أحمد باشا أخيرا آن الأوان و نشوف الدنيا جوا شغالة إزاى
عرض للطباعة
شكرا على ذوقك خاصة انك اكيد لا تقصد بـ "عادا طبعا بعض الاشخاص المحترمين" ان غيرهم مش محترمين حاش الله فانتم اكبر من ذلك
بس زي ما كلام غير المالكين بيكون احيانا غير دقيق لعدم خبرتهم بالعربية (ولو ان مش لازم اطلع القمر علشان اتكلم عليه) برضه كلام بعض المالكين بيكون فيه تحيز أصل فيه بعض الناس بيعتبر العربية واحد من اولاده ولازم يمتدحه مهما كانت عيوبه!!
عموما انا باقول رأيي لوجه الله وأكيد صاحب الموضوع بيقرأ جميع الآراء سواء مع او ضد ويكون قناعته هو وأكيد هو بيقدر ان الي دخلوا الموضوع مافيش بينهم لا بيزنز ولا عداوة مع شركة نيسان ايجيبت
وعلى فكرة افضل وسيلة للاقناع تقديم الحجج لا مهاجمة الرأي الآخر أو قائليه أو إهانتهم صدقني ستستفاد من هذه الكلمات ان شاء الله اكثر من الموضوع نفسه
أرد بقى على الجزء الثاني (المقبول) من كلامكم
السيب القديم يختلف عن الجديد ياباشا
القديم قطعه ياباني وموتوره ياباني خالص 1600 والجديد قطعه هندي وموتوره تجميع هندي
يعني فيه فرق
الصني الجديدة من وجهة نظري عربية كويسة القيمة مقابل السعر
بس مش معنى كده اننا مفتكر ان نيسان ايجيبت حست بينا وقررت تبيع لنا ببلاش لا بتبيع هندي بسعر اقل وعلى فكرة الهندي مش وحش الفيرنا عربية اثبتت جدارتها يعني
لكن مش معنى كده اننا نتجاهل الحقائق ونقول انها زي الشيب القديم
اشكركم مرة اخرى
أما أجري بقى اروح قسمي ههههههه
تحياتي
شرف لينا وجودك معانا .. وشرف لى انى اتعرف على ناس محترمة مثلك واقراء كلامها الهادى المقنع حتى لو مش متفق معاه بس بتوصله باسلوب محترم حتى لو فيه اختلاف
بعيد عن الصنى الجديدة اللى هنا فى مصر .. تفكير العالم اتغير دلوقتى .. وكلنا عارفين ان كل المصانع العالمية بتتجه الى التصنيع والتجميع فى بلاد اخرى غير اوروبا واليابان .. فاكبر الشركات العالمية بتصنع وبتجمع منتجاتها فى الصين .. بس تحت اشراف ورقابة عالمية ومن الوكيل الام لهذه الشركات سواء كانت سيارات او مثلا اجهزة كهربائية وهكذا
وحتى الهند بردوا البلد الوحيدة اللى بتصنع نيسان ميكرا الصغيرة فى عائلة نيسان وبتصدرها الى اوروبا .. وعدم سبب نزول السيارة الى الان الاسواق المصرية ان تكلفتها حتكون غالية .. مع ثقافة العميل والسوق المصرى فمش حتحقق مبيعات
والله زى ما بحكيلك .. انا لو معايا تمن ومهر الجيتا حتى لو بتتقفل فى الصين .. حجيبها
او لو معايا تمن الهوندا حتى لو كانت صينى حجبها بردوا
يمكن العقبة الوحيدة اللى تقف قدامى فى عدم شراء هوندا او جيتا لو كان معايا فلوسها مثلا الوكيل .. لان يهمنى خدمة ما بعد البيع جدااااا .. واكيد فى ناس اخرى غيرى مش بيفرق معاها الموضوع ده .. بس عن نفسى طالما جايب جديد وزيرو لازم اتعامل مع التوكيل ويكون توكيل محترم وبيرضى عملائه
تحياتى ليك .. ومنورنا حقيقى .. واتشرفت بوجودك معانا :satelite:
جزاكم الله خيراً والله الواحد بيستفيد من كل الأراء إللي بتتقال بهدوء وعقلانية ..
