بالنسبة للبدائل فيوجد برامج voip كثيرة مثل Skype و لكن بفلوس فمن الممكن أن تستخدم إحداها. ولاحظ أن Skype الأن مملوكة لميكروسوفت و يوجد أيضا ياهو ماسينجر و جوجل توك ممكن اجراء مكالمات دوليه.
الحقيقة ده موضوع مهم جداً
بس برضه علشان نبقى معاكم فى الصورة
حد يفهمنا ايه هو الفايبر ده وبيتحمل منين وياريت شرح لطريقة الاستخدام
علشان بس نقدر نكرهه على أرضية واضحة من الفهم وبعد كده نبقى نشيله :)
نفس الكلام سمعناه قبل كده على ياهو ... والياهو ماسينجر
منه لله وزير الاتصالات السابق
ومنه لله بدوى رئيس الجهاز القومى لتنظيم الاتصالات
قافلين سكايب فى مصر على شبكات المحمول
واحسن بديل لسكايب هو فايبر
فيه بدائل اخرى بنفس الطريقه زى برنامج فيرنج وبى بى
بصراحة أنا خايف من جوجل وفيس بوك أكتر من فايبر
جوجل اخترقت حياتنا من خلال موبايلات الاندرويد
والفيس بوك الناس بقت تحط عليه كل بيانتها الحقيقة
وحتى صوره الشخصية والعائلية بدون اى قلق !!!!
إسرائيل مع الاسف متقدمة فى مجال الاتصالات و زى ما احنا عارفين ان حتى التكنولوجيا الأمريكية يا أما بتصب فى الاخر عند اسرائيل او فى حتى خبراء اسرائليين شغالين فى الشركات الامريكيه العابره للقارات و معهم جنسيه امريكيه او اوربيه و بالتالى الموضوع مش فارق كتير سواء كان البرنامج المستخدم امريكى او اسرائيلى او من اى بلد تانى و كمان موضوع برنامج مجانى او فيه إعلانات مش دليل على اى حاجه ما هما ممكن يكونوا بيتجسسوا على برنامج معاه إعلانات و دعايه و ممكن يتجسسوا حتى على برنامج للاتصال بفلوس و اشتراك. ايه اللى هيمنعهم يعنى طالما النيه موجوده؟
يبقى الخلاصه ان المفروض. ميبقاش فيه ثقه لاى برنامج للمكالمات الدوليه سواء كان مجانى او غير مجانى. لان محدش يعرف المعلومات اللى بتتقال عليه مين غيره بيسمعها و بيتجسس عليها و طبعا مش محتاج أقول ان التجسس ده المفروض انه حاجه ممنوعه و بتحصل بطريقه غير شرعيه لمصلحه دوله او جهه ما.
طيب الحل؟ الناس مش هينفع انها تبطل تستخدم البرامج دى لانها ببساطه مجانيه او باشتراك بسيط جدا و فى نفس الوقت احتمال يكون عليها تجسس فهى غير آمنه و لذلك الحل المنطقى انه يتم استخدامها و لكن بشروط منها :-
١- عدم ذكر اى معلومات عن حسابات بنكيه او معلومات ماليه و ده فى برامج الشات بالكتابة او الصوت
٢- عدم تناول اى مواضيع ليها دعوه بحاله البلد الاقتصاديه او السياسيه (على الاقل ما تبقاش أزيد من كلام الجرائد ) و بذلك اللى هيتصنت مش هيوصل لحاجه مفيده لان الكلام هيبقى عن الحاله الشخصيه للفرد و مش معلومه عن البلد و بالتالى علشان يعرف معلومه عن البلد و لا الحاله النفسيه يبقى يتجسس على ال ٩٠ مليون نسمه.
و على فكره مش برامج الشات بس ممكن كل برامج الشات و الاتصالات الاجتماعيه زى الفيسبوك و المنتديات كمان و حتى فى المواقع الإلكترونية للصحف ممكن قوى اللى عايز يتجسس يدخل عليها مجانا و يشترك و يقرأ التعليقات و يوصل للمعلومات على طبق من فضه و آراء الناس المختلفه طيب ساعتها ايه الحل؟ الحل هو زياده الوعى عند الناس و عدم وضع معلومات مفصلة و مفيده له لتصعيب المهمه فالحل لازم ييجى من مصدر المعلومات اللى بتتقال او بتكتب و ليس من وسيله الاتصال المستخدمه
مواقع التواصل الاجتماعى مثل فيس بوك مثلا اصبحت كتاب مفتوح لكل واحد مشترك فيها واصبح تسجيل رقم التليفون شرط للاشتراك فيها وفيها كل بياناتك واصدقاءك والافكار اللى بتدور فى راسك كمان فيعنى موضوع فايبر او غيره اصبح ليس بهذه الدرجة التى تتخيلها من الخطورة
تقبل تحياتى