لقينا افيز الفابريكه ضعف من الضغط بتاع الطلمبه و محتاج يتغير
4/ نصحنى انى اغير جزء الخرطوم بالمره علشان الاحتياط
5/ سالت على الخرطوم ملقيتهوش بس ايطالى فى حدود 350 جم
6/ الهمنى الله انى اروح للقاضى بتاع الخراطيم الهيدروليك اللى فى جسر السويس و قالى طلباتك قلت له عاوز القطعه دى 17 سم و عليه كوليه من ناحيه و الناحيه التانيه جزره كبس .
7/المفاجأه : - قالى عويناتى - ده الاسطى جمال اللى استلم الجزء اللى عاوز اعمل زيه - و هيكلف الخرطوم مع الجزره و الكبس 12 جم قلته انت متاكد عاوز اشوف نوع الخرطوم - طلع امريكى جوود يير يا حلاوه يا اولاد.
8/ 10 دقائق و مسكت الخرطوم و انا موش مصدق شياكه و حيلاوه و غمزته ب 10 جم و انا طاير و بشكره لحد باب الخروج و هو شايله الخرطوم فى كيس بلاستيك لحد بوابه الخروج.
9/رجعت للمركز لقيت الاسطى محمد ابو عبود فاكك و مفصص العفشه و بيبلغنى ان الخبطه من بيضه المقص و فرجنى عليها و فعلا خلصانه و سايبه خالص.
10/ و المشكله الجديده ان الزيت اللى عند القطمه من تحت جاى من اويل سيل اللاكس بتاع القطمه و لابد يتغير
11/ سألت عليه فى ميدان الجامع و هارون موش موجود ورحت للموجى موش موجود رحت لللصعيدى قالى بيجى فى طقم اصلاح للعلبه كلها ب 45 جم و موش موجود تلاقيه عند الصعيدى قلت له معندوش و احبوش قالى بيبع الطقم كامل - يعنى اطلب الطقم كامل
12/ رجعت للموجى قلت له عاوز الطقم قالى 50 جم - مكلمتش قلت امين
13/ الاسطى محمد عند التركيب بلغنى ان الكوليه بتاع الفابريكه هيتغير و الموجود فى السوق صينى او تايوانى و الاحسن بلاش منه و يفضل لو فيه حاجه احسن
14/ جه فى بالى صديقى الكابتن رضوان - اللى هو الطيار اللى فى الحرفيين - و قالى عندى انجليزى و تعالى خذ اللى انت عاوزه - كان نفسى ابوس ايده شعره و دقن
15/ روحت طاير للطيار و قالى ادخل المحل و نقى اللى انت عاوزه - حبييبى يا عم رضوان - حقيقى يا رجاله الانجليزى انجليزى شكل الكوليه يشرح القلب و بكام بعد الخصم - 1.50 جم للكوليه الواحد - و مقص كامل تركى كبس - برشام يعنى - ب 135 جم بدل ما كنت جايب البيضه لوحدها ب 65 جم تقريبا و قلت اركبها علشان مبحبش افرط فى القطع الاصليه بس لقيته نفس الوزن و الجوده فقلت اجيبه كامل احسن
16/ اشتريت زيت باور شل 1/ علبه لتر و رجعت لقيت الاسطى محمد ابو عبود منظف العلبه و غاسل الموتور من تحت و ركب الاويل سيل و العلبه منظرها يشرح القلب الحزين و كمان فك خزنه الزيت و الخراطيم و لا كان فيى حاجه


اكمل معاكم كمان شويه..