بس إن واحد يخش يرمي كلمتين ملهمش أي تلاتة لزمة .. ويجري .. ده في حد ذاته شيء مؤسف مش عشان هيكرهني في العربية .. بس بحزن لما ألاقي ناس بتعمل كدة بدون حجة أو برهان
جزاكم الله خيراً جميعاً :)
متهيألى ان نتيجة انك مش حاطط معايير واضحة لتقييم العربية مع تحديد أهمية كل معيار بالنسبة لك هو ده اللى بيخللى الحكم بيكون فى المطلق وبالتالى بيطاع مش مرضى . اما عن نفسى اشتريت العربية و انا مقتنع بيها 100% شكلا و اداءا - رغم ان فى ناس كتيير مش عاجبها الشكل علشان معلق فى أذهانهم شكل معين زى اللالنترا مثلا. بس فى رأى ان شكل الصنى الجديدة حصل فى تعديل جوهرى و بقى انسيابى أكتر و عملى أكتر . بجانب التعديلات الجوهرية فى الصالون و اتساعه المحترم و كمان الماتور الجديد . العربية عدت معايا ال 1000 كم و أقدر أقولك بكل أمانة ان معنديش أى ملاحظات جوهرية علىيها و انها محققة لى الرضا عنها بنسبة عالية جدا. يعنى الخلاصة ان الصنى الجديدة package محترمة و تستاهل الثمن اللى انا دفعت فيها لانها متوازنة فى جميع المعايير مش زايدة فى معيار زى الشكل مثلا على حساب معايير أهم - بالنسبة لى _ زى الصالون و عوامل الأمان.
أنا بس أحب أوضح حاجة للكل علشان فى ناس بتتهم الأعضاء هنا فى القسم انهم متعصبين لنيسان و لعربياتهم
احنا أول ناس بتقول لما يكون فى عيب فى العربية لانى هأخبى عليه ليه... أكيد هاكون عاوز اقول علشان على الاقل خالص آخد نصيحة الزملاء فى كيفية التصرف
واكتر من عضو و انا شخصيا ذكرنا عيوب العربية زى الكاوتش الماكسيس و التقفيل المصرى و صوت الفرامل و المشكلة المشهورة اللى اتحلت بتاعة المساعدين
ودايما بنقول ان طالما وراك نيسان و كلاء أقوياء يبقى ما تقلقش
واكيد فى استثناءات لان الدنيا مش وردى فى مصر يعنى اكيد هتلاقى مشاكل بس قارن ده بعربيات و توكيلات تانية فى نفس الفئة السعرية و ما أعلاها و ما أقل
انا نفسى لما جيت اشترى لفيت على اقسام المنتدى و سألت بره كتير وكان اكتر حاجة بتقلقنى التوكيل من اللى باسمعه عنهم
واى عضو بيقرى اللى بنكتبه هو حر ياخد بيه او لأ
بس احنا الواجب علينا بنكتبه لانى بأحس اللى انا بأكتبه ده شهادة فبأكتب المميزات و العيوب علشان أفيد غيرى زى ما غيرى فادنى
اللى بيزعلنى بعد كل ده الاتهامات الموجهة لينا بصراحة بدون اى وجه حق
وباشوف ان فى ناس بتحاول تقلل من مجهود الاعضاء فليه التكسير فيهم مش فاهم
يعنى احمد تى فى الراجل طالع عينه فى القسم و مع ذلك بتوجه اليه اتهامات ملهاش اى تلاتين لازمة
تحس كأن فى ناس بتحاول تخلينا نبطل كتابه عن النيسان يمكن غيرانين يمكن مندوبين شركات أخرى الله اعلم بس فعلا بيكتبوا كلام غريب
وتوضيح انا مش باكلم عن النقد البناء علشان محدش يزعل
على العموم حصل خير و اهلا بيك دايما عندنا وتشرفنا
.
