علي فكرة الرجالة كمان مخبيين بووووز الله لا يوريك
أولاً : أنا راجل ومتزوج من 8 سنوات وعندي طفلين [ لحسن حد يفتكر من عنوان المشاركة ان دي ست متعصبة لجنسها ]
ثانياً : أحيي محرر الموضوع لأن مضمونه أكثر من رائع ومكتوب بطريقة لذيذة وبخفة دم صعب تلقيها في خنقة الناس اليومين دول .
ثالثاً : الرجالة كمان كتييير تضرب بوووز ، وما حدش اتكلم عنه ليه ... يمكن عشان بوووز الستات قديم منذ الأزل لأنه قلة حيلة فلو كانت الست تملك في العصور الغابرة وسيلة أقوي من البوووز ما كنتش أترددت فنتو ثانية لكن لأنها [ كانت ] الطرف الأضعف في ذلك الوقت وكان ضربها عادة يومية للراجل فمكنش حيلتها غير البوز ... أما بووووز الرجالة فلسه نازل السوق اليومين دول وطبعاً فيه منه أنواع علي حسب حمشنة الراجل ، فكل ما كان الراجل حمش يبقي بووووزه متين وما يخيبش ، وأذبل أنواع البوز الرجالي هو المصري لأنه نازل من غير سنان فطبعاً ما بيديش التكشيرة المطلوبة ... وطبعاً البووووز الرجالي دي حاجة جديدة علينا لأن من زمان الرجالة كان عندهم وسائل أقوي بكتييير [ زي التعليق ـ الضرب ـ التلطيش ـ السب والاهانة ـ الحرمان من الخروج ـ ومن المصروف ـ الحبس الانفرادي ...ألخ ألخ ألخ (أ) دي مقصودة ] لكن لما الزمن ادحضر بالرجالة وأيامهم ولت وجاء عصر الحريم أصبح الراجل هو اللي قليل الحيلة فلجأ الي اقتباس أقدم وسيلة عند المرأة للتعبير عن الكبت الشديد ألا وهو البووووز الرجالي .
أخيراً : أنا شايف بصراحة أنكم ظالمين البوووز عموماً وجايين عليه شويتين مع أنه أخف من حاجات كتير فسواء كان البوووز رجالي أو حريمي [ مع ملاحظة الفارق في شدة عضلات الفكين ] هنلاقي أنه أضعف موقف سلبي يعبر بيه أحد الزوجين عن أنه مش طايق نفسه عشان يطيق اللي معاه فله أو لها جزيل الشكر علي أنه لم يتعصب أو تتعصب فيقرر أو تقرر أتخاذ موقف أشد خطورة يمكن أن يودي بمستقبل الأسرة ككل ، وكل اللي يجيبه ربنا كويس ولو جت علي البوز يبقي يستحمله أو تستحمله وأمرههما لله تعالي . وشكراً