الموضوع: سؤال عن الفولكس كادى فان يوجد صور للتوضيح

هل الغرض من الشراء علشان هي عربية ديزل بس؟

و سعرها الحالي كام؟ و تكلفتها الإجمالية بعد الضريبة؟

بص... أنا عشان أكون صريح معاك...معنديش معلومات عن الكادي و السيات الفان و العربيات ديه....

بس خليني أقولك أنك طالما بتشتري عربية ديزل مستعملة.... لازم تكون حريص جدا جدا و انت بتبص عليها

عشان مفيش حد بيعتني بالعربيات ديه بطريقة مظبوطة في مصر.... ولا حتى التوكيل

العربية الديزل عايزالها واحد بيفهم أوي... و يكون ايده فيها دايما من ناحية تغيير الزيوت و الفلاتر و الغسيل و التشحيم و عدم القرص على الغيارات و التسخين الجيد قبل المشي و حاجات كتير أوي تانية

عمرة الموتور غالية..... و كذلك عمرة الطرمبة.... شغل الموتور و الطرمبة على أقل تقدير هيكلف من 7 ل 9 آلاف

دا غير العفشة و الكاوتش و لو هتسمكر و تدهن....

و بعدين لو عايز تركب عربية ديزل.... فكر في الجالوبر... أو شوف رانجلر عليها موتور تويوتا 2l و ده 2000 سي سي ديزل
ديه مواتير منتشرة و حاجتها موجودة.....

الكادي و السيات بصراحة معنديش فكرة حاجتهم موجودة ولا لأ.....

المشاركة الأصلية كتبت بواسطة Ahmed_Gallant

اولا انا بشكرك على الاهتمام والرد السريع
ثانيا انا الحمد لله ربنى وفقنى وخلصت العربيه بسعر كويس جدا باعتبارها مركونه
ثالثا بالنسبه للمصاريف بعد ما حسبتها لقيت انى برضه كسبان جدا باعتبار انى اشتريت مكنه و4 فرد كاوتش وبطاريه لان سعر المكنه يتراوح بين 6 الى 7 الاف ده لو على بعضها انما انا هشترى بلوك بس لان ادوات التغذيه مفيش فيها مشكله بما فيها طلمبه الجاز والباور ووش السلندر وممكن اجيب شورت بلوك عشان اريح دماغى من موضوع تركيب جوان وش السلندر عموما حاله العربيه كالاتى
- الدواخل سليمه والكرتيرات كلها موجوده وموضوع انها موديل جديد ولانها كانت تبع فودافون فالعربيه حالتها من بره جيده وممتازه من جوه كل العدادات شغاله بالانوار وعلبه الفيوزات فبريقه بدون دعابيس
- المكنه انا شايفها حلوه وصوتها ناعم مش خشن مع وضع الصوت الطبيعى بتاع الجاز مش بتدخن اسود غير فى اول ما ادور الصبح او لو قرصت عليها جامد بس فى صنايعى متخصص جاز شافها وقالى المكنه خفيفه لان ورانى لما بيفتح غطا زيت المحرك بلاقى بخر زيت طالع منه وقاللى هتدخن معاك وهتغلبك فى الدوراه ولانى انا اللى بركبها فباعملها كويس جدا ومبقرصشى على الغيارات خالص وبسخن كويس قبل الدواره وبسخن برضه كويس بعد الدواره ومبمشيش غير لما المؤشر يبقى فى النص
- العفشه ممتازه هتحتاج تغير جوز كبالن بعد 5 شهور ولا حاجه بس باقى الكلام تمام الحمد لله
- الصندوق ورا اوريجنال بدون تعديلات ومفروش جلد عشان ميجرحشى البضاعه

الصيانات اللى عملتها هى
-غيرت سير الكاتينه بواحد المانى عمل 90 جنيه بدون تركيب
- غيرت بطاريه بواحده 70 جافه كلورايد عملت 330 وخد القديمه
- غيرت زيت موبيل الاسود دلفاك 1350كم ومشيت منهم 800 لحد دلوقتى وغيرت فلتر معاه
- غيرت فردتين كاوتش بريللى عادى مش سرعات عملو 750
- زودت زيت الباور وزيت الفرامل واللى كان ناقصين شويه
- فولت مرتين واتاكدت من ان العداد بتاع التانك شغال تمام