تحياتى لصاحب الموضوع
واحب اقولك ان اختيار ربنا دايما بيكون افضل اختيار
وقبل الحيرة حضرتك اكيد طالما اخدت قرار بشراء اول عربية زيرو لازم تكون نزلت وشوفت بنفسك وقارنت بين الصنى وغيرها من كل العربيات فى نفس الفئة حسب مقدرتك الشرائية
وبالتالى لازم يكون اختيارك عن اقتناع تام 100% بالعيوب قبل المزايا ولا يكون لمجرد اتباع احد او كثرة الطلب او مبيعات الصنى
والامر فى الاول والاخر متروك لحضرتك وبينى وبينك كده العربيات دى اصلها قِرَف يعنى انت ونصيبك اللى ربنا كاتبهولك
اسمحلى اسجل اعجابى الشديد بتغليب العقل على اللسان والعاطفة لأنه فى اغلب القرارات الحاسمة بيكون صوت العقل هو الاصح
اخى الفاضل ..
لو كانت المواتير الالومنيوم عيبة ما كانت شركة المانية عظمى مثل اودى قد اعتمدتها فى سياراتها الفاخرة ..
وعن نفسى باعتبر الالمان عباقرة ابحاث التطوير فى صناعة السيارات فى العالم قبل اليابانيين انفسهم
أما بخصوص الهند والمكونات المصنوعة فى الهند احب اذكر المعلومات التالية لحضرتك:
1. خريطة انتاج السيارات فى العالم كلها اتغيرت فى اخر 10 سنوات بسبب الظروف الاقتصادية والازمات المالية العالمية بمعدل 180 درجة
2. تاتا الهندية اليوم باتت تمتلك سيارات فاخرة وانجليزية عريقة مثل لاند روفر - رانج روفر - جاكوار بعد شراءها من فورد الامريكية مؤخرا
3. شركات عظمى على مستوى العالم كله لجأت الى دول لا تاريخ لها فى صناعة السيارات لمجرد تقليل تكاليف الانتاج بشرط الاشراف الكامل من الشركة الام .. ومنها على سبيل المثال لا الحصر:
- مرسيدس و بى ام دبليو و فولكس فاجن لها مصانع فى الصين
- فولكس فاجن لها مصانع فى البرازيل والمكسيك
- تويوتا وهوندا لها مصانع فى تايلاند
- نيسان لها مصانع فى المكسيك والصين وماليزيا
- رينو لها مصانع فى المغرب ورومانيا
4. كل شركات السيارات مؤخرا اتجهت الى نظام تخصيص انتاج طراز بعينه فى كل مصنع لها فى بلد بعينها ومن ثم التصدير والشحن لباقى اسواق العالم وعلى سبيل المثال:
قاشقاى فى انجلترا - ارمادا ومورانوا فى امريكا - جوك فى اليابان - ميكرا فى الهند - تيدا فى المكسيك - ليفينا وبلوبيرد فى الصين وهكذا
5. كل شركات السيارات اليابانية تحديدا قلصت من حجم انتاجها داخل اليابان بارقام عنيفة لتجنب الارتفاع المبالغ فيه لتكاليف الانتاج ومن ثم ثمن بيع السيارة واتجهت الى دول اقل كلفة مع الابقاء على نفس نعايير الدقة والجودة
6. اغلب شركات السيارات اصبح تفكيرها فى دراسة جدوى السوق والانتاج بحيث تقترب من العميل فى حال وجود فرصة فى سوق ما ومنها على سبيل المثال:
مصانع تويوتا وهوندا ونيسان فى امريكا - مصنع نيسان فى مصر - مصنع نيسان فى انجلترا باوروبا (لاحظ ان معظم مبيعات القاشقاى كلها فى اوروبا)
أستاذى الفاضل بعد السلام عليكم ورحمة الله وبركاته
اود ان انصح سيادتك ببعض الأشياء التى واجهتها مثلك تماما عندما نويت شراء سيارة جديدة وهى :
أولا / يجب السؤال والإستفسار على كل شئ حتى لو كنت مقتنع وحد عاب فى العربية خللى صدرك رحب .
