لاعيبة الاهلى اخدوا 120 الف مكافاة فوز افريقيا وطفل اشيوط قتيل ياخد 4 الاف !!!!

**BESO516** · 19-11-2012 04:16 PM

فى عرض جديد الكارثه الجايه

النفر = جلاكسى s3 او ايفون 5 مش متأكد بصراحه

عشان الناس اللى بتقول 4 الاف قليل !!!!!

بجد حسبى الله ونعم الوكيل فدى عقول

**Khaled Online** · 19-11-2012 04:20 PM

الحمدلله مش أنا بس اللي شايف الكورة مضيعة للفلوس والوقت والعلاقات بين الناس

**AhMeD EzZ** · 19-11-2012 05:10 PM

احنا ليه بنحمل اي حاجة لغيرنا ؟!

ليه مُصرين نربط بين الحادثة و الكورة ... الكورة دي صناعة في العالم كلة و بتدخل لبلاد كتير فلوس متلتة

و بالنسبة للاعيبة الكورة دي شغلتهم ... هل حضرتك يوم الحادثة مرحتش شغلك ؟! ... هل حضرتك رفضت تاخد مرتبك يوم الحادثة ؟!

لاعيبة الاهلي بفوزهم دخلو لخزينة الاهلي الي هو حاجة حكومة 1.5 مليون دولار = يعني 9.5 مليون جنيه

لما كل لاعب يا خد نسبته من المكسب حرام ؟!

طبعاً دة كله غير الضرايب الي بتخش خزانة الدولة من الكورة برضة

انما مش عشان الدولة مش بتقدر اولادها يبقي نيجي علي حق ناس تانية كل الي عملتة انها ادت عملها باتقان

**khaled_legend** · 19-11-2012 05:15 PM

اللي عنده دم احسن من اللي عنده فلوس

**sha2e** · 19-11-2012 06:44 PM

المشاركة الأصلية كتبت بواسطة ahmed ezz

الكورة دي صناعة في العالم كلة و بتدخل لبلاد كتير فلوس متلتة

تمام لكن مصر مش من الدول الى الكورة مصدر دخل ليها
لا احنا زي البرازيل والارجنتين او حتى كتير من دول افريقيا الى بيبيعو اللاعبين لانديه عالميه
ولا احنا زي كتير من دول اوروبا الى كل دوله فيهم بتعمل دوري متميز وتبيع حق بثه بمئات الملايين
مصر بقى عكس الاتنين الى فاتو ( بتشتري لاعيبه من بره - وبتشتري حق مشاهدة الدوريات الاوروبيه )

المشاركة الأصلية كتبت بواسطة ahmed ezz

لاعيبة الاهلي بفوزهم دخلو لخزينة الاهلي الي هو حاجة حكومة 1.5 مليون دولار = يعني 9.5 مليون جنيه

لما كل لاعب يا خد نسبته من المكسب حرام ؟!

جابو 9.5 مليون اوكي ( برغم انهم هيخدوهم يعنى مش هيدخل لخزينة الدولة حاجة منهم )
انصرف على النادي فى السنه الواحده اضعاف اضعاف المبلغ ده ولا لأ ؟؟
يعنى حتى لو جابو اضعاف المبلغ ده تبقى واقفه بخسارة برضو

المشاركة الأصلية كتبت بواسطة ahmed ezz

طبعاً دة كله غير الضرايب الي بتخش خزانة الدولة من الكورة برضة

لو حسبناها هتطلع تكلفة تأمين كام ماتش ؟

المشاركة الأصلية كتبت بواسطة ahmed ezz

انما مش عشان الدولة مش بتقدر اولادها يبقي نيجي علي حق ناس تانية كل الي عملتة انها ادت عملها باتقان

بصراحه كتر الف خيرهم جايبين لنا كاس العالم 10 مرات على التوازي
ومش بيكلفو البلد حاجة خالص لا موازنه من الدوله بكام مليار ولا عقود بملايين ولا معسكرات بره ولا أي حاجه

**dede_dodo88** · 19-11-2012 07:05 PM

أنا مش شايف الصراحة أي علاقة بين الأتنين..
مش لازم نربط فقر الدولة و عدم تقديرها لمواطنيها بنجاح حد تاني في مجاله حتى لو كان في الكورة..
ربنا يرحم الأطفال اللي أتوفوا و يصبر أهاليهم اللي ولا ملايين الدنيا تعوضهم عن اللي راح منهم..

**Khaled Online** · 19-11-2012 08:07 PM

بصراحة sha2e باشا انت قلت كل اللي نفسي أقوله
الناس فاكرة إن إحنا عندنا دوري ولعيبة وكورة بجد

من زمان والكورة عندنا بيستخدموها مخدر عشان الناس تنسى اللي هي فيه وتبلط
ومبيجيش منها غير المشاكل والمصايب كمان: وآخرهم حادثة بورسعيد والناس لسه بتشجع ومبسوطة
واللعيب يقولك أنا بهدي البطولة دي للشهيد مرة ولمشجعي الفريق مرة
يا سيدي لا تهدي البطولة ولا تلعب أصلا واشتغل حاجة تنفع بلدك

من كام سنة والناس حست بالخيبة التقيلة دي وقالت البلد بقى حالها صعب والولاد الصغيرين تسألهم نفسك تطلع إيه يابني؟ الولد يقولك لعيب كورة والبنت تقولك مطربة!

وبقالنا سنين أهو عندنا مدارس كورة ومصر اللي فيها فوق ال 80 مليون مطلعتش 100 لعيب على بعض يحترفوا برة في تاريخها الكروي كله

**Ahmed Selim** · 19-11-2012 08:31 PM

شئنا ام ابينا هي صناعة و احنا متفوقين فيها نسبيا على مستوى القارة

و فعلا اللاعيبة دي مهنتهم و مش عيب انهم علشان دخلوا خزينة النادي ما يقرب من ٩ ملايين انهم ياخدو مكافأة على كده