الصايانات اللى ناوى اعملها
- سير الدنامو والباور
- فلتر الجاز والهوا
- هغسل الموتور والعفشه غسله كويسه

ملاحظاتى على العربيه
- الصنايعى اخد وقت طويل فى تركيب سير الكاتيه وقاللى ان العربيه طلعت عينه عشان يظبط سير التقسيمه وكمان قاللى ان دى اول مره يشتغل فى المحرك ده وكمان نصحنى بمركز معتمد بيشتغل فى فولكس بس قريب من البيت ودى بقى استغربتلها جدا
- المكنه الصبح بسخنها بتاع دقيقتين بزرار مطبوخ عند علبه الفيوزات وبعدين ادور وبحتاج ادوس دوسه جاز تروح لاقطه
- المكنه عزم كويس جدا بس عمر الغيارات قصير قوى ولانى مش عايز اقرص عليها بجيب بيها 100 واقف
- الغيار الخامس بيشد معايا لحد 140 وممكن اكتر بس كنت خايف على الكاوتش
- العربيه 1900 مثبوته على الرخصه 1000 وفى الشهر العقارى كان هياخد 1000 جنيه على الرخصه حسبها بالموديل مصاريف العقد المسجل لكن لما حسبها بالوزن وصلت ل200 جنيه وكسور
- العربيه فيها طقم التبريد الكبير ابو مروحتين مع ان مافيهاش تكييف وكانوا لما بيقوموا مع بعض العربيه بتبرجل وتروح مبطله فى واحد كهربائى فصلى المروحه الصغيره الموضوع خف كتير مبقتشى تبطل بس بقت توطى والتابلوه بالطاره يتهزوا قوى

استفساراتى
- اروح لمين عشان يحكم على المكنه تمام فى واحد صاحبى معاه الجهاز اللى بيقيس الانضغاط بس طبعا مش هينفع لانه بيركب مكان البوجيه
- الزرار اللى معمول بلدى ده اصلا كان ايه يعنى مثلا كان واصل على الكونتكت لما بلف لفه معينه يسخن ولما العربيه تدور يفصل
- فى الشاشه الديجيتال بتاع الكيلومتر بلاقى اول ما افتح كونتكت يقولى ستارت ان 3 ثانيه يقعد يعد وبعدين يرجع على الكيلومترات تانى هل ده ليه علاق بالزرار اللى فوق
- ازاى اخد هوا من طلمبه الجاز لو حصل والتانك فضى منى
- ايه الفرق بين الانجيكشن العادى فى الجاز والدايركت انجيكشن
- فى عندى حساس الegr مفصول السلك بتاه مقطوع هل ده ليه يد فى برجله المكنه مع المروحه
- فين مكان حساس الايدل فى العربيات الجازلانه ممكن يكون ليه يد برضه
- انا بغير للتانى على سرعه 15 وللتالت على سرعه 35 وللرابع على 55 وللخامس على 75 لان مفيش اربى ام هل ده كويس ولا الارقام دى تقل شويه
- فى المشى البطى ساعات بدى الرابع على سرعات بطيئه وافضل ماشى بيها ممكن نقول على 40 مثلا او 35 ولو الطريق فتح بجمع بيها من غير قرص فى عربيتى البنزين بحس ان الموضوع عادى لو مقرصتش واول ما احس بان الغيار بيسحب معايا بروح قارص هل فى العربيه الجاز ممكن يصر فى حاجه

انا عارف انى طولت جدا عليك بس انا خبرتى فى الجاز ضعيفه جدا مقارنه بالبنزين وعشان كده اسئلتى كتيره

اسف على الاطاله

ايه يا عم الافترا ده حرام عليك....كل ديه أسئلة؟؟ :D :D (بهزر معاك طبعا ... أنت تشرفني)

استعننا عالشقى بالله....

نبدأ من الأول ....