ثانيا / مفيش حاجة مافيهاش عيوب خصوصا عندنا ولكن قيم السيارة من حيث العيوب والمزايا وانهى فيهم اكتر من التانية وحتى لو العيوب قليلة شوفها مؤثرة ولا يمكن التغاضى عنها .
ثالثا / شوف اسم شركة زى نيسان مش هتغامر باسمها وسمعتها عشان تجمع السيارة فى مصر اوتحط فيها مكونات هندى او مصرى الا بمواصفات معينة تحافظ على سمعة سياراتها .
وعلى فكرة انا لما جبت صنى 2008 لقيت فيها عيوب تجميع بس مش مؤثرة لأن أساسيات السيارة يابانى محدش لعب فيها , وبعدين نيسان من التوكيلات المحترمة فى مراكز الصيانة بتاعتها لو فيه اى حاجة حيغيروها على حساب الشركة مش حتدفع مليم , أستخير ربنا وتوكل على الله عز وجل والعامل النفسى عليه دور كبير جدا لا تستسلم لليأس اللى انت فيه ده محدش بيشترى عربية كل يوم افرح وفرح اولادك باستلام السيارة الجديدة وربنا يرزقك خيرها ويكفيك شرها والسلام ختام .إدعوا لمصر ربنا يحرسها ويحرس أهلها
عاشت مصر عزيزة مكرمة مصونة بإذن الله
استاذ أحمد
ايه الكلام الجميل ده بارك الله فيكم
أشكركم على ذوقكم ومجاملاتكم الرقيقة
وعلى فكرة أنا باحب القسم ده ونادرا ماباكتب في قسم السيراتو
وعلى فكرة انا اول واحد بيهاجم السيراتو رغم انها عربيتي يمكن علشان انا عارف عيوبها اكتر من غيرها
حقيقي قسم محترم وجميع اعضاءه محترمين بارك الله فيكم
اخوكم
عزيزي
اشكركم على ذوقكم وتقبلكم المجمل لكلامي بصدر رحب
وعلى توجيه الشكر لكلامي فهذا من شيم الكرام
تعليق بسيط على كلامكم
انا قصدت من الكلام المقبول هو المقبول لي فكريا والأخر لم اقبله فكريا وليس معنى ذلك انه خطأ لا سمح الله فهذه وجهات نظر
ايضا انا عندما تحدثت عن الصني تحدثت عن مكان التصنيع والتجميع ووسع الكنبة الخلفية من ناحية الطول والعرض وهذه أمور لا تحتاج خبرة كبيرة بالعربية
وأردت بذلك ان انقل لصاحب الموضوع والقارئين وجهة نظر أخرى قد يجدها مهمة ولو كانت وجهة النظر التي قلتها قد قيلت قبلها لكنت تحدثت عن المزايا التي لمستها في هذه العربية
بالنسبة للمحتوايات الهندية فده يفسر في نظري بعض من عدم المغالاه في ثمن العربية
بس على فكرة البلوبيرد سيلفي متجمعة في الصين واكيد فيها قطع صيني ورغم إنها عربية مش منتشرة (وده عيبها) لكنها عربية متميزة جدا
عزيزي الخلاف في الرأي لن يفسد للود قضية وهو يفتح الافكار وخاطئ من اعتقد ان رأيه هو الصائب دائما طبعا بما فيه العبد الفقير لله
أقولك سر
انا فكرت اجيب لابني الصني وهو مهندس في مقتبل حياته
لكني ترددت ولذلك أحب انتقد ما اجده فيها محل نقد وانتظر ردود الاعضاء لعلي اعدل عن رأيي
اطلت عليكم واتمنى لكم امسية سعيدة
خالص تحياتي