اصلاح مشكلة الفرامل الخلفية
السلام عليكم
كنت اتكلمت عن مشكلة في الفرامل عندي في العربية الانوس و كان فيه حيرة عن الموضوع ده و الحمد لله عرفت السبب و العربية اتصلحت امبارح عند محمد عبده في شارع العشرين
المشكلة كانت ان الفرامل قافشة في العجله اليمين ورا و خصوصا لما بشد فرامل اليد و ده كان بيخلي التيل يفضل قافش في الطنابير و يسخن و بالتالي زيت الباكم يسخن لدرجة عالية جدا فالرامل تسيب
كلمت محمد عبده في التليفون و دار بينا حوار طويل هو يقولي ممكن يكون جرابات فرامل اليد (سلك فرامل اليد و انا اقوله لا دي ماساتر خلفية انا حاسس بكده و الطنابير كانت بايظة لما انت كشفت عليها لما كنت عندك و هو يقولي متشتريش حاجة لحد ما تيجي و نكشف و انا اقوله لا انا هشتري كل حاجة و البايظ نغيره (علي الرغم ان المفروض العكس يعني المفروض انا اللي اقوله لا انا مش هشتري غير لما نكشف بس هو محمد بيخاف علي الزباين انهم يدفعوا فلوس في حاجات سليمة) المهم اشتريت الحاجات
من ابوالحسن و هي كالتالي :
طنابير خلفية : 480 جنية جي ام اصلي
تيل خلفي : 150 جي ام اصلي
بلي عجل خلفي الاتنين ب 90 جنية الماني و ملقتشي غيره عنده بس اشطة يشتغل و بعدين نبقي نغيره
لما يبوظ مش مشكلة قوي يعني
طقم مسمار كاليبارات خلفية : 25 جنية و ده بقي ملهوش اي لازمة لانه مكنشي اصلي و خامته سيئة جدا جدا جدا جدا و رميته في الزباله بدون اي مبالغه حتي كان فيه سوسته كانت مش بتاعة العربية الراجل اللي قبلي كان مركبها معرفتش اخدها من الطقم ده :H_angry[1]:
قبلها بيومين كنت شاري الماستر اليمين و الشمال من التوكيل الواحد ب 130 جنية و خرطومين فرامل خلفي الواحد ب 45
طبعا تركيب البلي احتاج علبة شحم محمد عبده جابها و حطها علي الحساب
و زيت باكم و للأسف كنت جايب زيت باكم موبيل DOT 4 و نسيته في البيت و اضطريت اجيب زيت فرنساوي من هناك DOT 3 بس مش فارقة كتير , الفرق واضح بس في لون الزيت الموبيل تحس انه شفاف التاني غامق شوية
رحت لمحمد عبده و قابلني هناك إسلام و محمد المساعدين اللي معاه و بصراحة اللي بيميز المكان ده عن غيره مش بس الصنايعيه الشاطرين لا كمان انهم مؤدبين و بتحس انك بتتعامل مع ناس محترمه كده و بيشرحولك اي حاجة تسأل عليها بمنتهي الادب و منغير اي زهق
المهم محمد المساعد فك العجل الخلفي و طلع الطنابير و لقيت ان فيه طنبورة فيها كسر في طرفها !!!
المهم فك التيل و مجموعة السوست اللي مسكاه و لقينا منظر الشحم و هو سايح من الحرارة و بقايا التيل المتأكل
غسل الناحيتين كويس بالبنزين و المياة و الصابون و ابتدينا نبص علي الماستر اليمين ورا اللي انا كنت شاكك فيه و فعلا لقيناه قافش و مش راضي يتحرك حتي لما دقينا عليه !!!!! و شاله و ركب الجديد و ركب التيل
و غير الخراطيم الخلفية و الامامية انا كنت مغيرها قريب من شهرين
و جه وقت البلي و بصراحة هم بيركبوا البلي الخلفي بطريقة احترافية جدا و بهدوء و نضافة
ركب البلي في الطنابير و اطمنا علي سلك فرامل اليد انه شغال مش بيعلق و عملوا رجلاش لفرامل اليد و قفلوا العربية و اطلع جرب
الفرامل اختلفت تماما
بقي فيه فرامل طرية زي اي عربية مش ناشفة و قافشة
المهم فكينا الايدل و نضفناه و غسلوا علبة فلتر الهواء و الخراطيم اللي حوالين و كشفوا علي العربية كلها كشف سريع
لقيت بقي اويل سيل كرنك خلفي بيجيب زيت و ده عايز الفتيس يتفك عشان يتغير قولت الحمد لله و سكت
معلش والله انا صورت صور كتير قوي قوي بس مش عارف ارفعها علي الرغم من ان مساحتها اقل من 2 ميجا بس مش عارف فيه ايه
التكلفة الكلية قرب ال 1200 جنية متقسمة :
طنابير خلفية : 480 جنية جي ام اصلي
تيل خلفي : 150 جي ام اصلي
بلي الماني : 90 جنية للبليتين
2 ماستر فرامل خلفي : 260
2 خرطوم فرامل خلفي : 90
زيت باكم : 25
طقم مسمار كاليبارات خلفي اترمي في الزباله ب 25 جنية
مصنعية 150 جنية من ضمنها علبة الشحم و هي تقريبا ب 25 او ب 20 جنية
يعني كله 1275 جنية بالظبط
و ربنا يستر بقي عشان انا خلاص جبت اخري بجد من كتير المصاريف علي العربية دي