غيرت علبة الشكمان الخلفية بموديل جديد
كل سنة اغير علبة الشكمان .. اخر واحدة كانت ابو اليزيد و مركبها عند فرعهم اللي في الملك الصالح ... سنة تقريبا و داب و وقع
قلت بقا ادعبس كده ... لفيت شوية لقيت استثماري كذا نوع منهم واحد اسمة يس تقريبا و الاسعار من 185 ل 220 كده
المهم شفت علبة استانليس مش بتاعة النوبيرا .. هيا مستورده بس مش مكتوب منين و نوعها اسمه basel و منها فيها ديل شيك كده
سألت واحد قالي ب 350 و نزلها 300 و خليتة يجيب مغناطيس عشان اتاكد انة استانليس فعلا و لقيتة تمام المغناطيس ما بيلقطش فية خالص
لفيت شوية لغاية ما جبتها من واحد بالتركيب ب 210
العلبة تقفيلها حلو اوي و شكلها شيك و لايقة عالعربية برغم انها غير الاصلية خالص
هوا بيستخدم القفيز بتاع العلبة القديمة و يعدل بعده و يركب .. يعني ما بيجيش جنب الماسورة الاصلية خالص .. و ميزتة انة مش بيحوش مياة كتير جوا بيطردها لانة مايل و مالوش الكرش اللي في الاصلي و حجمة قريب من الاصلي بس الشكل مختلف
و ميزتة برده مش بيتهز جامد من المطبات يعني ولا بيخبط في جسم العربية ولا بيخبط في المطبات العالي ... و بيركب نفس الجلد القديم علي فكرة
الملاحظات: صوتة أعلي شوية من الاصلي .. مش تربو يعني بس هوا أعلي خصوصا فوق ال 120
بشم ريحة غريبة شوية منة بس بتخف شوية شوية ..يمكن عشان جديد!!
يارب يكون معمر شوية و يا ريت يكون الكلام مفيد
سحب العربية عادي