بتسيب عربيتك مفتوحة و تنزل تشتري حاجة؟

**Islam_galal** · 13-07-2008 12:36 PM

مبقاش فيه أمان
و لو مراتي جوه العربية باقفل عليها و عيني علي العربية
و بصراحة بنية عنف واضحة للجميع و ربنا اللي بيستر

**theking2690** · 13-07-2008 01:10 PM

لأ الصراحه بقفلها مستحيل ابعد عن العربيه خطوه و اسيبها مفتوحه

**Opel_Rekord** · 13-07-2008 01:24 PM

المشاركة الأصلية كتبت بواسطة piezo

انا حصل معايا موقف من ساعتها ماسيبش العربيه مافتوحه حتي لو مراتي جواها مره من ذات المرارير واقف قدام مقلي بجيب حجات وراكن ورا عربيه لانسر خضرا نفس لون عربيتي بس انا نوبيرا ومراتي فيها و العربيه مفتوحه مش قافل السينتر لوك و المفاتيح معايا ولا قيلك صاحب العربيه الانسر المسطول الي شامم كولا بيركب العربيه عندي و بيقفل الباب و التانيه جوه العربيه جالها شلل رعاش و مش عارفه تنطق ولا تسرخ حتي الراجل المسطول خد باله طبعا وانا شفته و هو خارج من العربيه و كنت هاموته بس لماعرفت الي حصل و واعتذر قمت سايبه من ساعتها وانا بقفل العربيه عليها ومباخليش العربيه مفتوحه خالص ولو حتي واقف قدام كشك باجيب حاجه لان ممكن في لانيه الي هي اقل من الثانيه اي حاجه تتنتش وربنا يحفظنا جميعا من الناس ديه

ههههههههههههههههههههههههه ههههه

مسطوووووووووووووووووووووو وول

شكرا يامعلم عالموقف الجامد ده

وانا بردو من ناحيتى مابسبش العربيه مفتوحه ابدا حتى لو راكن جنب المحل لزق

عالاقل خالص ارفع الازاز نص رافعه والوك البيبان

**sab3aawy** · 13-07-2008 01:39 PM

انا طول عمرى مابسيبش العربية مفتوحة ابدا، انا حتى زمان كنت موسوس اكتر من ديلوقتى وكنت لو هانزل اشترى حاجات من البقال فى خمس دقائق بغطى العربية، لكن ديلوقتى عقلت شوية

بس بقيت موسوس فى حاجة تانية ، لما اكون عايز ابص على حاجة تستزم ان موتور العربية يفضل داير، بقيت يا إما يكون معايا حد، يا إما اكون تحت البيت واقفل عليها بالعربية التانية ، يا إما باقفل الديريكسيون بالعكاز واخد مفتاح العكاز فى ايدى بعيد عن ميدالية مفتاح العربية

دنيا بقت اسود من هباب الحلل

**AhmedTareq** · 13-07-2008 01:49 PM

ايوه انا عندي سايره سوبارو ليون 1982 وعلي الرغم من كدا بقفلها قبل ما انزل الدار مابقتش امان والناس ما مبقاش عندها ذوق دا مره بعد لما عمات العربيه سمكره ودوكو نزلت اشتري حاجه من البقال وسيبتها مركونه بامتياز جيت بعد خمس دقايق لقيتها مخبوطه واللي خبطها طبعا زوغ (الغريب اني فاكر ان اللي خبطها عيل وجري دا الناس قالولي انها عربيه تويوتا كورولا جديده واللي راكبها المفروض يكون راجل محترم بس زوغ فما بالك بالناس التانيه لما تسيب عربيتك مفتوحه دا ممكن ياخدوها كلها

**M.Mokhtar** · 13-07-2008 01:51 PM

المشكله عندى ان العربيه لا تخلو من حاجات صغيره ممكن تتسرق بسهوله
يعنى مثلا فى العادى هتلاقى فى العربيه 2 موبيل ولاب توب وسى دى مان وشاحن موبيل ده غير الفلوس الفكه اللى بسيبها فى العربيه عشان لو فى موقف معين ونظارة شمس ونظاره طبيه
يعنى حاجات بسيطه ممكن تدخلها فى 10.000 جنيه بس :)

عمرى ما بنزل من العربيه الا لما بقفلها وكمان بقفلها بالريموت بطريقه تخلى الباب لا يفتح من بره ولا من جوه الا بمفتاحها

**ehabradwan** · 13-07-2008 01:55 PM

مستحيل الا لو قدام عيني و يبقى المفتاح معابا

**hazem_khidr** · 13-07-2008 03:55 PM

لو نازل اجيب سجاير او حاجه ساقعه من كشك و عيني علي العربيه بسيبها مفتوحه
انما لو عيني حتغيب عن العربيه ولو لدقيقه بقفلها
و في كل الاحوال عمري ما بسيب المفتاح او الموبايل او اي حاجه تتسرق في العربيه

**MoToRiZeR** · 13-07-2008 05:47 PM

دنا لو نازل ارغي مع واحد صاحبي في الشارع و هنبقي واقفين ساندين عالعربية بقفلها! انا موسوس جدا في الموضوع ده و كتير برجع من أخر الدنيا بسبب الهاجس بتاع "انا نسيت اقفل العربية"