- اروح لمين عشان يحكم على المكنه تمام فى واحد صاحبى معاه الجهاز اللى بيقيس الانضغاط بس طبعا مش هينفع لانه بيركب مكان البوجيه

ممكن يركب مكان السخان ... بس من الآخر طالما المكنة بتنفخ تبقا خفيفة

- الزرار اللى معمول بلدى ده اصلا كان ايه يعنى مثلا كان واصل على الكونتكت لما بلف لفه معينه يسخن ولما العربيه تدور يفصل

أيوا ... بيكون واصل مع الكونتاكت على حاجة اسمها بلاطة سخانات و ديه عبارة عن حاجة وسيطة بتخلي السخانات تشتغل لمدة معينة من الثواني (10 - 15 - 20) و بعد كدا تفصل لوحدها و خلي بالك أنك لو طولت ايدك على الزرار ده ممكن تحرق السخانات


- فى الشاشه الديجيتال بتاع الكيلومتر بلاقى اول ما افتح كونتكت يقولى ستارت ان 3 ثانيه يقعد يعد وبعدين يرجع على الكيلومترات تانى هل ده ليه علاق بالزرار اللى فوق

طالما انه شغال بلدي يبقا اللي في الشاشة ده فاصلينه.... و مجرد بيعد من غير ما يشغل حاجة

- ازاى اخد هوا من طلمبه الجاز لو حصل والتانك فضى منى

بيكون عندك كاركة... يا فوق الفلتر ... يا على الطرمبة ... تفتح الخرطوم الراجع بتاع الطرمبة و تكارك لحد ما تجيب جاز صافي من غير هوا...

- ايه الفرق بين الانجيكشن العادى فى الجاز والدايركت انجيكشن

الانجكشن العادي غرفة الحريق بتكون في وش السلندر
أما الدايركت انجكشن فالغرفة بتكون على راس البستم (راس البستم بتكون مقعرة)
كذلك بيكون فيه اختلاف في الرشاش بتاع الحقن المباشر و رشاش الحقن الغير مباشر
بس الفرق اللي أنت هتلاحظه أن محركات الحقن المباشر بتكون صوتها أعلى نسبيا من الغير مباشر

- فى عندى حساس الegr مفصول السلك بتاه مقطوع هل ده ليه يد فى برجله المكنه مع المروحه

لا مالهوش علاقة...

- فين مكان حساس الايدل فى العربيات الجازلانه ممكن يكون ليه يد برضه

ظبط الأيدل في العربية الديزل بيكون من خلال طرمبة الجاز

- انا بغير للتانى على سرعه 15 وللتالت على سرعه 35 وللرابع على 55 وللخامس على 75 لان مفيش اربى ام هل ده كويس ولا الارقام دى تقل شويه

معقول.... قدر الامكان متخليش الآر بي إم يعلى

- فى المشى البطى ساعات بدى الرابع على سرعات بطيئه وافضل ماشى بيها ممكن نقول على 40 مثلا او 35 ولو الطريق فتح بجمع بيها من غير قرص فى عربيتى البنزين بحس ان الموضوع عادى لو مقرصتش واول ما احس بان الغيار بيسحب معايا بروح قارص هل فى العربيه الجاز ممكن يصر فى حاجه

لا مفيش مشكلة طالما انك مش بتعمل بتدوس فجأة.... يعني لو تدريجي مفيش مشكلة.....
العربية الديزل مش بتسقف زي البنزين

ارجو اني اكون وضحت.... و لو تحب تعرف اي تفاصيل تانية تشرفني :)

المشاركة الأصلية كتبت بواسطة ahmed_eng2001

كبير و الله ....
سؤال يا باشا ... علشان المشكلة دى حصلت معايا ... و الناس صدرونى انا فيها
لو مفيش كارجة على الفلتر ... اخد هواء من فين ؟؟ انا قلتلهم نفك ماسورة الديزل الى واصلة للرشاشات
صح كدة و لا لأ ؟؟؟

الله يخليك يابو حميد... انا لسة بتعلم :)

لا... هو احنا في جميع الأحوال عمرنا ما بنفك الماسورة ديه أبدا....

العربية نوعها ايه؟ طرمبتها عادة ولا طرمبة سبراتير؟